Raneh Chitri Timôtī
5 Un hatainykö tököinyö ṙēḵti, halēnö ò pöri öm holtö hanangenlōnre nö sā yöngre, kahëmre lōn tö më ṙālö, 2 hēk yöngre lōn tö më tököinyö ṙēḵti yöngnyīö ngaich kanānöre lōn tö më tökūöṅnö ṙēḵti kikānö öi milēḵṙen tö cha.
3 Chumkūöṙen* tö yip tafīösi, yip tökô-en nö hāṅten.* 4 Yěn ōt pöri tafīösi tö kūönu hēk tö yōmu ngaich urěh cha-a nö ngëichken më aṅ patīre ngaich mahameuktöre min cha-a nö ha-öiny ngam Tēv, hòṅ haṙënngen nup tī yip yöngre hēk yōmre cha-a nö meukṙen cha, pön angū-ö töhō-ovö tö ngam Tēv. 5 Yip tafīösi tökô-en nö hāṅten hēk töt yöngsuṙen, maheūṅkku anga-aṅ nö in ngam Tēv ngaich hatööm sakāmö nö peuinyhökūö ò nö vë-ekūötēv. 6 Ngòh töng iṙūöhen pöri nö hateungngö kuilōn ngam alaha ngaich sā ṙēngen töng kapah anga-aṅ nöng aṅ. 7 Lökten iṙūöhen kētö në inlēnö* in cha, hòn öt ōt samūöichkö fālen cha. 8 Kô-en, yěn ōt töt mameukṙen tarikre, mötlö yěn öt ngëichken yip aṅ ngam mikūönöre ngaich sā töt īnu anga-aṅ tö ngam ṙinatö-ellōn, höchngen tö yip töt ṙamatö-ellōnre.
9 Kaheukhöt yip tafīösi yip tö pōyen tö tö 60 samyeūheu ṙēḵti, öp töng hěngtak nö pīhö öp pīhöre kikōnyö, 10 öp tö akahka nö la-evṙen tö tölöök, tövāyö inlahen nö haruklö yip kūönre, mahameuktöre nö mameukṙen, samöchröön yip töhet tarik, mahayööken holre el kanihngen hēk tökalēḵ alaha nö la-evṙen tö nup taṙòkhöre tölöök la-en.
11 Un kaheukhötvö pöri më tö ṙālö ṙēḵti tafīösi, pön sökngöre min ngam inlahen cha nö meukṙen Kristū, kūö minë töchōich elkuilōn cha ngaich hòṅ kēḵ ngam pinīhö min cha-a. 12 Kaheūkö min cha-a nö töfāluṙen, pön ngam raneh kinlēḵngô* cha ngaich la-al e ngaich cha-a. 13 Hěnghöre höng öt la-evṙen cha-a ngaich höng havöötaröön nö keuheūt chahūhuhre tö minë patī. Heūṅ, rö-ö cha-a nöng öt la-evṙen, siṙösṙôre pöri cha-a nö ṙôtö inlahen holre hēk kētöre inrē nö i la-en yip tahëng, kakken nup ṙô cha-a, nup tötkô öre nö ṙônyu tö cha. 14 Lökten nö angū-ö ngih lōn Chu tö më tö ṙālö ṙēḵti tafīösi nö kēḵ ngam pinīhö, kūönu hēk ngëichkö patīre, hòṅ yip lama-al nö öt chööinyuṙô nö ötlēḵköṙôre tö hī. 15 Rö-ö pön rīkre yip tölō-ongkūö nö tömköröön ngam Satān. 16 Yěn ōt ṙamatö-ellōnre kikānö tö aṅhav patī tö tafīösi ngaich hayööken ò anga-aṅ hēk un lumngantu elkui yip aṅ el ngam māṅ tö ò ngaich möl min ngam māṅ nö mihôiṅ nö hayööken yip tafīösi yip tökô-en nö hāṅten.*
17 Yip minṙöinylen tövāyö inlahen tī nö hachōkūö, hòṅ mötlö taneūngen hēk cha-a tö minlēḵkenre, mötlö yip tö heuveū-euṙô nö ṙò-òvö hēk yip tökalēḵ alaha nö la-evṙen nö im inköphöti. 18 Lökten an ngam līpöre nö ngö ṙô, “Un hayūlö elvāng öp kōiny nuā yĕn röönnyö ṙòng sāiny,” ngih inrē, “Tön öthō ön ngòh töla-evṙen nö öt nyā nö ip chūökre nö la-evṙen.” 19 Ui ilöö ṙatö-ellōnre öi in nup sinūöchkö fālen yip tököinyö ṙēḵti tarik,* hanöng sā nap tö nëttak tak hēk tö lūöi tak mameuk nö öl nö ṙò-òvö. 20 Yip töng iṙūöhen nö im tökööl, halēnö cha ikūö taṙòkhöre, hòṅ yip tahëng nö pa-ekūö nö kēken tökööl. 21 Holtö kanô-enre Chin öich kētö chööngö öich in yīö öich ikūö ngam Tēv hēk Kristū Yēsū hēk yip tökatöllöng ma-ahānga öi urěh öi afītöre, urēhěkūö yiö öi kēḵ nup fësla hēk hang në chööngö öi ui atöltuṙen.
22 Ui veut alaha öi ṙāḵtö eltīre* i tarik, ui rēhěn öi holṙen yip tahëng nö in nup tökööl cha, haköpken ngam tinrīkenre pöri nö het.
23 Uh man öm höng òkkö mak, rahëichvat pöri öm òk vāin öm chö-öinytö ngam ellōnre hēk chö-öinyten ngam tö örheūheu invahre.
24 Rīkre yip tarik töng ilööṙen nö meūkö fālen nö ikūö tömaṙôngö ngaich ilöö kētu sācha cha-a, unôichngöre pöri inrē nö meūkö fālen yip tahëng. 25 Ngatī nup tölöök la-en nö ilöö meūkö nö ikūö tömaṙôngö hēk nup tötmeūkö tölöök la-en, ötkô inrē anū-ö nö hanyunngen.