Raneh Chitri Yik Aṅ Kòrin

7 Kētö sanapṙô nup intöönö chin, nup kahūichtö yīö öi hatöönö chu. Tölöök an öre nö in ngòh tö hěngtak kikōnyö yēḵ ò nö öt lūölkö kikānö;* 2 ngaich pöri öich meuk ngam chinô-òṅkānö* nöng chöngṙen nö in yīö, lökten hökngen ngòh kikōnyö nö pīhövö hēk hökngen ngòh kikānö nö pīhövö. 3 Hökngen ngòh kikōnyö nö kētö nup lamöö in ngam pīhöre kikānö, ngatī inlahen ngam kikānö nö kētö nup lamöö in ngam pīhöre kikōnyö. 4 Öt kanahnguṙen an ngam inpīhö kikānö nö im alahare, pön höng ngam pīhö ò kikōnyö. Ngatī inlahen ngam inpīhö kikōnyö nö öt kanahnguṙen nö im alahare, pön höng ngam pīhö ò kikānö. 5 Un harööḵngen höö tö ngam lumnööṙö, ngaich yěn chö-öinytö ngam vinë-ekūötēv pöri an ngatī inlahen, ngaich höng rahëichtakūö, yěn hō-olōn ngaich unôichrit e kò-òren nā-a an mūl, hòṅ ngam Satān nö öt kalah ngam manööyö yīö nöng halō-ongkūö yīö. 6 Höng inlēnö nun në kahëtö Chu, öt chööngö pöri. 7 Lōnu pöri chū-ö tö yīö öi sā inlahen Chu öre, kö taneūngenre pöri ayī-ö tö inlōnti aṅ im Tēv, ōt yip tö teūngen tö inlahenre nö pīhövö, ōt yip tö teūngen tö inlōntire nöng öt hòṅ pīhövö.

8 Ngö ṙô Chin ngaich in më töt hòṅ pīhövö hēk tafīösi nö tölöök angū-ö nö in cha, yēk cha nö sā inlahen Chu. 9 Ngaich yēḵ cha pöri nö ötkô nö ṙāpöre ngaich hökngen cha nö hapīhö, ěhten cha-a nöng pīhövö tö inlahen ngam kuilōn cha nöng hūṙökūö.

10 Kētö inchöngten yīö Chin yī-ö tö pīhövö, rö-ö öich Chū-ö pön ngam Mā, tö ngòh tö pīhövö kikānö nö un ṙāngö ngam pīhöre kikōnyö. 11 Yēḵ ò pöri nö ṙāngen ò ngaich un pīhövö anga-aṅ tö tahëng hēk hönglöö nöng halāmtöre nö im pīhöre kikōnyö. Ngaich ngòh inpīhö kikōnyö nö un ṙāngö ngam pīhöre kikānö.

12 Ngö ṙô pöri Chū-ö in yip tahëng, öt ngam Mā: Yěn töt ṙamatö-ellōnre ngam pīhö ngam prötör, yěn hō pöri anga-aṅ nö in ngam pīhöre kikōnyö ngaich ötkô ngam prötör nö ṙāngen ngam pīhöre kikānö; 13 yěn töt ṙamatö-ellōnre ngam pīhö ngam kikānö sön pöri anga-aṅ nö hòṅ in ngam pīhöre, ötkô ngam inpīhö kikānö nö ṙāngö ngam pīhöre kikōnyö. 14 Lökten ngam töt ṙamatö-ellōnre inpīhö kikōnyö nö kaheūkö nö töhet nö löktö in ngam pinīhö tö cha. Ngatī inlahen ngam töt ṙamatö-ellōnre inpīhö kikānö nö kaheūkö nö töhet nö löktö in ngam inlahenre nö pīhövö tö ngam prötör, pön yēḵ e öre nö öt ngatī inlahen ngaich töthet öre yip kūön yīö ngaich pöri cha-a nö het. 15 Yēḵ ngam töt ṙamatö-ellōnre pöri pīhö ò nö hòṅ haköhngenre ngaich hökngen ò më-eṅ nö kiröönngöre, pön yěn ngatī ngam inlahen ngaich öt nyëḵki ngam prötör hēk sistör tö u, tö havëtu pöri ayī-ö öi im lanāmö tö ngam Tēv. 16 Lökten Ō inpīhö kikānö, yēḵ meh öm in ngam pīhöre kikōnyö ngaich sitih mikahlōn më-eṅ töre yēḵ meh öm laklen ngam pīhöre kikōnyö? Hēk Ō inpīhö kikōnyö, yēḵ meh öm in ngam pīhöre kikānö ngaich sitih mikahlōn më-eṅ töre yēḵ meh öm laklen ngam pīhöre kikānö?

17 Sā kinë-eṅkūö ngòh tö hěngtak tö Yāvē* hēk sā invëtö ngòh tö hěngtak tö ngam Tēv, hökngen ò nö lök in e. Ngih ön ṙô Chu öich kētö chööngö öich in minë māṅ nö ṙòkhöre. 18 Ōt hòng tarik tö havëtu tö ngaich nö tunyīnyi? Ngaich hökngen ò nö im inlahare nö tunyīnyi. Hēk ōt hòng tarik tö havëtu nö töt tunyīnyi ngaich hökngen ò nö un tunyīnyi? 19 Öt tö mööḵlö ngam inlahen ngòh tarik nö tunyīnyiyö hēk yěn öt tunyīnyi, mööḵlö pöri ngam hinang chööngö ngam Tēv. 20 Sā inlahen invëtö ngòh tö hěngtak, hökngen ò nö ngatī inlahen. 21 Havëtuvö hòng hē e më-eṅ, ik hē meh öm höng mahalanṙen? Ngaich um kihngen töpòkūö e. Ngaich yěm mihôiṅ pöri öm ṙā-anyre ngaich um ṙāngenre tö e. 22 Pò ngòh mahalanṙen tö havëtu nö im Mā ngaich tö ṙānyu anga-aṅ nö im Mā hēk tarik ò inrē, ngam tö ṙānyu tarik, tö havëtu mahalanṙen Kristū anga-aṅ. 23 Tö kēnyu ṙāi yin öi havaha lökten öi ṙāngenre öi haköövö tö më tarik. 24 Kahōlö, sā invëtö yīö öi kö hěngtak, hökngen ò nö ngatī inlahen nö ikūö ngam Tēv.

25 Öt aṅhavin Chin tö chööngö aṅ im Mā i inlahen yip töt pīhövö. Vënyö ngam kuilōnre pöri chū-ö öich sā inlahen ngam tarik ngam tö hameukhumat tö ngam miṙēḵlōn ngam Mā, hòṅ chu öich kôti öich tökô-en. 26 Lökten Chin öich ngatī lōn yěich meuk në kanihngen töngamuh, tölöök pöri angū-ö nö in ngòh tö hěngtak tarik nö sā inlahen öp lōn ò tö inlahen ò, hökngen ò nö ngatī inlahen. 27 Haköpiyö öm, öm in ngam pīhöre kikānö? Ngaich um chöhtö inlahenre öm ṙā-anyre tö ò. Ṙā-anyre öm töm pīhöre kikānö? Ngaich um chöh pīhöre tö tahëng kikānö. 28 Yēḵ meh pöri öm hapīhö ngaich ötköölö fālen më-eṅ, ngaich yēḵ ngòh tö öl nö pīhövö nö hòṅ kēḵ ngam pinīhö ngaich öt tökööl inrē angū-ö. Sön pöri ngòh tö pīhövö min nö kihngen nö im alaha. Hòṅ laklen meh chū-ö tö u.

29 Kahōlö ngö ṙô Chin inrē öich in yīö, ngam tö ōttit ṙētak ngaich nö hakūöṅni rôḵtòng. Lökten yip tö pīhövö tö kikānö, hökngen cha nöng sā inlahen yip töt pīhövö tö kikānö, 30 ngaich yip pameuiny, hökngen cha nö sā inlahen töt pameuiny, yip töṙamölōn, hökngen cha nöng sā inlahen yip töt ṙamölōn, hēk yip mi-inyīha, hökngen cha nöng sā inlahen töt mi-inyīha, 31 yip töpōyen yanöölen pöri nö löktö ing panam, hökngen cha nöng sā töt keuheūttöre yanöölen nö in e, pò ngih panam ngaich nöng haṙīköre mineūkö. 32 Kô-en, Chin öich lōnu tö yīö öi luhnyöre tö minë mufēre, örheūheu ön ngòh töt pīhövö kikōnyö nö fēkö minë inlahenre nö löklōn ngam Mā, nö sitih inlahen anga-aṅ nö haṙamlōn ngam Mā. 33 Örheūheu pöri ngòh tö pīhövö kikōnyö nö fēkö minë ṙô ngih panam, nö sitih inlahen nö haṙamlōn ngam pīhöre kikānö, 34 ngaich sā tö nëttit inlahen anga-aṅ. Hěnghöre, örheūheu më töt pīhövö hēk töt chô-òvö rēlö nö fēkö inlahenre nö löklōn ngam Mā, hòṅ ò nö het nö im alahare hēk ellōnre inrē. Örheūheu pöri nöng fēkö minë ṙô ngih panam ngòh tö pīhövö kikānö nö sitih inlahen nö haṙamlōn ngam pīhöre kikōnyö. 35 Chö-öinytö yanöölen yīö pöri Chū-ö öich ngatī ṙô, rö-ö öich hakihten yīö,* rö-ö chin pöich ṙūöhöl alaha yīö tö minë tölöök la-en, hòṅ yīö öi iṙūöhen löklōn ngam Mā öi öt sanānnguṙen.

36 Yěn ngö lōn pöri ngòh töt pīhövö tarik töre nö ötlöngö inlahen hēk yěn tôḵngö ngam ṙēḵti ò nö ṙālö ngaich mihôiṅ anga-aṅ nö pīhövö. Öthō min anga-aṅ nö köölö fālen mihôiṅ nö hapīhö yip tö ngatī inlahen. 37 Yěn ōt pöri mahalēnngö ellōnre nö öt hòṅ pīhövö hēk köp inrē nö in ngam fëslare, pön akahaiṙen anga-aṅ töre nö mihôiṅ nö öt pīhövö hēk mihôiṅ inrē anga-aṅ nö ṙap nup kuilōnre, ngaich tö vāyö inlahen anga-aṅ. 38 Rö-ö pön vāyö inlahen ngòh tö pīhövö, mööḵlö vanāiyö inlahen pöri ngòh töt pīhövö.

39 Haköpiyö ön ngòh inpīhö kikānö nö im pīhöre kikōnyö yēḵ ò nö ṙömöng aṅ, yēḵ ngam pīhö ò pöri kikōnyö nö kapah ngaich mihôiṅ anga-aṅ nö pīhövö tö tahëng pön luhnyu nö im pinīhö, höng in ngam Mā pöri. 40 Ngih pöri mufē chu tö ò nö mötlö ṙanamölōn yēḵ ò nö sā ngam inlahenre. Ṙatö-ellōnre Chin tö ngam töhet kumlēḵ ngam Tēv nö tölṙô Chu öich ṙôten në ṙô.