Inlahen La-en Yik Tanīnöṙô
5 Inyihngö ök tumlat re inrē ök tö hěngtak tarik tö Ananī minënyi, tö ök pīhö ò inrē Sappīra. 2 Ulāiykenre pöri ang Ananī nö haròngtö ṙāi ök tumlat ngaich in re tī, akahalōn inrē ök pīhö ò, höng haròngtö kahëtöre pöri cha-a nö iröön yik tanīnöṙô. 3 Ngö ṙô ngaich ang Pītör: “Ananī, kūö yòh ang ngam Satān nö vīhöt ellōn meh öm minyônyaṅ in ngam töhet kumlēḵ öm hayunkenre öm ulāiyngö ṙāi tumlat öm in re tī? 4 Hē ngam tumlat sin nö in meh, hö-ö hòng angū-ö nö tumlat meh? Ngaich unôichrit inlahen meh öm havahngen e, hö-ö hòng inrē nuk ṙāi e nö amin meh? Ngaich kūö yòh më-eṅ öm fēkö ngih tö ngatī la-en öm ellōnre? Hö-ö man minyônyaṅ öm ikūö vē tarik, pöm in ngam Tēv inrē.” 5 Fukngö ngaich ang Ananī hē ò nö hangṙô ò ngaich kapah. Ngaich pa-ekūö takô inrē yik tarik hamang inlahen e. 6 Ōtre ngaich yik ṙāl tarik chamòhòlre nö haṙūngö ò nö el hilā ngaich kēnyen ò nö lātunyī ngaich lāpngen ò.
7 Lohten nö unôichrit tö lūöi kanta ök pīhö ò nö chuh muh, ngaich öt akahakūö anga-aṅ tö inlahen cha nö umuh. 8 Ngö ṙô ngaich ang Pītör nö in ò: “Vë-eny nang chu man, höng ngatī ṙôken ṙāi tī hòng nā-a an inyihngen ök tumlat?” Ngö ṙô anga-aṅ: “Heūṅ, höng ngatī ṙôken ṙāi tī an inyihngen e.” 9 Ngö ṙô ngaich ang Pītör nö in ò: “Kūö yòh an holṙenre an kalah ngam töhet kumlēḵ Yāvē?* Yěh meuk! Höng ikūö inkūp yin vē lamāpngö ök pīhö meh, ngaich yin inrē min nö keunnyen meh.” 10 Im hē e ngaich anga-aṅ nö fukngö nö iröön ò ngaich kapah. Hē yik ṙāl tarik nö kuhēthötre ngaich meūkö ò cha-a nöng kapah, keunnyen ò ngaich cha-a nö chuh lātunyī ngaich lāpngen ò nöng in ök pīhö ò. 11 Ṙòkhöre nö pa-ekūö yik aṅ el ngam māṅ hēk yik hamang ngih inlahngen inrē.
12 Höng iṙūöhen yik tanīnöṙô nö la-evṙen tö minë la-en pinngangkūö nö elhôi yik tarik, ṙòkhöre cha-a nöng hamūlöre misī nö el ngam Varanta Sòlòmön tö Kampavö. 13 Öt hěngtak misī in cha tökô nö hamūltöre nö in yik mahaköp, sön pöri yik tarik nö eū yik mahaköp. 14 Höng iṙūöhen sanīöplöre ṙôken inrē yik kikōnyö, kikānö nö in cha, yip ṙamatö-ellōnre nö im Mā. 15 Uroh ngaich cha-a nö keunnyen yik tövāhavö nö el ök tökiröngti talöktu ngaich hulalngen cha nö el nuk chatrāi hēk pistara inrē, pön hōtu öp nyat Pītör nö hanyattö kui cha yēḵ ò nö lökngö muh. 16 Höng yīhökūöre yik tarik lamöktö in nuk panam tö röhta nö i Yērūsalem nö kumten yik tövāhavö hēk yik tö hachëika inrē tö yik tötlöök ma-ahānga ngaich ṙòkhöre cha-a nö lööken.
17 Rāinyngö pöri ök mākūö kūönṙô, ṙòkhöre inrē tö yik mi-in ò, yik krup yik Satukī hē u anū-ö ṙētak. 18 Kēḵ yik tanīnöṙô ngaich cha-a ngaich hachēlhöt cha. 19 Löpnyökūö inkūp ök chēl pöri ök ma-ahānga Yāvē* tö hatööm, ngaich kēnyen cha nö lātunyī ngaich ngö ṙô: 20 “Kuṙòh ngaich kiröönngöre iṙūöhen ahangkö inlahen ngam nômö in yip tarik el chūök vinë-ekūötēv.” 21 Lökten ngaich cha-a im minlīlö ngam peuheū nö chuh el chūök vinë-ekūötēv nö haköphöti.
Hē ök mākūö kūönṙô tö yik hol ò nö yih ngaich hamūl yik kamhôka hēk tökiröng mākūö yik tarik i Israel anga-aṅ, ngaich tīnngen yik amahati nö kē-ěren yik tanīnöṙô nö ṙā-ang el chēl. 22 Hē yik amahati pöri nö teung nö umuh ngaich meūkö cha nö hö-övö nö el chēl. Lökten ngaich cha-a nöng havan ngaich vë-eny nang cha nö ngö ṙô, 23 “Meuk ngam chēl īhö nöng öphakkūö inkūp ngaich yip amahati inrē nöng sökhak nö in e, hē ih pöri öi löpnyökūö inkūp ngam chēl ngaich öt maheūku īhö tö tarik nö lātuhēt.” 24 Hē ök mākūö yik amahtö ngam chūök vinë-ekūötēv hēk yik mākūö kūönṙô nö hāngö e, höng katööngaṙen cha-a, pön öt akaha elmat töp inlahen e min hēk. 25 Hěngtak pöri ngaich ök yamihtöre nö vë-eny nang cha nö ngö ṙô: “Yěh meuk! Yip tarik tö chaphötvö sin nö el chēl tö yīö, höng el chūök vinë-ekūötēv yip nöng sökhak nö haköpten yip tarik.” 26 Kiröönngöre ngaich ngam yöngṙen kumyung nö holten yik tarikre ngaich kumten cha nö kē-ě cha, hö-ö pöri cha-a nö pītlö alaha cha, pön vöö cha-a tö yik tarik yěn aṅhtī tö ihong min nö fëlngen cha.
27 Kumten yik tanīnöṙô cha-a ngaich asöklen cha nö ikūö yik kamhôka. Hatöönö cha ngaich ök mākūö kūönṙô 28 nö ngö ṙô: “Ngaich chin vahë öich kētö chööngö in yīö, öi ṙāngenre haköphöti i ngih minë-eny, yěh meuk pöri tö yīö öi hatööḵlen Yērūsalem tö minë ṙôre öi haköphöti ngaich pöri yī-ö öi halēnngö ellōnre öi hòṅ ikui ih tī tö ngam mahām ngam tarik.” 29 Ngö ṙô ngaich ang Pītör tö yik tahëng inrē tanīnöṙô: “Hòṅ hang chööngö ngam Tēv in ngam rācha ih, mööḵlö tö chööngö tarik. 30 Ök tö kilöllöng nö irōi chōn nö fëliyö tö yīö ang Yēsū, ngaich ök nö hachohlöng tö ngam Tēv yik muvöhngö ih. 31 Anga-aṅ an tö hapōilöng chūök tö ngam Tēv nö mahachō-okūö hēk mahayööken ngaich ha-ūichlen ò nö lāhāmöre tī, hòṅ yip Israel nö havöötö ellōnre ngaich teūngen tö inṙē-ěl tököölre. 32 Ṙòkhöre in īhö öi vamënyen e, ngam töhet kumlēḵ inrē, ngam kahëtö ngam Tēv nö in yip tarik, yip hamô-en ò nö rācha re ngaich hang chööngö ò.”
33 Hē cha ngaich nö hāngö e, hūlökūö tanāinyö ngaich cha-a ngaich hòṅ fëlngen cha. 34 Hěngtak ngaich ök Feresī samöklöre nö el ngam chūök Kamhôka ök tö Kamli-ěl minënyi, mahaköptö minë Chööngö anga-aṅ, tökirööngen minlēḵken inrē anga-aṅ tö yik tarik, kētö chööngö anga-aṅ nö in më tarik, tö cha sin nö rahëichtakūö nö yôknyi nö chuh lātunyī. 35 Ngö ṙô ngaich ang Kamli-ěl nö in cha: “Yī-ö tarik aṅ Israel, öp inlahen lōn yīö tī yīö öi in vē tarik, haṙēmngenre yin. 36 Öt marô-angen ök sakāmö inlahen Tiūtas nö söklöre nö ngö ṙô nö vë-enyre, tö kamngu chin chū-ö. Ngaich lohten nö 400 ṙôken yik kikōnyö mahanôlhötre nö el ngam krup ò. Fëliyö pöri anga-aṅ ngaich ṙòkhöre yik ṙamatö-ellōnre nö in ò nö parātiyö. 37 Unôichrit e ang Yūta ngam aṅ Kelelī nö söklöre hē ṙētak kinūichtö minë-eny ngaich halō-ongkūö yik tarik anga-aṅ nö tömrit ò. Ngaich pöri inrē anga-aṅ nö ahetiyö ngaich ṙòkhöre yik ṙamatö-ellōnre nö in ò nö parātiyö. 38 Lökten Chin öich ngëichkö ngih ṙētak öich ngö ṙô öich in yīö, uh yin öi asökngöröön ngih la-en vē tarik, hökngö öptöng inlahen cha. Pön yēḵ e öre nö tö vīlöng hēk lamöktö i tarik nö la-en, ngaich ahetiyö min angū-ö, 39 yēḵ e pöri nö lamöktö in ngam Tēv nö la-en ngaich ötkô min yī-ö öi ahetngen e. Ui höng vamītöre min öi lama-al ngam Tēv.” 40 Hō-en nuk ṙô ò ngaich cha-a ngaich havëten yik tanīnöṙô ngaich fōho cha hēk kētö chööngö cha nö ṙāngenre nö haköphöti nö i minë-eny Yēsū, hökiṙen ngaich cha-a nö kiröönngöre.
41 Höng holtö ṙanamlōnre ngaich cha-a nö kiröönngöre nö ṙā-angkūö ngam chūök kamhôka, pò cha nö ötlēḵkaṙen nö i minë-eny Yēsū. 42 Kaheuk sakāmö cha-a nö chuh el chūök vinë-ekūötēv ngaich iṙūöhen inrē nö chuh kūö patī nö haköphöti hēk vënyö ngam tölöök inhānga inrē inlahen Kristū, Yēsū.