Innëtö chitri Pītör
2 Sā inlahen yik tö minyôiny pròfět nö söklöre nö elhôi yik Tarik aṅ Israel, ngatī inrē min yip tö minyôiny mahaköphöti nö yih nö elhôi yīö, ulāikenre min cha-a nö vīlö krup nö elhôi yīö, ngam kamū-ötö in ngam ötinkôlò ngaich mahangre min cha-a nö öt akahakūö töm yöngṙenre, ngam mahavaha cha sin, ngatī inlahen cha-a nö haveuttö yanīhi ngam ötinkôlò nö ikuire. 2 Rö-ö nöng angū-ö, pön pōyen min yip tarik mameuk inlahen cha ngaich asīnkö inlahen cha nö kēken minë töt sinrōngkūö la-en* ngaich ötlēḵköṙôre min yip tarik tö ngam talöökö kanô-en töpòkūö tī cha. 3 Kūö ngam yanālöre min cha-a nö ṙôtö nup ṙô inchīlö nö kēngen nup aṅ in yīö. Ngaich pöri nö urěhāngen inlēnngö öp kinëtö sācha cha ngaich rö-ö ngam ṙētak kinëtö sācha cha nö hiṙeūtkö yanīhi re, ötrěhēn nö sökngöröönre.
4 Kô-en, öt heūlngöre ngam Tēv nö kētö sācha yip ma-ahānga yip tököölö fālen, kavalhöt cha pöri nö el Tartörös* ngaich nyëkngen cha tö sayôk nö chaphöt cha nö el ngam tökalē-ě sinngūlö,* hòṅ cha nö iyöng in e, hanöng sā ṙētak öp kinëtö sācha cha nö öl. 5 Öt heūlngöre inrē anga-aṅ nö kētö sācha ngih panam inuk ṙētak nuk sakāmö Nō-a. Hē ò pöri nö kētö ök ṙanööingö nö ikui ngih panam yip tarik töt maha-öiny ngam Tēv ngaich laklen Nō-a anga-aṅ, ök ma-ahangkö ngam lanöökö, holre tö yik tö sat tak tarik. 6 Hěnghöre kētö sācha nuk elpanam anga-aṅ nuk tö Sôtöm Kômòra minë-eny nö vīten u nö tisum, ngatī inlahen angū-ö nöng inmeukhömat yip tarik, yip töt maha-öiny ngam Tēv ip yamih ṙētak. 7 Laklen Lòt pöri anga-aṅ ök tölöök tarik, ök tö kihngen ellōn takô nö meuk nuk töt sinrōngkūö la-en* yik tötlöök tarik. 8 Heūṅ, hē ngòh tölöök tarik nö iyöng elhôi cha ngaich kaheuk sakāmö anga-aṅ nö kihngen ellōn nö meuk nuk tötlöök la-en cha hēk hangṙô cha inrē. 9 Ngatī inlahen ang Yāvē* nö akahakūö tö inlahen tīre nö ṙānyen yip tarik lamöklōnre ngaich ṙāngen yip tötlöök tarik ip sakāmö kinṙôka, hòṅ ò nö ahetngen* cha ip ṙētak, 10 möthë takô nö in yip mahachōichngö alaha yip tahëng hēk yip tökūöṅn elmat tö yip tö chöönguvö.
Öt pinhë-eṅvkūö cha-a hēk töng kamnahanglōnre hēk öt vanööṙu nö ötlēḵköṙôre tö inlahen yip tarik, yip tö kētu nööinyö tö ngam Tēv, 11 pòrô yip ma-ahānga nö mötlö kumlēḵ hēk minhôiyö tö më tö minyôiny mahaköphöti, sön pöri cha-a nö öt miṙēngen yip tarik nö ṙôten nup ṙô minṙēngö nö sūöichken cha, kūö minlēḵṙenre tö* Yāvē.* 12 Sā inlahen nup töṙeūla töt akaha pöri vē tarik, nöng asā nup tö nehngenre kuilōnre nö la-evṙen ngaich ṙënten minë töṙeūla nö fötnyu, hòṅ u nö kē-ě ngaich fëliyö. Nup töt mikahkūö vē tarik ṙô ngaich ötlēḵköṙôre cha-a tö inlahen u. Ngaich höng vamī lāinyngenre cha-a nö ahetiyö, pò cha nö lök el talöökö ngam ötinkôlò, 13 ngam tötlöök talöökö lahök cha, teūngen min cha-a tö tötlöök ṙòng e.
Höng kuchīken cha-a nö hapōhore nö in minë inṙamlōn, rö-ö inrē cha-a pön hē el ṙētak sakāmö nö ööire nö ngatī inlahen. Mūmu hēk pitōtu cha-a ngaich yēḵ cha nö in yīö nö in minë nyīna-aṅ ngaich ṙamölōn cha-a nö ṙūöhöl alaha minë inköphöti tö tööḵlö tö inchīlö. 14 Tööḵlö minë mat cha tö insěha* ngaich ötkô cha-a nö ṙāpöre nö kēken ngam tökööl ngaich ha-ūöt yip tarik cha-a yip tökatööngaṙen ellōn ngaich ngam ellōn cha nöng urāngen nö im yinikhānga. Tötkôlò yip cha-a nyīö. 15 Ṙāngen ngam töchip cha-a talöökö ngaich lō-ongkūö cha-a, lök el talöökö Pēlām cha-a ök kūön Pī-ôr, ök tö hangenlōn tö nuk raneushö lamöktö i tötlöök, 16 ök tö vëka tökūöre nö la-al nuk tölöök la-en. Ngaich ngam töng öt heuveū-ṙô töṙeūla nö ṙôtö ëlô tarik nö asökngö inlahen ök pròfět nö kēken ngam la-en kumlō-ovö.
17 Sā nup löklö mak cha-a nup töt aṅhaṅv tö mak hēk sā inlahen minë lul taṙul töng havötkakūö tö ngam chanôichö ngaich höngkaṙen cha-a tö ngam tökalēḵ sinngūlö. 18 Ṙôten nup ṙô cha-a nup tö vāyö hināngö, höng chanök alaha pöri anū-ö. Ṙūöhöl alaha ngam inteungngö kuilōn ngam alaha cha-a hēk ha-ūöthöt yip tarik mi-in minë töt sinrōngkūö la-en,* yip töng fömnyöre nö kunyī-inyre nö ṙā-ang elhôi yip tötlöökö la-en. 19 Kilēḵngôre cha-a nö ṙānyen cha, nöng haköövö cha-a inrē tö ngam ötlanöökö, pò ngòh tarik nö vamītöre nö mameukṙen ngam tö chöönguvö nö ikui ò. 20 Kô-en, yēḵ cha nö unôichrit inlahenre nö ṙānyu nö ṙā-ang el ngam mum ngih panam nö löktö in ngam tölöng mikah elmat tö inlahen ngam Mā hī hēk Mahayööken hī ang Yēsū Kristū, yēḵ cha pöri hēk nö havantöre nö in në la-en hēk höng vönhöt nö in u ngaich ngam inlahen cha töngamuh nö höchngen tö ngam inlahen cha tö lā-urěh. 21 Ĕhten öre ngam inlahen cha nöng un kēḵ ngam tölöng mikah elmat tö inlahen ngih talöökö lanöökö, tö ngam inlahen cha nö havööngökūöre tö në töhet chööngö unôichrit inlahen cha nö akahakūö tö u. 22 Teungtökūö ön ngih tökô-en inchōḵ-oṙô nö in cha; “Havantöre an ngam am nö in ngam kuvôvre ngaich ngam yöng ha-un tö fömngöre vinôkö nö kiyūö-öre hēk nö el tilin.”