Raneh chitri Yôhan
5 Ngòh tarik ṙamatö-ellōnre tö Yēsū nö anga-aṅ Kristū ngaich töfötnyu anga-aṅ tö ngam Tēv hēk yěn ōt tö hangenlōn tö ngam Tēv kamëtö nômö ngaich hangenlōn inrē anga-aṅ tö më kūön ò. 2 Yēḵ hī öi hangenlōn tö ngam Tēv hēk hang minë chööngö ò ngaich löktö in e ayī-ö akahakūö töre öi hangenlōn tö yip kūön ngam Tēv. 3 Pön angū-ö ngih manah ngam hanangenlōn hī tö ngam Tēv, tö hī öi lök in minë chööngö ò ngaich öt lumrāḵ minë chööngö ò nö in hī, 4 pò nup taṙòkhöre* töfötnyu tö ngam Tēv ngaich mihôiṅ anga-aṅ töng panam ngaich ngam minhôiṅyö hī öi ing panam lamökngörit im ṙinatö-ellōn hī angū-ö.
5 Achīö öp tö mihôiṅ töng panam? Hö-ö hòng nö anga-aṅ ngam ṙamatö-ellōnre tö Yēsū nö Kūön ngam Tēv? 6 Anga-aṅ ön ngòh yamih nö löktö in ngam mak hēk mahām, anga-aṅ ang Yēsū Kristū. Öt höng holtö ngam mak anga-aṅ, holtö ngam mak hēk mahām pöri nö yih. Ngam töhet kumlēḵ an ameū-a pò ngam töhet kumlēḵ nö ameūkö tökô-en. 7 Lökten yin më ameū-a nö lūöi tak, 8 töhet kumlēḵ, mak hēk mahām, lūöire anū-ö nö hō-en nup ṙô höö.
9 Yēḵ hī öi ṙatö-ellōnre öi in minë tö-eūka tö tarik ngaich mötlö ngam tö-eūka tö ngam Tēv pò ngam Tēv nö hakôtenre nö eūkö inlahen ngam Kūönre. 10 Ngòh tarik ṙamatö-ellōnre nö in ngam Kūön ngam Tēv ngaich hō-en ngam tö-eūka anga-aṅ nö im ellōnre ngam kahëtö ngam Tēv nö in ò, ngòh tarik töt ṙamatö-ellōnre nö in ngam Tēv ngaich kaheūkö ò anga-aṅ nö tö minyôiny pò ò nö öt ṙatö-ellōnre nö in ngam tö-eūka tö ngam Tēv ngam inlahen ò nö vënyö inlahen ngam Kūönre. 11 Angū-ö ngih tö-eūka tö ngam Tēv nö kē-ěkūö hī tö ngam nômö tö örheūheu-aṅ ngaich löktö in ngam Kūön ò ayī-ö öi teūngen tö ngih nômö. 12 Ngòh hamô-en ngam Kūön, īnu anga-aṅ tö ngih nômö. Ngòh töt hamô-en ngam Kūön ngam Tēv, öt īnu anga-aṅ tö ngih nômö.
13 Ṙën Chin öich kūichten në ṙô öich in yīö hòṅ yīö öi akahalōn töre aṅhavin tö ngam nômö tö örheūheu-aṅ, pò yīö öi ṙatö-ellōnre öi i minë-eny ngam Kūön ngam Tēv. 14 Ṙatö-ellōnre in öi in ngam Tēv tö nup töng havëkö hī öi sā nup kuilōn ò ngaich hang ṙô hī anga-aṅ. 15 Akahalōn in tö nup töng havëkö hī öi in ò hang ṙô hī anga-aṅ, lökten in öi ṙatö-ellōnre tö nup töng havëkö hī in ò ngaich öthō min anga-aṅ nö öt kē-ěkūö hī.
16 Yěn ōt mameuk öp holmaneukre kamëken tökööl ngam töt ṙôngu tö ngam kinpaha ngaich vë-elkui ngam holmaneukre anga-aṅ ngaich kē-ěkūö ò min ngam Tēv tö ngam nômö, heūṅ, kē-ěkūö yip tarik an min tö ngam nômö yip töt kamëken në tö ngatī tökööl ngam tö ṙôngu tö ngam kinpaha, ōt pöri ngam tökööl ngam tö ṙôngu tö ngam kinpaha. Hö-ö pöri Chū-ö öich ṙô tö vinë-elkui yip tö ngatī inlahen kahëken tö tökööl. 17 Ṙòkhöre nup tötlöök la-en nö tökööl, ōt pöri inrē nup tökööl nup töt ṙôngu tö ngam kinpaha.
18 Akahalōn in tö yip taṙòkhöre tarik lamöktö in ngam Tēv nö fötnyu, öt iṙūöhen min anga-aṅ nö im tökööl, laklen öp tarik pöri min anga-aṅ* öp lamöktö in ngam Tēv nö fötnyu ngaich öthō min ngam Satān* nö iyööngö ò. 19 Akahalōn in ayī-ö töre öi lamöktö in ngam Tēv, ṙòkhöre pöri ngih panam nö eltī ngam Satān.* 20 Akahalōn inrē ayī-ö tö ngam Kūön ngam Tēv nö yih ngaich kē-ěkūö hī anga-aṅ tö ngam mikah elmat,* hòṅ hī öi kēḵ mikah elmatre tö inlahen nup tökô-en. Ngaich löktö in ngam Kūön ngam tökô-en Tēv ang Yēsū Kristū ayī-ö öi im hinëngö im Tēv. Anga-aṅ an tökô-en Tēv hēk anga-aṅ inrē kamëten ngam nômö tö örheūheu-aṅ. 21 Yī-ö kūön chu, laklöre yin tö nup insātēv.