Innëtö Chitri Yik Aṅ Kòrin
6 Holṙen ngam Tēv chin öich la-evṙen öich hòṅ aṙētu ṙô inrē tö yīö, unôichrit inlahen yīö öi hō-en ngam tökiröng miṙēḵlōn ngam Tēv, ui vaichngö tö ngam chö-öiny e. 2 Pò ò nö ngö ṙô: “Hē ṙētak yīö hō-ovö hang ṙô yīö chū-ö, ngaich hayööken yīö hē ṙētak ngam inyööken.” Yěh meuk! Ngaich ön töngamuh nö ṙētak töhō-ovö. Yěh meuk! Ngaich ön töngamuh nö sakāmö inyööken.
3 Hö-ö in chö-öiny lökngö fanukngö i tökeuheūttöre, hòn ötkôti minë la-en ih nö fāluṙen; 4 i tökeuheūttöre in öi hameuktöre öi mahalanṙen ngam Tēv pītnyöre öi la-al minë kanihngenre öi holtö manööyö, i kanihngen, i hanakten hēk holtö kanihngen, 5 fōho, hachēlhötvö el chēl, la-al minë tinṙōlen, pītnyöre öi kalēḵ alaha, ahaṅti el hatööm, ha-euk höng öt nyā-avkūö; 6 im hanëtö, mikah elmat, manööyö, miṙēḵlōn hēk im töhet kumlēḵ, im hanangenlōn töt mahanyatkö elmat, 7 ṙônyö nup tökô-en öi löktö i kumlēḵ ngam Tēv, kēken ngam aṅhtī ngam lanöökö lahāmö* hēk lātavē,* 8 ṙētak minlēḵken hēk minṙēḵngö hēk hē ṙētak inhangkö ih in minë tölöng hēk tötlöng, kaheūkö īhö mahachīl, tökô-en pöri īhö, 9 sā töng öt akahka in, sön pöri öi pōyen inkahka, hòṅ kapah in* yěh meuk pöri! tö ih öi aṅ, sā ṙēngen yip tökētu sācha in, hö-ö pöri öi kētu öi eltī ngam kinpaha, 10 sā yip tö haṙivlōn in örheūheu pöri öi ṙamölōn, sā yip yāich in, sön pöri öi vīten taṙòkhöre nö kòlô, sā ṙēngen yip töt aṅhavin, sön pöri öi sā yip töpōyen aṅ in.
11 Yī-ö aṅ Kòrin, keuheūtnyö ṙôre in öi vë-ekūö yīö, ṙūöhnyö ṙôkö në ellōn inrē töpòkūö yīö. 12 Öt hayunngen ngam hanangenlōnre īhö tö yīö ngaich pöri yī-ö öi piyū-en öi hameuktö ngam hanangenlōnre. 13 Lökten chin öich sā kūönre lōn öich tölṙô yīö öi ṙūöhnyö ṙôkö ngam ellōnre.
14 Un haṙongtö kaneunre i töt ṙamatö-ellōnre. Sitih innôlta ṙöng ngam lanöökö nö im öt lanöökö? Hēk sitih inmūlti ngam hanātö nö im sinngūlö? 15 Hēk asuh öp tö ṙongta nö ihôi Kristū tö ngam Satān?* Hēk asuh öp tö ṙongta nö ihôi ngam ṙamatö-ellōnre* tö ngam töt ṙamatö-ellōnre? 16 Ngaich asuh öp la-en minë insātēv nö el patī ngam Tēv? Pò hī ayī-ö öi patī ngam tö aṅ Tēv sā ṙô ngam Tēv nö ngö ṙô, “Iyöng chin min öich elhôi cha hēk havötköre öich elhôi cha ngaich vītöre min chū-ö öich Tēv cha ngaich örheūheu min cha-a nö tarik chu.” 17 “Ngö ṙô ang Yāvē,* ‘lökten yin kunyī-inyre ṙā-ang in e ngaich haköhngenre tö cha hēk un lūölkö töchōich ngaich kē-ě yīö min chū-ö öich in re tī.”’ 18 “Ngö ṙô ang Yāvē* ngam Tēv tökalēḵ kūö tökalēḵ, ‘vītöre chū-ö min Yöng yīö ngaich vītöre min yī-ö öi kūön chu kikōnyö hēk kikānö.”’