Innëtö Chitri Yik Aṅ Kòrin
11 Söö öre yěi ṙap ngih tö ṙahëichnyen kumlō-ov chu, rö-ö pöi kô-en öi ṙāpö chu. 2 Kalē-ě mufē* takô chin tö yīö öich sā mufē ngam Tēv, pò Chu öich mikahngen yīö öi in öp tö hěngtak tarik, tö ngö manah ang Kristū hòṅ yīö öi kētu in ò öi sā öp töhet tötchô-òv rēlö. 3 Pa-ekūö pöri Chū-ö sā inlahen Ēva misī nö halō-oikūö tö ngam pēch uh takô minë mufē yīö nö lō-ongkūö un hachōichi ngam lanöökö tö ngam hanëtö yīö ngam tö hòṅ lumnööṙö Kristū. 4 Yěn ōt yamih nö ahangkö inlahen tahëng Yēsū ngam töt ahangka inlahen tö ih hēk yěn ōt yamih nö kēhöt ngam kumlēḵ ngam Tēv ngam tö harīkngöre tö ngam kumlēḵ ngam Tēv yīö hēk yěn ahangka ngam tölöök inhānga ngam tö harīkngöre tö ngam tölöök inhānga töhō-ovö tö yīö ngaich höng ilööṙen yī-ö öi hang ṙô cha. 5 Pò Chu öich ngö lōn tö Chu öich öt kūöṅnen la-en tö yip tanīnöṙô yīö yip mahameuktöre nöng vāyö inlahen. 6 Pòrô chin öich töt uroh öich heuveū-euṙô öich ṙò-òvö hö-ö pöri öich kūöṅnen aṅ in tö ngam mikah elmat ngaich hameuktö ngih mikah elmat īhö öi i tökeuheūttöre öi in yīö.
7 Hē chu öich hakūöṅnngöre hòṅ yīö öi hapōilöng ngaich öt ṙāiyu tī chū-ö öich holtö ṙanamlōnre öich ahangken ngam tölöök inhānga inlahen ngam Tēv. Tököölö fālen hòng chū-ö yěich ngatī inlahen? 8 El minë tahëng māṅ chū-ö öich kēngen* nup chehen* cha minë tö hòṅ kuilōn cha, hòṅ chu öich meukṙen yīö. 9 Hē chu öich iyöng in yīö öich ihih ngaich kirööngen hanāṅten chū-ö, sön pöri chū-ö öich öt lumngan tö elkui tö hěngtak, pò yik prötör aṅ Maketònī hē cha nö yih ngaich mööḵlö tī cha-a tö ṙôken lōn chu nö hayööken chu. Heūṅ, i tökeuheūttöre chin öich pītnyöre öich öt hòṅ lumngānö yīö, ngatī inlahen chin min öich pītnyöre öich in nup yamih ṙētak. 10 Sā kanô-en ngih ṙô tö ngam kanô-en Kristū nö in chu, ngatī inlahen kanô-en ngih ṙô tö chu min öt ṙākenre öich eūkö ngih ṙô in minë kamngö i Akāya. 11 Angū-ö hòng ngih lāinyngen e tö chu öich öt hangenlōn tö yīö? Akahakūö an ngam Tēv.
12 Ngam inlahen chu pöri iṙūöhen min chū-ö öich ngatī inlahen, hòṅ chu öich öt kētö ṙētak yip ameū-eure nö haṙongtöre nö in hī hēk yip chamöh inlahenre nö hòṅ haṙongtöre nö in hī. 13 Töng minyôiny tanīnöṙô yin më tarik tö ngatī inlahen, pò cha nö hanyatkö elmat nö tanīnöṙô Kristū ngaich höng la-en tö nup michīl. 14 Öt pingangkūö in pò ngam Satān inrē nö mihôiṅ nö vī-ire nö sā mineūkö yanāngö yip ma-ahānga. 15 Yēḵ yip mahalanṙen ò nöng hanyatkö elmat nö hameuktöre nö tölöök nö mahalanṙen, ngaich öt pinngangkūö angū-ö, asā nup la-en cha pöri ngatī inhetngö min cha-a.
16 Hēk chin öich havannyö ṙôre öich ngö ṙô tö yīö, öi ui ngö lōn tö chu öich tökulō-ovö. Yēḵ yīö pöri öi ngatī mufē tö chu ngaich höng ṙāpö chu yī-ö öich sā yip tökulō-ovö, hòṅ chu öich rahëichnyen ṙô hēk öich eū-eure. 17 Ngam ṙô chu öich ṙònghöich ṙô hö-ö chin öich asīnkö röön ngam Mā öich ngatī ṙô, asīnkö ṙô yip tökulō-ovö pöri hēk tö tāilölōn nö in re hēk ameū-eure inrē. 18 Pōyen yip tarik ameū-eure nö in nup ṙô ngih panam,* ngatī inlahen chin chū-ö inrē öich eū-eure. 19 Pò yīö öi töpōyen aṅ in tö ngam mikah, lökten öi höng ṙamlōn öi hökngenre hang ṙô yip tökulō-ovö. 20 Rö-ö nöng angū-ö, ṙāpöre yī-ö öi in yip taṙòkhöre tarik yip vamīten yīö nö el inköövö, kamëngö kanôlò yīö, kēngen nup aṅ in yīö, hapōilöre nö ikui yīö hēk famtākkūö yīö.
21 Sinrōngkūö chu ön ngih yēk chu öich ngatī ṙô, pön ōt yip tö ngö lōn tö ih ötlöngö tī öi yūs ngam chööngöre tökūö ṙôken ngam töt kumlēḵ-enre,
Ngaich yěn ōt töt aṙē-ěvö nö eū-eure ngaich ngatī inrē min chū-ö öt aṙē-ěvö öich eū-eure pòrô öich tökulō-ovö öich elmat cha. 22 Hiprū yip cha-a? Ngatī chin chū-ö inrē. Israel hòng cha-a? Ngatī chin chū-ö inrē. Kūön* Aprahām hòng cha-a? Ngatī chin chū-ö inrē. 23 Mahalanṙen Kristū hòng cha-a? Sā ṙô tökatūöyaṙen Chin öich ayôṙa öich ngö ṙô, Mööḵlö chin tö cha: Mööḵlö ṙôken la-en chin chū-ö tö cha, ṙōlheuh öich hachēlhötvö, ṙōlheuh inrē öich fōho hēk ṙōlheuh inrē öich öhngövah öich kapah. 24 Taneui heuh Chu-ö öich lūöi anāi machūötöre tum heuh nyāhaṅ öich fōho tö më Yahūti. 25 Lūöi heuh öich nyāhaṅ tö chōn öich fōho. Hĕng heuh öich nyāhaṅ tö ihong öich kulëhe. Lūöi heuh Chū-ö nup töng yahôk Chu chōng öich kiröönngöre laköl anū-ö nöng el mai, hěng mitööm hěng sumkam Chū-ö, öich höng ellōn ngam mai. 26 Ṙōlvan Chū-ö kihngen el talöököre kiröön, el tahël, kanihngen i tötūmu, kanihngen in yip töng aṅ in re tarik, kanihngen in yip tahëng mihëṅṙö tarik, kanihngen el panam, kanihngen el tönyalnyi, kanihngen el mai, kanihngen elhôi yip tötkô-en prötör, 27 kanihngen i la-en, i inahaṅti tö hatööm, i inṙehe nômö hēk neūkö, ṙōlheuh öich höng öt nyā-aṅvkūö ellōn, i laneūichö hēk hakten tö chehen alaha.*
28 Rö-ö nöng anū-ö në afēkö chu pöich kaheuk sakāmö inrē öich afēken minë māṅ. 29 Achīö öp tötkalē-en ngaich ötkalē-en hòng Chū-ö? Achīö öp töfukngö ngaich hūlö ellōn Chū-ö?
30 Yēḵ Chu öich hòṅ eū-eure ngaich eū-eure min Chū-ö in nup ṙô nup löktö inlahen chu öich akahka öich ötkalē-en. 31 Ngam Tēv hēk Yöng ngam Mā Yēsū, ngam tö hòṅ örheūheu nö ha-öinyö akahalōn an tö Chu öich öt minyôiny-aṅ. 32 Ngam mahayöng elkatòh ngam rācha Arētös aṅ Tāmöskös ṙāḵtö më amahtö ngam panam anga-aṅ Tāmöskös pön hòṅ kē-ě chu. 33 Ha-ūichlöng pöri Chū-ö öich el ök tökiröng kuvôkö ngaich hatūöitu chū-ö öich chuh lātaṙeū öich löktökūö kirki ök kaha kinlōngö ngam panam, ngaich ötkô-òngvah Chū-ö tö tī cha.