I minë-eny Filipī
1 Pôl hēk Timôtī mahalanṙen Kristū Yēsū, kūich ngih chitri chin nö lumnööṙö yip töhet tarik mi-iyöng Filipī yip mi-im hinëngö nö hol Kristū Yēsū hēk in yip minṙöinylen hēk mahayööken töla-evṙen inrē:
2 Teūngen yin yēḵ tö ngam tökiröng miṙēḵlōn hēk tö ngam lanāmö öi löktö in ngam Yöng hī ngam Tēv hēk löktö in ngam Mā Yēsū Kristū.
3 Yēḵ Chū öich afēken yīö ngaich kētö nööinyö ngam Tēvre Chū-ö 4 örheūheu Chin öich vë-elkui yīö öi ṙòkhöre öich holtö ṙanamölōnre, 5 pön hēten tö yīö öi hang ngam tölöök inhānga löktökūö in e yī-ö söl ing töngamuh öi kirööngen tī öi kētö hinòlṙen öi i ṙinūönyö ngam tölöök inhānga. 6 Ṙatö-ellōnre Chū-ö tö ngam Tēv, ngam ramnehlörit ngih tölöök la-en nö elhôi yīö hateungngen e min anga-aṅ nö söl ip sakāmö Kristū Yēsū. 7 Tölöng ngam inlahen Chu öich ngatī inlahen mufē tö yīö öi ṙòkhöre, pò chu öich kirööngen hanangenlōn takô tö yīö pòrô hòng öich haköövö öich halööki hēk vë-eny ngam tölöök inhānga hēk töm kinëtö linaklö e nö sā ṙô ngam chööngö, ṙòkhöre yī-ö öi hamòlṙen chu öi in ngam tökiröng miṙēḵlōn ngam Tēv.
8 Ngam Tēv an vamënyö inlahen Chu tö Chu öich kalē-ě lōn öich hòṅ meukkūö yīö öi ṙòkhöre, pò chu öich ngatī hanangenlōn tö yīö öich sā hanangenlōn Kristū Yēsū. 9 Angū-ö ön ngih ṙô chu örheūheu öich vë-ekūötēv tö ngam tölöng mikah elmat yīö hēk mikah nö ṙūöhölre nö holtö ngam hanangenlōn, 10 hòṅ yīö akahakūö tö minë ṙô tötṙanāngen hòṅ yīö īnu tö ngam kanô-enre öi söl ip sakāmö Kristū hēk uh yī-ö asökngö* ṙinatö-ellōn yip tahëng, 11 ngaich tööḵlö tö minë ṙòng ngam lanöökö ngam lökten yīö öi teungen öi löktö in Yēsū Kristū, hòṅ e nö nööinyö ngam Tēv hēk ineū-eu ò inrē.
12 Kahōlö, lōnu Chin tö yīö öi akahalōn tö ngih inlahen chu töngamuh löktö in e öich teūngen tö inyöökenre öich tānyö ngam tölöök inhānga, 13 ṙòkhöre më krūp yik amahtö ngam mahayöng hēk tö yik tahëng inrē nö akahalōn tö chu öich chö-öinyten Kristū öich halöökiyö. 14 Ngaich yip töngamuh nö pōyen prötör im Mā tö teūngen tö nganönöre nö löktö im inlahen chu öich haköövö ngaich ṙūöhölre inlahen hēk cha-a nö holtö öt pinhë-eṅkūöre hēk holtö öt pinyu-uṙôre nö ahangken ngam ṙô ngam Tēv.
15 Rö-ö pön kô-en nö rīkre yip tarik ma-ahangken Kristū nöng kūö kumnyah elmat hēk inrāinyngö holre inrē, rīkre pöri yip tahëng tölöökö ellōn nö ahānga. 16 Yip tölöökö ellōn nö ahānga, kūö ngam hanangenlōnre cha-a nö ahangken Kristū pò cha nö akahalōn tö chu öich tövīlöng öich lamaklen ngam tölöök inhānga, 17 rīkre pöri yip töng chö-öinytö ngam lina-alkūö nö ahānga yip tötlöökö ellōn, ṙën cha-a nö ngatī inlahen hòṅ chu öich haṙivölōn öich el chēl. 18 Asuh pöri ngaich öp ṙòng e? Höng angū-ö pòrô yip rīkre nö ötlöngö lōn hēk löökölōn ngaich höng sön nö iṙūöhen ngam inhangkö Kristū ngaich löktö in e Chū-ö öich teūngen tö ṙanamlōnre, 19 pò Chu öich akahalōn töre öich hayöökaṙen tökūö ṙô yīö öi vë-elkui chu hēk löktö im inyöökenre tö ngam töhet kumlēḵ ngam lömöktö in Yēsū Kristū. 20 Ngaich holtö ellōnre chū-ö öich meūka hēk maheūṅkku töre min öich öt sinrōngukūö öich in nup tö sitih, sā ngam töng örheūheu pöri inlahen e ngatī inlahen töngamuh nö löktö im inlahen chu öich öt pinyu-uvṙô öich ṙò-òvö nö ha-öinyö min ang Kristū, pòrô chū-ö öich kapah hēk aṅ.
21 Yěich ṙôtö ngih inlahenre, yēḵ chu öich aṅ ngaich iṙūöhen chū-ö öich la-evṙen in Kristū ngaich yēḵ chu pòrô öich kapah ngaich höng yanöölen chu inrē min angū-ö. 22 Hanöng sā Chu öich aṅ ing panam ngaich hēk min Chū-ö öich asīöp ṙòng minë la-enre, hö-ö Chin öich hòṅ vë-eny öp katöllöre. 23 Tökiröng ön nö kanihngen Chu öich katöllö lōnre öich in në tönët, höng angū-ö an ngih lōn Chu öich teūngen tö ṙinānyöre öich in Kristū pön angū-ö ngih töt insā-avö. 24 Mööḵlö pöri ngam inlahen chu öich aṅ ing panam töpòkūö yīö. 25 Kirööngen ṙinatö-ellōn Chin hēk akahalōn inrē töre min öich aṅ ngaich örheūheu min Chū-ö öich in yīö öi ṙòkhöre hòṅ yīö öi kū-ö urěh hēk ṙamölōn öi im ṙinatö-ellōn, 26 ngaich yěich hēk min öich havantenre öich in yīö ngaich ṙūöhölre min ngam ṙanamölōn yīö öi in Kristū Yēsū.
27 Ngih pöri tö hòṅ chumkūöṙen yīö tö ngam tinrīken yīö nö tö hòṅ hō-ovö* nö in ngam tölöök inhānga inlahen Kristū. Tö pòrô yēḵ Chu öich marôvat tö yīö hēk röhta, höng hòṅ angū-ö ngih ahang Chu tö inlahen yīö, tö yīö öi hēngö mufē hēk köp inrē öi ṙòkhöre ngaich ma-āinyre öi kö keunhökūö höö öi holṙenre öi chö-öinytö ngam tölöök inhānga im ṙinatö-ellōn, 28 hēk öt pinhë-eṅvkūö yī-ö tö ṙô yip lama-al, pön angū-ö ngih chö-öiny ngam inhetngö cha, inmeuktö ngam inyööken yīö pöri angū-ö nö lamöktö in ngam Tēv angū-ö. 29 Pò yīö öi kētu minlēḵken töpòkūö Kristū tö yīö rö-ö öi höng ṙatö-ellōnre pöi kihngen inrē töpòkūö ò. 30 Ngatī yin yī-ö inrē öi la-al minë kanihngenre, sā nup maheuk yīö inlahen Chu ngaich sā ahang yīö inrē tö Chu öich ṙömöng la-al minë kanihngenre.