Raneh Chitri Yik Aṅ Kòrin
8 Kūich inlahen nup nyā-aṅkūö chin nup tökētu nö ikūö insātēv. Akahalōn in töre öi ṙòkhöre kö aṅhavin tö mikah elmatre tö inlahen e. Tāilö tī an tö hī ngam mikah elmat, hangöönö hī pöri ngam hanangenlōn. 2 Yěn ōt tö ngö lōn töre nö īnu tö mikah elmatre tö nup töng sitih, ngaich kô-en pöri anga-aṅ nö öt aṅhavin tö ngam mikah elmat töp tö sā ṙôken lōn ò öre. 3 Yěn ōt pöri tö hangenlōn tö ngam Tēv, ngaich akahakūö ngam Tēv tö ò.
4 Ta-a hēk töi ṙôtö inlahen minë nyā-aṅkūö minë tökētu nö ikūö minë insātēv, akahakūö in tö minë insā nö töng rö-övö nö ikūö ngih panam höng hěngtak pöri ngam Tēv öt tahëngu. 5 Pōyen nup tö tēvö invëka nö el halīöngö hēk ing panam inrē, sā inlahen nup “tēv” nö pōyen hēk “mā” inrē, 6 höng hěngtak pöri ngam Tēv hī ngam Yöng, löklö në taṙòkhöre chehen hēk löktö in ò inrē ayī-ö öi aṅ. Hěngtak ngam Mā ang Yēsū Kristū ngaich löktö in ò në taṙòkhöre chehen hēk löktö in ò inrē ayī-ö.
7 Sön pöri nö pōyen yip tarik töt aṅhavin tö ngih mikah elmat. Rīkre pöri yip tarik mi-in minë insātēv sin, ngaich ngölōn cha-a yěn nyā töngamuh tö nup nyahāṅ tö cha nöng tökētu nö ikūö minë insātēv, kūö öt kumlē-en ngam elkuilōnre cha-a, lökten nö chōchngöre. 8 Öt haröhten hī an ngam nyā-aṅ öi in ngam Tēv; yēḵ hī öi öt nyā ngaich öt yëḵngen ayī-ö ngaich yēḵ hī öi nyā ngaich öt yanööluṙen ayī-ö. 9 Hòṅ örheūheu pöri më-eṅ öm chumkūöṙen tö ngam kinë-ekūö meh öm kahngenre katöllö lōnre nö un yūsö tö meh nö lökngen fanukngö ṙinatö-ellōn yip töt kalē-en tarik. 10 Lökten yēḵ ngòh töt kalē-en tarik nö meuk inlahen ngòh tö īnu tö mikah elmat nö nyā-aṅvkūö nö el chūök patī insātēv ngaich öt sīöplöre hòng min ngam kuilōn ò nö hòṅ nyā nup nyā-aṅkūö tökētu nö ikūö insātēv? 11 Kūö ngam mikah elmat meh öp tarik töt kalē-en nö ötkòlô, heūṅ, anga-aṅ ngam holmaneuk meh ngam chö-öiny Kristū nö kēngö nômöre. 12 Yēḵ yīö öi ngatī inlahen öt minlēḵṙen chanökhutī tö ngam töt kalē-en elkuilōn më holmaneukre, ngaich tököölö fālen yī-ö in Kristū. 13 Lökten yēḵ ngam nyā-aṅ nö lökngen fanukngö ṙinatö-ellōn ngam holmaneuk chu ngaich öt hòṅ hēk min chū-ö kāḵ alaha, hòṅ chu öt lökngen fanukngö ṙinatö-ellōn ngam holmaneukre.