I minë-eny Rōma
1 Chū-ö Pôl, tö hěngtak chin öich mahalanṙen Yēsū Kristū, kūich ngih chitri yīö chin. Havëtu chin öich tanīnöṙô hēk vīlöng öich ma-ahangkö ngam tölöök inhānga ngam Tēv. 2 Ngih tölöök inhānga tökilē-ěyö misī tö ngam Tēv nö urěhngöre nö imat minë töhet Līpöre nö lökten in yik pròfět ò. 3 Ṙô tö inlahen ngam Kūön ò ön ngih tölöök inhānga ngaich löktö im mikūönö* Tāvit anga-aṅ nö yih nö alaha tö alaha tarik. 4 Hē ò pöri nö hachohlöng nö ṙā-ang in yip tökapah nö löktö im minhôiṅyö ngam töhet kumlēḵ, ngaich kaheūkö anga-aṅ nö Kūön ngam Tēv. Anga-aṅ an Mā hī Yēsū Kristū. 5 Löktö in ò ayī-ö öi teūngen tö ngam tökiröng miṙēḵlōn hēk tö ngam la-en tanīnöṙô, hòṅ minë taṙòkhöre pumnāmö nö ṙatö-ellōnre hēk hang chööngö ò inrē, hòn löktö in e ngam minë-eny ò nö hapōilöng. 6 Kaheukhötre yin yī-ö inrē öi in në pumnāmö, öi tö havëtu öi tarik Yēsū Kristū. 7 Chū-ö Pôl öich kamūich chitri yīö öi ṙòkhöre yī-ö öi mi-iyöng Rōm, öi tö hanghuṙen tö ngam Tēv hēk tö havëtu öi töhet tarik ò:
Teūngen yin yēḵ tö ngam tökiröng miṙēḵlōn hēk lanāmö öi löktö in ngam Yöng hī, ngam Tēv hēk ngam Mā Yēsū Kristū.
8 Ha-öiny ngam Tēv re chin öich lökngörit in Yēsū Kristū nö chö-öinyten tö yīö öi ṙòkhöre, pò ngam ṙinatö-ellōn yīö nö kakka nö keuheūtngöre chūök nö ikūö ngih panam. 9 Ngam Tēv ngam lahöklōn chu öich holtö ellōnre öich la-evṙen tö minë tölöök la-en ò hēk ahangkö ngam tölöök inhānga inlahen ngam Kūön ò, anga-aṅ an vamënyen chu öich sitih inlahen öich örheūheu öich fēken yīö yěich vë-ekūötēv. 10 Ngaich hòṅ aṙētu ṙô Chū-ö öich chöh tö inlahenre töngamuh öich chuh in yīö yēḵ e nö kuilōn ò. 11 Tön paṙūtalōn chin hòṅ meukkūö yīö, hòṅ chu öich kē-ěkūö yīö tö ngam inkòlô* lamöktö in ngam Tēv, hòṅ yīö öi ngönlöre alaha. 12 Hēk ngö ṙô öre tö hī öi hòṅ hareuskö alaha höö öi im ṙinatö-ellōnre.
13 Öt lōnu pöri Chū-ö prötör tö yīö öi öt akahalōn tö inlahen Chu öich ṙōlheuh lang öich chuh in yīö, hòṅ Chu öich teūngen tö nup tövai ṙòngre öich elhôi yīö öich sā inlahenre öich in yip tahëng pumnāmö. Ṙömöng söl ing töngamuh pöri chū-ö öich asökiröön. 14 Hötṙehev Chin in më aṅ Krīk hēk in yip töt aṅ Krīk, in yip tö akaha hēk töt akaha inrē. 15 Lökten chin öich kapahare öich vë-eny nang yīö tö ngam tölöök inhānga öi mi-iyöng Rōm. 16 Öt sirōngkūö chin ahangkö ngam tölöök inhānga, pò e nö minhôiṅyö ngam Tēv im inyööken nö in cha nö ṙòkhöre yip ṙamatö-ellōnre, urěh nö in yik Yahūti ngaich hēk nö in yik aṅ Krīk. 17 Pò ngòh ṙamatö-ellōnre nö löktö in ngih tölöök inhānga nö hameuktö ngam lanöökö ngam Tēv ngaich löktö in e ngam ṙinatö-ellōn cha nö ngönlöre, sā kinūichngö e nö ngö: “Ngòh tölöök, aṅ min anga-aṅ nö löktö im ṙinatö-ellōnre.”
18 Yip tarik töt vamë-ekūö ngam Tēv hēk yip tötlöök tarik tö vaichö tī nö tīptö kui ngam kanô-en, löktö el halīöngö ön min ngam tanāinyö ngam Tēv nö hameuktu nö ikui cha nö ṙòkhöre. 19 Lökten nup tö hòṅ mikahkūö hī inlahen ngam Tēv nö hameuktu nö elhôi cha, pò ngam Tēv nö hameukten e nö löktö in cha. 20 Lööknyi mineūkö nun minë töt meūkö tinrīken ò hēten tö vinīlö ngih panam, ngam tö ngö tö ò nö aṅhavin tö ngam töt chanuhuvṙen kumlēḵ ngaich anga-aṅ inrē tö kô-en nö Tēv, mihôiṅ in akahakūö tö minë tinrīken ò öi löktö in minë vahīlö ò, lökten cha-a nö öt aṅhavin tö chö-öinyre nö öt ṙatö-ellōnre nö in ngam Tēv. 21 Pò cha sin nö akahakūö tö ngam Tēv, hö-ö pöri cha-a nö haṙōilen ò ngam tö hòṅ inlahen cha öre, ötrēhěn nö ha-öiny nup tī ò pön öt īnu cha-a tö mikahre hēk fēkö minë ṙô cha-a tö tööḵlö tö ötlanöökö, tööḵlö inrē ngam töt akaha ellōn cha tö sinngūlö. 22 Eū-köre cha-a nö tö akaha, vītöre pöri cha-a nöng töng kulō-ov. 23 Ngaich öt ha-öiny ngam Tēv cha-a ngam töt kinpahavö, ha-öiny minë insā tarik pöri, chehechōn, töṙeūla töfënö kalröön hēk nup töng ṙameulköre inrē.
24 Lökten ngam Tēv nöng ṙāngen cha nö la-evṙen tö minë tötlöök la-enre nöng asā minë tötlöök elkuilōnre hòṅ cha nö ötlēḵken ngam alahare. 25 Ṙatö-ellōnre pöri cha-a nöng in minë töng minyôiny ngaich öt ṙatö-ellōnre nö im kanô-en ngam Tēv, höng ha-öiny hēk vë-ekūö minë töng vīlöng pöri cha-a, öt vë-ekūö ngam vamīlen u pöri. Örheūheu an yēḵ ngam Vamīlen u nö ha-öinyö. Āmen. 26 Höng ṙāngen yip tarik ngam Tēv hòṅ cha nö hateungngen minë tötlöng kuilōnre, pò më kikānö nö ṙāngenre tö ngam tö nehngenre chinô-òṅ nö kētöre nö in ngam töt nehngenre chinô-òṅ. 27 Ngatī inrē më kikōnyö nö ṙāngö nup tö nehngenre chinô-òṅ nö i kikānö, hū pöri ngam tötlöök elkuilōn cha nöng kö in höö nöng chò-en höö tö kikōnyö. Më kikōnyö nöng i kikōnyö nö öt löngö kahëken tö la-en ngaich teūngen cha-a tö ṙòng* minë tötlöng kahëkenre la-en.
28 Öt tölöng angū-ö nö elmat cha tö cha nö hòṅ mikahtökūöre tö ngam Tēv,* lökten ngam Tēv inrē nöng ṙāngen cha nö in minë tötlöök takô mufē cha nöng la-evṙen nö in minë tötlöök la-en. 29 Tööḵlö cha-a tö ngam tökööl, ötlanöökö, yinikhānga, tööḵlö tö ngam ötlanöökö hēk ranāinyngö, finëlhang, lina-alkūö hēk michūṙen hēk lōn tö tötlöök nö i holre, sumrösṙôre, 30 vamë-eng nang, tö kunyaha elmat tö ngam Tēv, tö-angëḵ, tö tailölōn, ameū-eure, kamakken nup tötlöng, öt hamang chööngö yöngre, 31 töt īnu tö mikah, töt mahateungngö kinlēḵngôre, öt īnu tö ngam tö nehngenre hanangenlōn hēk töt aṙē-ěvlōn. 32 Akahakūö takô cha-a tö në chööngö ngam Tēv, tö yip tarik kamëken në tö ngatī la-en nö kētu sācha min cha-a tö ngam kinpaha. Rö-ö pöri cha-a nöng iṙūöhen nö kēken në la-en, pön tölöng inrē tö ṙô cha yip tö ngatī kahëken tö la-en.