I minë-eny Heprāi

5 Tökē-ě yin vē mākūö kūönṙô nö ṙā-ang i tarik, tövīlöng anga-aṅ nö mahalanṙen ngam Tēv töpòkūö yip tarik, hòn kamëtö tökētu anga-aṅ nup tökētu nö inṙē-ěl nup tökööl. 2 Tö hòṅ heuveū anga-aṅ nö hameuktö miṙēḵlōnre* nö i tarik yip* töt tamölngenre nö vaichköre inlahen, pò ò inrē anga-aṅ nö la-al minë öt kumlē-enre,* 3 lökten inrē anga-aṅ nö kētö tökētu nö chö-öinyten nup tököölre, sā inlahen ò nö kētö tökētu nö chö-öinytö tökööl yip tahëng.

4 Öt hěngtak tarik töng kamnahngenre nö teūngen tö ngam kamngö chūök minlēḵkenre yēḵ ngam Tēv pöri nö vīlen ò ngaich möl min anga-aṅ nö teūngen nö sā inlahen Āròn misī nö vīlöng. 5 Ngatī inrē ang Kristū nö öt kahngenre nö teūngen tö ngam kamngö mākūö kūönṙô nö chö-öinytö ngam ineū-eure, pön ngam Tēv kamëtö ineū-eu ò, ngam tö ngö ṙô nö in ò: “Më-eṅ man kūön chu ngaich töngamuhten Chū-ö öich yöng meh.” 6 Ōt hēk öp kamngö chūök ṙô ò nö ngö ṙô: “Më-eṅ man tö sā Melkisitĕk öm kūönṙô hēk më-eṅ inrē töng örheūheu kūönṙô.”

7 Hē Kristū misī nö aṅ nö ing panam ngaich pōitô anga-aṅ nö peuinyhökūö ngam Tēv hēk havëkökūö ngam Tēv ngam tö mihôiṅ nö laklen ò tö ngam kinpaha ngaich hāngö ṙô anga-aṅ kūö ò nö tö pa-ekūö tö ngam Tēv. 8 Pōyen nuk kanihngen ò pòrô anga-aṅ nö kūön ngam Tēv, sön anga-aṅ nö harūnöre nö hang chööngö. 9 Ngaich unôichrit ò nö het* ngaich kē-ěvkūö anga-aṅ tö ngam la-enre nö kē-ěkūö yip tarik tö ngam tö örheūheu inyööken yip hamang chööngö ò. 10 Pò ngam Tēv nö vīlen ò nö mākūö kūönṙô, hòṅ ò nö sā inlahen Melkisitĕk nö kūönṙô.

11 Pōyen nup inlahen ò tö hòṅ vënyu tö ih nö in yīö, kihngen pöri öi mikahtö elnang yīö tö u, pò yīö öt ilööṙen öi hāngö u. 12 Ngaich yin öre töngamuh* öi tö hòṅ heuveū-en öi haköptö yip tahëng ngaich pöri yī-ö öi hòṅ urööṙen öi haköptu tö minë töhet ṙô ngam Tēv öi löktökūö in minë ranehlö ṙô mahaköp ngaich hòṅ hēk yī-ö öi hòṅ òk tūt, ötkô öi nyā nup töngëḵ nyā-aṅkūö. 13 Yip töng hòṅ òk tūt, öt akahakūö cha-a tö ngam ṙô ngam kanô-en, pò cha nö ṙömöng nyīö. 14 Nyā-aṅkūö tökiröng pöri minë töngëḵ nyā-aṅkūö, yip yamūs ngam kumlēḵ ngam mikah elmatre nö harūnöre nö akahakūö tö inrīkngöre nup tölöng hēk tövaich.