I minë-eny Filipī
4 Lökten kahōlö, yī-ö ṙanamlōn Chu hēk sapīöv chu hēk hanangenlōn chu hēk yī-ö inrē tö hòṅ maheukkūö chu, ngatī inlahen yin öi hangönöre söktöhëichṙen im Mā.
2 Halēnö Yū-ötiā Chin hēk Sintěki inrē tö cha nö hēngö mufē nö im Mā. 3 Heūṅ, tökô-en hamòlṙen Chu vë-ekūö yīö chin öi iṙūöhen hayööken cha nö nëttak, pò cha nö hamòlṙen chu öich im inhangkö ngam tölöök inhānga, tö Klemen hēk tö më tahëng inrē hamòlṙen chu yip tö minënyu nö imat ngam līpöre nômö, holṙenre cha-a nö kalēḵ alaha nö la-evṙen.*
4 Örheūheu ṙamlōn im Mā. Hēk Chin ngö ṙô, Örheūheu Ṙamlōn! 5 Hökngen yīö öi akahka tö yip taṙòkhöre tarik öi mahameuktö minlēḵṙenre. Röhta an ngam Mā. 6 Uh yin piṙūtkuvö tö nup töng sitih, i nup tökeuheūttöre pöri öi vë-ekūötēv hēk vinë-elkui hēk holre tö ngam nööinyö öi peuinyhökūö ngam Tēv, 7 ngaich möl min ngam lanāmö ngam Tēv ngam chamööḵngen nup mikah elmat nö laklen ngam ellōn yīö hēk ngam kumlēḵ mufē yīö* nö löktö in Kristū Yēsū.
8 Im manā-aṅ kahōlö, nup taṙòkhöre ṙô tökô-en, nup ṙô tö hòṅ aṙū-uti infēka tö hī, nup taṙòkhöre ṙô tölöök, nup taṙòkhöre ṙô töhet, nup taṙòkhöre ṙô töhō-ov, nup taṙòkhöre ṙô tölöökö ineūka, nup taṙòkhöre ṙô tö īnu tö tölöök, nup taṙòkhöre tö ineū-euvö, iṙūöhen yin chumkūöṙen tö u anū-ö.* 9 Nup ṙô haköp yīö öi in chu hēk töhō-ov tö yīö hēk nup ahang yīö hēk maheuk yīö öi in chu, iṙūöhen yī-ö öi hāngö u ngaich örheūheu min ngam Tēv lanāmö nö holtöṙah yīö.
10 Kirööngen ṙanamlōn Chin öich im Mā tökūö yīö hēk öi fēken inlahen ngam lanööken chu töngamuh, rö-ö pöi piṙūtken chu in nuk urěh, öt ṙētakvö pöri yī-ö öi hameukten e. 11 Rö-ö nö kūö Chu öich hāṅten tö nup chehen, lökten öich ngatī ṙô. Pön pòrô öp töng sitih inlahen chu, haköplu Chū-ö töre öich höng in u ṙamlōn. 12 Akahakūö Chin tö inlahenre ha-aṅ nômöre in nup töng rahëichyen aṅ in re hēk akahakūö chū-ö inrē tö inlahen hī yěi pōyen aṅ in. Haköplu Chin öich in nup tökeuheūttöre ṙô hēk in nup töng sitih inlahngen, tö inlahen hī yěi tööḵngen hēk ha-euk hēk pòrô pōyen aṅ in hēk pōyen hanāṅten inrē. 13 Lökten ngam kamëtö kumlēḵ Chu, löktö in e chū-ö öich teūngen tö kumlēḵre öich in nup tökeuheūttöre ṙô.
14 Sön pöri yī-ö öi vāyö inlahen pöi holṙen chu öi in nup kanihngen chu. 15 Kahōlö aṅ Filipī, akahalōn yin inrē hē ranehten yīö öi hang ngam tölöök inhānga hēk hē Chu kiröönngöre chuh Maketònī ngaich öt hěngtak mahayööken chu aṅ el ngam māṅ, ötrēhěn nö kēḵ inyöökenre nö in chu, höng yī-ö. 16 Ngaich hē Chu öich i Tösalònikē, rö-ö yī-ö öi höng hěngheuh tī pöi nët heuh tī öi söömtö minë hanakten chu öi hateungngen u. 17 Rö-ö nö kūö Chu öich meūkkö nup inlōnti lamöktö in yīö, lōnu pöri chū-ö tö yīö öi la-evṙen tö nup tölöök nup tö yöölen tī tö yīö. 18 Ngaich pöri Chū-ö öich pōyen aṅ in tö nup taṙòkhöre hanaktenre chehen, öt hanāṅtuṙen Chin ngaich töngamuh pò yīö öi eltī Epafròtitös tī öi söömtö minë inlōnti, në inlōnti tökētu töhō-ov tö ngam Tēv nö sā inlahen nup tötahūsa tökētu, nup lökten ò nö kirööngen ṙanamlōn. 19 Haṙënngen u min ngam Tēv chu nö hateungngen minë hanakten yīö nö löktö im ineū-eu kanôlò Kristū Yēsū. 20 Nööinyö ngam Tēv hī hēk Yöng hī yēḵ nöng örheūheu. Āmen.
21 Sinlāmu ṙô chin in yip töhet tarik yip hamòl Kristū Yēsū nö im hinëngö, sinlāmu ṙô yin më hol chu prötör nö in yīö. 22 Sinlāmu ṙô yip taṙòkhöre töhet tarik nö in yīö, mötlö in yip aṅ patī ngam mahayöng.*
23 Köp an yēḵ nö in yīö ngam tökiröng miṙēḵlōn ngam Mā Yēsū Kristū kūö yīö öi hameuktö ngam tövai inlahenre. Āmen.