I minë-eny Efisös
5 Lökten yin, sā inlahen yip nyīö hanangenlōn ngam Tēv, öi asīnköröön ò, 2 ngaich iṙūöhen lök el ngam talöökö hanangenlōn, sā inlahen Kristū inrē nö hangenlōn tö hī* ngaich kēngö nômöre töpòkūö hī* nö kētö tötahūsa nö ikūö ngam Tēv.
3 Sā e nö in yip töhet tarik nö un ōt ngam insěha* nö elhôi yīö hēk nup töng taṙòkhöre inrē öt hanëtö hēk un kakka inrē ngam yinikhānga, 4 uh rēhěn nö ōt nö elhôi yīö ngam töt sinrōngkūö tinrīken, uh rēhěn nup ṙô töng kumlō-ov, uh rēhěn nup tötlöng minôn, pön töt hō-ovö në ṙô nö in yip töhet tarik. Höng ngam nööinyö ngam Tēv pöri tö hāngö. 5 Pò yīö öi akahalōn hēk akahaiṙen takô inrē yī-ö tö yip tarik kamëken ngam insěha* hēk tötlöng la-en hēk yinikhānga, nup tö ṙongta nö in nup vinë-ekūö insātēv ngaich öt amīnu min anga-aṅ nö el ngam Pūlngö Kristū hēk ngam Tēv inrē.
6 Un tarīku mahachīlö yīö nö löktö in nup ṙô chanök alaha, pön löktö in në ötlanöökö ngam lanīnö ngam Tēv nö ikui yip töt hamang chööngö. 7 Lökten yin, ui holröön cha, 8 pò yīö yī-ö sin misī më-el ngam sinngūlö ngaich pöri yī-ö töngamuh öi el ngam hanātö, kūöre öi im hinëngö öi im Mā. Sā röön yip kūön ngam hanātö yin öi kiröön, 9 pò nup tökeuheūttöre ṙòng ngam hanātö nö lanöökö, tölöök hēk kanô-en inrē. 10 Iṙūöhen yin kalah mikahtökūöre tö nup ṙô töhō-ovö tö ngam Mā, 11 ngaich holṙen ò öi ṙāngen minë töng kumlō-ovö la-en ngam sinngūlö, hameuknyen u pöri. 12 Pò nup la-en cha töhayunkaṙen ngaich aṙē-ěvö öi kakkö inlahen u. 13 Nup töng ṙô tö hameuknyu, löktö im hanātö anū-ö nö hameuknyu, pò nup töng ṙô tö hameuknyu, anū-ö hanātö. 14 Lökten anga-aṅ nö ngö ṙô: “Ō më-eṅ mahaṙòh, Ahen man ngaich choholre öm ṙā-ang in yip tökapah* ngaich möl min ngam hanātö Kristū nö yang nö ikui yīö.”
15 Lökten yin chumkūöṙen ngëichkö inlahen ngam tinrīkenre, ui sā yip tökulō-ovö, sā inlahen yip tö akaha pöri, 16 löngötī yin yūs ngam ṙētakre,* tön ötlöng ön ngam sakāmö. 17 Lökten yin ṙāngenre tö minë la-en kumlō-ov ngaich kalah öi mikahtökūöre tö nup kuilōn Yāvē.* 18 Hěnghöre, ui höng hiyōi öi òk ngam vāin, ngam löknyö nup töng höichngen ötlanöökö,* iṙūöhen pöri tööḵlö tö ngam töhet kumlēḵ. 19 Kö hareuskö alaha höö yin öi tikök ngam salmai,* tikök ngam nööinyö ngam Tēv hēk tikökṙôre inrē tö ngam töhet tinköökö ngaich holtö ellōnre öi tikökṙôre öi tikökngen Yāvē,* 20 ngaich in nup taṙòkhöre öi kētö nööinyö ngam Tēv, ngam Yöng hī, öi löktö in ngam minë-eny ngam Mā hī Yēsū Kristū.
21 Pa-ekūö yin tö Kristū öi tumṙeūtöre tö höö. 22 Yī-ö inpīhö kikānö, tumṙeūtöre yin tö më pīhöre kikōnyö, sā cha cha-a nö tumṙeūtöre tö ngam Mā, 23 pò më inpīhö kikōnyö nö kui më pīhöre kikānö, sā Kristū inrē nö kui ngam māṅ, mahayööken ngih alahare. 24 Sā ngam māṅ nö tumṙeūtöre tö Kristū, ngatī inlahen inrē më inpīhö kikānö nö hòṅ tumṙeūtöre tö më pīhöre kikōnyö nö inup taṙòkhöre. 25 Yī-ö inpīhö kikōnyö, kö hangenlōn yin tö më pīhöre kikānö, sā inlahen Kristū inrē nö hangenlōn tö ngam māṅ ngaich kēngö nômöre töpòkūö e, 26 hòṅ ò nö ahetlen e tö ngam ṙô ngam tö sā mak hēk kaheūkö e inrē nö töhet, 27 ngaich kēten ngam māṅ nö holtö nööinyöre nö öt pitōtuvö hēk öt nyichköre inrē, ötrēhěn nö ōtngöre nup tahëng, het hēk öt pitōtu pöri.
28 Ngatī inlahen inrē më inpīhö kikōnyö nö hòṅ hangenlōn tö më pīhöre kikānö sāre tö ngam alahare, pò ngam tö hangenlōn töre ngaich tö hangenlōn anga-aṅ tö ngam pīhöre kikānö, 29 pön öt tarīku tö kunyaha elmat tö ngam alahare, haṙūötken e pöri nö hanëlen e hēk pōiṙāi mat inrē tö e, sā inlahen Kristū nö in ngam māṅ, 30 pò hī ayī-ö öi tūmö pak alaha ò. 31 “Angū-ö an lökten ngòh kikōnyö tarik nö ṙāngö yöngre tö kikōnyö kikānö ngaich haköpngöre nö im pīhöre kikānö,* nëtre tak ngaich cha-a nöng hēngö alaha.” 32 Yöng ṙôkö kinrööngö ngih töhet töt mikahkūö sin. Ṙôtö inlahen Kristū hēk tö ngam māṅ Chin. 33 Sön pöri yī-ö öi kö hangenlōn tö më pīhöre kikānö öi sā lōnre töre, ngatī inrē më inpīhö kikānö nö hòṅ kirööngen minlēḵṙen tö më pīhöre kikōnyö.