I minë-eny Heprāi

13 Iṙūöhen yin kö hangenlōn tö höö, öi sā inlahen më prötör. 2 Un vāichngö nö i mineukṙen tahëng,* tön rīkre yik tarik töt ma-akahngenre nö meukṙen yik ma-ahānga. 3 Köplōn tö yip më-el chēl* öi sā lōnre töre öi in cha öi el chēl hēk köpölōn inrē tö cha yip tötlēkaṙen, pò yīö öi hol cha öi im töng hěng alaha.* 4 Hökngen ngam pinīhö nö minlēḵṙen nö i taṙòkhöre tarik hēk un hachōichi ngam chamam më pamīhöre, pò ngam Tēv min nö kētö sācha yip chamô-òṅkānö* hēk ma-asěha inrē. 5 Löktö im tinrīkenre yin öi hameuktöre öi töt hangen tö rupīö ngaich nup aṅ in yīö ngaich ṙamlōn yī-ö öi in u. Pò ngam Tēv nö ngö ṙô: “Öthō Chin min öich ṙāngen meh, ötrēhěn öich havööngökūöre tö meh.” 6 Lökten öi hangönöre ngaich ngö ṙô: “Yāvē* an hamòlṙen chu öthō chin min pa-ekūö, asuh öp min tī ngòh tarik nö in chu?”

7 Köpölōn tö yip mahachōkūö nö elhôi yīö hēk yip vamënyö ṙô ngam Tēv inrē nö in yīö hēk chumkūöṙen öi ngëichkö nup tövai tinrīken cha öi asīnkö ngam ṙinatö-ellōn cha.

8 Öt haṙīköre an Yēsū Kristū nö löktökūö vahë, töngamuh hēk höng örheūheu.

9 Ui lōmngö öi in nup töṙōlkangen töt mikahkūö inköphöti, pön tölöök ngam ellōn yěn hangönlöng nö löktö im tökiröng miṙēḵlōn ngam Tēv, rö-ö nö löktö im nyīna-aṅ* ngam töt yöölen tī tö yip tarik töng mi-in e.

10 Hěng öp tahāklö in ih, ngam chūök yip töla-evṙen tö töhet nö öt chööngu nö im nyīna-aṅ nö el ngam inrūkui. 11 Pò më mākūö kūönṙô nö kēhöt mahām minë töṙeūla nö töfööngö nö tökētu nö inṙē-ěl tökööl, nö el ngam töhet chūök ngaich fööngö minë alaha u nö lātunyī tö ngam elyööngö. 12 Lökten inrē ang Yēsū nö keun ngam kanihngen nö la-uk inkūp ngam panam, hòṅ ò nö löktö im mahāmre nö ahetlen yip tarik. 13 Lökten ta-a töi keun ngam sinrōngkūö ò ngam laha-al ò, öi kunyī-inyre öi yôknyi tö ngam elyööngö öi chuh in ò. 14 Pön öt ōt elpanam hī ihih öp töng örheūheu nö köp, hökken öp elpanam pöri ayī-ö öp tö hòṅ yih min. 15 Ta-a töi löktö in Yēsū öi örheūheu öi kētö tökētu nö nööinyö ngam Tēv ngam tö ngö manah, ṙòng në minuh, ngam ameūken ngam minë-eny ò nö ikūö yip tömaṙôngö. 16 Hěnghöre ui vaichngö öi la-evṙen tö tölöök hēk katöl yip tahëng tö nup töng aṅ in re, pò ngam Tēv nö ṙamölōn takô nö löktö in në tö ngatī tökētu.

17 Yip mahachōkūö elhôi yīö, hang chööngö cha yin hēk tumṙeūtöre tö cha pò cha nö akahalōn töre min nö kētö kinṙötöre nö asā ngam inlahenre nö hayōmken yīö. Hòṅ cha nö holtö ṙanamölōnre nö la-evṙen tö ngih la-en, rö-ö nöng holtö unhāṅ-enre pò e min nöng kanihngen yīö.

18 Iṙūöhen yin vë-elkui ih pò ih ṙinatu-ellōn tö ngam lamātuhēt elkuilōn ih nö töhet* ngaich hòṅ chiplö īhö öi in minë taṙòkhöre la-enre. 19 Ṙën pöri chū-ö öich kalē-ě ṙô öich ṙūöhöl alaha yīö öi vë-ekūötēv hòṅ chu min hēk öich veūten öich havan öich chuh in yīö.

20 Ngih ön havëkö ih tö ngam Tēv lanāmö ngam mahachohlen ngam tökiröng yōm sīṅp hī hēk ngam tö hachohlöng nö ṙā-ang in yik tökapah nö holtö mahām ngam tö örheūheu kinlēḵngô ngam Mā hī Yēsū, 21 halēnten yīö anga-aṅ tö nup taṙòkhöre tölöök chehen nö chö-öinyten ngam inteungngö ngam kuilōn ò ngaich löktö in Yēsū Kristū nö la-evṙen tö nup taṙòkhöre la-en nö lātuhēt hī ngam töhō-ovö tö ngam Tēv, örheūheu an yēḵ ngam ineū-eu ò. Āmen.

22 Kahōlö, hòṅ aṙētu ṙô Chin tö yīö, öi holtö manööyöre öi hang në ṙô chu, ngih tökūichö nö chö-öinytö inreuskö alaha yīö pò ngih chitri kahūich chu nöng rahëichyen. 23 Hòṅ vë-eny nang yīö Chin tö ngòh holmaneuk hī ngaich ang Timôtī nö ṙānyu, yēḵ ò min nö veutti yīhi ngaich hol ò min chū-ö öich meukkūö yīö.

24 Sinlāmu ṙô in yip mahachōkūö elhôi yīö hēk in yip taṙòkhöre inrē töhet tarik. Sinlāmu ṙô yin vē aṅ Italī nö in yīö.

25 Köp an yēḵ ngam tökiröng miṙēḵlōn ngam Tēv nö in yīö öi ṙòkhöre.