I minë-eny Efisös
3 Angū-ö ön lāinyngen chu, Chū-ö Pôl, öich haköövö töpòkūö Kristū Yēsū hēk töpòkūö yīö inrē öi tahëng mihëṅṙö tarik . . . 2 sön yin lohten öi hang, tö chu öich kē-ěvkūö tö ngam la-en inyōmken ngam tökiröng miṙēḵlōn ngam Tēv öich chö-öinyten tö yīö, 3 tö ngö manah, tö ngam töhet töt mikahkūö sin nö hameuknyu nö in chu, sā tī Chu ngaich öich kūichhöti inuk lā urěh. 4 Lökten yēḵ yīö öi hakööpö e min ngaich akahalōn min yī-ö tö chu öich īnu tö mikahkūöre tö ngam töhet töt mikahkūö sin inlahen Kristū. 5 Öt keuheūtlöre inmeukti ngih töt mikahkūö sin nö in yik mu-urěh tumkölchap misī, sā inlahen e töngamuh nö löktö in ngam töhet kumlēḵ nö hameuknyu nö in yip töhet tanīnöṙô hēk pròfět ò inrē, 6 tö ngö manah, tö yip tahëng mihëṅṙö tarik nö löktö im hinëngö nö in Kristū Yēsū hēk tölöök inhānga nö hol hī nö amīnuvö, hol hī nö tūmö ngam töhěng alaha hēk hol hī öi im kinlēḵngô ngam Tēv. 7 Kūö ngam tökiröng miṙēḵlōn ngam Tēv Chin öich vītöre öich mahalanṙen ngih töhet töt mikahkūö sin. Anga-aṅ kamë-ekūö chu tö ngih töt ṙāyu inlōnti nö löktö im minhôiyöre.
8 In chu chū-ö tarik öich töng manā-angkūö kanūöṅnö öich in yip töhet tarik, ngih tökiröng miṙēḵlōn nö kētu tö chu öich vë-eny nang yip tahëng mihëṅṙö tö ngam tölöök inhānga inlahen ngam töt kanṙeūken kanôlò Kristū, ngam tötkô rēhěn nö mufē hī 9 ngaich mikahtö elmat taṙòkhöre tö inlahen inlēnlö ngih töhet töt mikahkūö sin, ngam töhayūni nö inuk tö urěhangen ṙētak tö ngam Tēv ngam vamīlö në taṙòkhöre chehen. 10 Ṙën angū-ö nö ngatī inlahen, hòṅ e nö löktö in ngam māṅ töngamuh nö akahakūö më mahayöng el halīöngö hēk tö chööngūvö tö löktö ngam töt kanṙeūken mikah ngam Tēv. 11 Sā ngam tö ha-ëhelen kuilōn ò nö vīlen ngam Mā hī, Kristū Yēsū. 12 Löktö in Kristū ayī-ö öi teūngen tö öt pinhë-eṅkūöre öi ṙò-òvö ngaich kūö ngam ṙinatö-ellōn hī öi in ò öi keuheūttö ṙinatö-ellōnre öi mihôiṅ öi chuhkūö ngam Tēv. 13 Lökten Chin ngö ṙô tö yīö tö öp lāinyngen chu öich la-al në kanihngenre töpòkūö yīö, uh yī-ö öi heūlngöre, pön angū-ö min löktö inlahen yīö öi hapōilöng.
14 Angū-ö ngih inlahen Chu öich sulngöre ikūö ngam Yöng öich chö-öinyten yīö öich vë-ekūötēv, 15 ngam löktö në taṙòkhöre mikūönö nö ōt nö el halīöngö hēk ing panam inrē.* 16 Vë-ekūötēv chin, hòṅ ngam Tēv töpōyen aṅ in tö ineū-eu nö kē-ěkūö yīö tö ngam minhôiyö nö löktö in ngam töhet kumlēḵre, hòṅ ngam lamātuhēt ellōn yīö nö kalēlöre, 17 ngaich kūö ngam ṙinatö-ellōn yīö ang Kristū nö iyöng ellōn yīö, ngam tö tööḵlö tö hanangenlōn. Vë-elkui yīö chin öi aṙū-uti tī öi köptī tö ngam ṙěh ngaich iṙūöhen öi haköpngöre im machööḵlö, 18 hòṅ yīö öi akahakūö takô öi holten yip taṙòkhöre töhet tarik tö ngam ṙôktāk, rôta, rôlòng hēk ṙū-uti inrē, 19 hēk akahalōn inrē yī-ö tö ngam hanangenlōn Kristū, ngam tö mööḵlö tö ngam mikah elmat, hòṅ nup tinrīken ngam Tēv nö keuheūtlöre nö meūkö nö in yīö.
20 La-evṙen ön ngam minhôiyö ngam Tēv nö latuhēt hī ngaich nup töng havëkö hī öi in ò hēk ṙôken mufē hī ngaich mötlö ṙôken tī anga-aṅ tö u, 21 kanôlò ngam Tēv yēḵ nöng örheūheu nö söl môkö nö löktö in ngam māṅ hēk löktö in Kristū Yēsū. Āmen.