I minë-eny Rōma
15 Lökten ayī-ö tö ngön öi im ṙinatö-ellōn öi hòṅ lōnu töre öi keun öt kumlēḵ-en yip töt ngön, rö-ö öi höng fēkö ngam inlahenre öi haṙamlōnre. 2 Hòṅ haṙamlōn yip holre in, hòn lökten in e yip hol hī nö yöölen hēk ngön inrē. 3 Lökten, ngatī inlahen ök inrē Kristū nö öt höng haṙamngölōnre, sā kinūichngö e nö ngö: “Yip töt lamëken meh, fuk in chu nun minë ṙô cha nö ötlēḵken meh.” 4 Minë tö urěhangen kinūichngö ṙô, ṙën anū-ö nö kūichiyö, hòṅ hī öi haköplu in u ngaich löktö in ngam līpöre öi teūngen tö inyöökenre öi hamööyöre hēk teūngen inrē tö inreuskö alahare, hòṅ hī öi maheūṅkkuvö. 5 Kē-ěkūö yīö ön yēḵ tö inkôlò ngam Tēv kamëtö manööyö hēk inreuskö alaha, hòṅ yīö öi sā mufē Kristū Yēsū hēk sā tinrīken ò inrē. 6 Hòṅ yīö öi ṙòkhöre im hinëngö hēk hēngö ṙô* inrē öi ha-öiny ngam Tēv ngam Mā hī Yēsū Kristū ngam Yöng ò inrē.
7 Lökten sā Kristū nö hō-en hī,* ngatī inrē yī-ö hō-en höö,* hòṅ e nö nööinyö ngam Tēv. 8 Ngö ṙô Chin tö Kristū nö mameukṙen yip tö tunyīnyiyö, hòṅ cha nö eūken ngam Tēv nö tökô-en hēk ṙatö-ellōnre inrē tö minë kinlēḵngô ò nö in yik muvöhngö cha nö tökô-en anū-ö, 9 hēk ṙënten inrē angū-ö nö ngatī, hòṅ vē tahëng mihëṅṙö nö ha-öiny ngam Tēv tökūö ngam neūkölōn ò. Sā kinūichngö e nö ngö: “Lökten Chin elhôi minë pumnāmö öich ha-öinyö meh ikūö yip tömaṙôngö hēk tikökṙôre inrē Chū-ö öich ha-öiny ngam minënyö meh.” 10 Ngö ṙô hēk anga-aṅ: “Yī-ö panam, hanôltö ṙanamölōnre yin in më tarik ngam Tēv.” 11 Ngaich ngö ṙô hēk anga-aṅ: “Yī-ö taṙòkhöre pumnāmö, ha-öinyö Yāvē* yin hēk tikök nööinyö ò inrē yī-ö taṙòkhöre tarik.” 12 Ngö ṙô hēk ang Isayā: “Löklö in Yēsī öp min ṙěh nö vī-ilre, tö ngö manah öp chamòhòlre min nö hayöng minë panam hēk in ò maheūṅkkö inrē min minë panam.” 13 Ngih ön havëkö chu in ngam Tēv kamëtö maheūṅkkö nö kē-ěkūö yīö tö ngam tökiröngen ṙanamölōn hēk lanāmö, pò yīö öi ṙatö-ellōnre in ò ngaich ngatī inlahen ngam maheūṅkkö yīö nö iṙūöhen nganönlöre nö löktö i minhôiyö ngam töhet kumlēḵ.
14 Kahōlö, ṙinatu-ellōn Chin tö inlahen yīö öi tööḵlö tö ngam lanöökö hēk mikah hēk īnu inrē tö heuneū-enre öi halēnö* höö. 15 Sön pöri nö ōt nup ṙô tö lööknyi kinūichti tö Chu, hòṅ chu öich fēḵlen yīö tö nup ṙô, pò ngam Tēv nö hameuktö ngam tökiröng miṙēḵlōnre nö in chu, 16 ṙënten ngam tökiröng miṙēḵlōn nö ikui chu, pò chu hōtu mameukṙen Kristū Yēsū öich chö-öinyten më tahëng mihëṅṙö. Töla-evṙen Chin tö ngam tölöök la-en inhangköm tölöök inhānga ngam Tēv, hòṅ yip tahëng mihëṅṙö nö sā inlahen nup tökētu nup töhō-ov tö ò hēk kaheūkö inrē nö töhet nö löktö in ngam töhet kumlēḵ.
17 Lökten nup töng nôlta ṙô inlahen chu i linökölōn ngam Tēv, eū-eure chū-ö öich mahaköp in Kristū Yēsū. 18 Nup la-en Kristū nö löktö in chu, höng anū-ö vahënyö inlahen chu ngaich öt hòṅ ṙò-òvö hēk Chū-ö öich vë-eny inlahen nup tahëng. Löktö in chu tī ang Kristū nö la-evṙen, hòṅ më tahëng mihëṅṙö nö vītöre nö hamang chööngö, löktö i minë ṙô chu hēk minë la-en, 19 hēk pinngangkūö hēk löktö i kumlēḵ minkahngö minë la-en hēk löktö i minhôiyö ngam töhet kumlēḵ inrē. Löktökūö Yērūsalem Chin söl Illirikum öich keuheūtngöre chūök ahangköm tölöök inhānga inlahen Kristū. 20 Kô-en, ngatī inlahen ngaich Chū-ö öich halēnngö inlahenre öich öt hòṅ chuh in minë kamngö öich ahangkö ngam tölöök inhānga ichūök ngam minë-eny Yēsū nö ngaich nö ahangka, hòṅ chu öt asöklö ngam machööḵlö öich ichūök rööntö machööḵlö yip tahëng, 21 lökten chū-ö öich asā ngam tökūichiyö ngatī inlahen öich vī ngam chö-öinyre, ngam tö ngö: “Yip töt akahakūö tö inlahen ò, meūkö ò yip min hēk akaha elmat yip min, yip tö öl nö hang.”
22 Lökten Chin öich ṙōlheuh öich asökiröön öich chuh in yīö. 23 Öt ōt tit pöri ngaich nup chūök in minë kamngö, öp chūök ngam inhānga nö öt teung, ṙōl* samyeūheu inrē Chū-ö sin öich hòṅ kapahare öich chuh in yīö. 24 Lökten Chin öich meūka, hē chu min kiröönngöre chuh Ispēn ngaich el talöököre min Chū-ö öich meukkūö yīö, ṙahëichtakūö min Chū-ö haṙamngölōnre öich in yīö ngaich vai rôvat min yī-ö öi söömngörit chu. 25 Hòṅ kiröönngöre pöri sin Chū-ö öich chuh Yērūsalem öich meukṙen yip töhet tarik. 26 Yip yāich aṅ in yip töhet tarik i Yērūsalem, holtö ṙanamlōnre më mi-iyöng Maketònī hēk Akāya nö meukṙen* cha nö keuheūttö minë kanôlò re. 27 Kô-en yik nö teūngen tö ṙanamölōnre nö kē-ěti, pò cha inrē nö hötṙehevö nö in më töhet tarik, pò nup taneūngen më töhet tarik nö in ngam Tēv ngatī inrē anga-aṅ nö kē-ěkūö më tahëng mihëṅṙö, lökten inrē angū-ö nö la-en cha nö meukṙen* më töhet tarik tö nup nyā-aṅkūö hēk chehen. 28 Lökten, yēḵ Chu min keuheūten tö ngih la-en ngaich unôichrit inlahen chu min öich hateungten në kòntripiūsön öich in cha, ngaich lök in yīö min Chū-ö öich chuh Ispēn. 29 Ngaich akahalōn Chū-ö, yēḵ chu min öich chuh in yīö ngaich kumtö nup tö pōyen inkôlò min Chū-ö lamöktö in Kristū.
30 Kahōlö, ngam ṙinatö-ellōn yīö öi in ngam Mā hī Yēsū Kristū hēk ngam töhet kumlēḵ vamītö ngam hanangenlōn nö in yīö, angū-ö lāinyngen chu öich ṙūöhöl alaha yīö öi iṙūöhen holtö ellōnre öi vë-elkui chu in ngam Tēv, 31 hòṅ ngam Tēv nö laklen chu öich eltī më töt ṙamatö-ellōnre aṅ Yūta ngaich hō-en ngam la-en chu yip töhet tarik aṅ Yērūsalem, 32 hòṅ chu öich holtö ṙanamölōnre öich chuh in yīö öich löktö i kuilōn ngam Tēv ngaich teūngen min Chū-ö tö raneuslö alahare yěich hanôlö yīö. 33 Vë-elkui yīö chin öich in ngam Tēv kamëtö lanāmö, hòṅ ò nö in yīö öi ṙòkhöre. Āmen