I minë-eny Filimòn
1 Chū-ö Pôl öich tö hěngtak öich töhaköövö töpòkūö Kristū Yēsū, hol ngam prötör hī Timôtī, öich kūichtö ngih chitri ngam hanangenlōn hamòlṙen hī Filimòn, 2 holre tö ngam kanānö hī Afīa hēk tö ngam hol hī öi kiyung ang Arkipös hēk tö ngam māṅ tö mūlhakṙen nö i patī meh.
3 Teūngen yin yēḵ tö ngam tökiröng miṙēḵlōn hēk lanāmö öi löktö in ngam Yöng hī ngam Tēv hēk löktö in ngam Mā Yēsū Kristū.
4 Yēḵ Chu ṙung öich fēken meh i nup ṙôre öich vë-ekūötēv ngaich örheūheu Chū-ö öich kētö nööinyö ngam Tēvre, 5 pò Chu örheūheu öich hang inlahen ngam ṙinatö-ellōn meh hēk tö ngam hanangenlōn meh tö ngam Mā Yēsū hēk tö yip taṙòkhöre inrē töhet tarik. 6 Vë-ekūötēv Chin, hòṅ meh öm teūngen tö nup taṙòkhöre inkòlô öm löktö im ṙinatö-ellōn ngam taneūngen hī öi löktö in Kristū. 7 Kahōlö, hē Chu öich hang inlahen ngam hanangenlōn meh ngaich kirööngen ṙanamölōn Chū-ö hēk teūngen tö inreuskö alahare, pò yip töhet tarik nö teūngen tö hanöhlö ellōnre töpòkūö meh.
8 Angū-ö ön lāinyngen Chu pòrô Chū-ö öich tanīnöṙô Kristū, sön öich öt piyū-uṙô öich kētö Chööngö öich in meh tö meh öm la-evṙen tö nup tölöng nö imat meh, 9 sön pöri Chū-ö öich lökngörit im hanangenlōn öich hòṅ aṙētu ṙô tö meh, pò chu Chū-ö ngaich Pôl öich köinyö ṙēḵti hēk hachēli inrē töpòkūö Kristū Yēsū. 10 Heūṅ, hòṅ aṙētu ṙô chin tö meh tö inlahen öp kūön Chu Ònisimös, hē chu öich el chēl* ngaich vītöre Chū-ö öich Yöng ò. 11 Rö-ö sin anga-aṅ pön töt yanööluṙen tī tö meh ngaich pöri anga-aṅ nö yöölen tī tö meh hēk yöölen tī inrē tö Chu nö in minë la-en. 12 Tīnten ò Chin hēk nö havan nö chuh in meh, heūṅ, anga-aṅ ngòh hanangenlōn chu takô.
13 Rö-ö Chin pöich lōnu tö ò nö höngngöh nö in Chu, hanöng sā Chu öich el chēl töpòkūö ngam tölöök inhānga ngaich meukṙen Chu sin anga-aṅ öich ichūöktit meh. 14 Sōḵ pöri Chū-ö öich kahngenre yěm öt chööngu, hòṅ meh öt timlöng alaha öm ngatī la-en, holtö kuilōnre pöri öm löökö la-en. 15 Angū-ö lāinyngen ò lohten sin nö rahëichhangkūö nö haköhngenre tö meh, hòṅ ò hēk nö urāngen nö in meh. 16 Rö-ö pöri nö sā inlahen öp mahalanṙen pön sā inlahen öp prötör töhanghuṙen, mötlö takô anga-aṅ nö hanangenlōn Chu, mötlö takô nö in meh pò ò nö mahalanṙen, hěnghöre holmaneuk meh inrē anga-aṅ nö im Mā. 17 Lökten yēḵ meh öm holre* lōn tö Chu ngaich holtö hanangenlōnre öm ha-öinytö yīhi ò, sā inlahen meh öm in Chu. 18 Yěn ōt öp yanëḵngen meh tö tī ò hēk yěn ōt hötṙeh ò nö in meh tö hòṅ kēnyu ngaich kūichhöt e më-eṅ nö imat öp chūök hötṙeh Chu. 19 Chū-ö Pôl öich kūichhöti öich aṅhtī tö kuntīre, löhnyö nup yanëḵngen meh Chin min, hö-ö Chin uroh öich ṙò-òvö öich in meh tö meh öm hötṙehevö öm in Chu öm chö-öinytö ngam nômö. 20 Heūṅ, më-eṅ holmaneuk Chu hayööken Chu man öm im Mā, ha-öhlö ngam ellōn Chu nö in Kristū.
21 Kirööngen ṙinatö-ellōn Chin tö meh öm öthō min öm öt hang ṙô Chu, lökten chin öich kūichhöti öich in meh, akahakūö Chin tö nup töng ṙô Chu in meh mötlö inlahen min më-eṅ tö u. 22 Hěnghöre halēnkö öp chūök Chu öich iyöng, pò Chu öich maheūṅkkuvö öich löktö in nup ṙô yīö öi vë-ekūötēv, tö Chu min öich veūten öich meukkūö yīö.*
23 Sinlāmu ṙô ön Epafaras nö in meh, ngam hol Chu öich el chēl öich im Mā Kristū Yēsū. 24 Sinlāmu ṙô inrē nö in meh, më hamòlṙen Chu, hē Mākös, Aristorkös, Tēmas hēk Lūkös inrē.
25 Köp an yēḵ ngam tökiröng miṙēḵlōn ngam Mā Yēsū Kristū nö in yīö, kūö ngam hameuktö yīö kumlēḵ alaha yīö.