I minë-eny Rōma
4 Sitih ṙô öi min yēḵ e nö ngatī, asuh ök taneūngen ök muvöhngö hī misī ang Aprahām? 2 Yēḵ Aprahām öre nö kaheūkö nö tölöök nö löktö in nup la-enre ngaich ōt öre öp lāinyngen ò nö īnu tö ngam ineū-eure, hö-ö pöri nö ikūö ngam Tēv. 3 Sitih ṙô öng ngam līpöre? “Ṙatö-ellōnre ang Aprahām nö in Yāvē* ngaich angū-ö chö-öiny ò nö kaheūkö nö tölöök.” 4 Ngòh tarik tö la-evṙen, öt kūö ngam tökiröng miṙēḵlōn anga-aṅ nö kētu raneushö, pön tö hòṅ taneūngen* ò angū-ö. 5 Ngaich ngòh tarik töt ṙamatö-ellōnre nö in minë la-en, ṙatö-ellōnre pöri nö in ngam Tēv, ngam tölööku ṙô tö yip tötlöök, kaheūkö min anga-aṅ ngòh tarik nö tölöök nö löktö in ngam ṙinatö-ellōnre. 6 Ngö ṙô ök inrē Tāvit tö ngòh tarik nö ṙamölōn ngòh töt keuheūtlöre mikahkūö tö ngam chööngö, sön pöri ngam Tēv nö kaheūkö ò nö tölöök, ngö ṙô anga-aṅ: 7 “Töṙamölōn yip cha-a, yip tö aṙēḵlöng tökööl tökūö nup tötlöök la-enre hēk tö ruptukui* tökööl inrē, 8 töṙamölōn ön anga-aṅ tarik, ngòh töt havëkakūö tö kinṙötngö tököölre tö Yāvē.”*
9 Höng taneūngen yip tarik hòng ngih ṙanamlōn yip tö tunyinyiyö? Hö-ö hòng inrē angū-ö nö taneūngen yip töt tunyinyiyö? Pò hī öi ngö ṙô: “Kaheūkö ön Aprahām nö tölöök tökūö ngam ṙinatö-ellōnre.” 10 Ihē ök nö kaheūkö nö tölöök, urēhěkūö inlahenre hòng nö tunyīnyi hēk unôichrit inlahen ò röng nö tunyīnyi? Öl rēhěn hē e anga-aṅ nö tunyīnyi ngaich nö kaheūkö nö tölöök. 11 Pòrô anga-aṅ nö öl nö tunyīnyi ngaich ṙatö-ellōnre nö in ò, angū-ö lāinyngen ngam Tēv nö kaheūkö ò nö tölöök ngaich hameuktö minkahngö* ngam lanöököre anga-aṅ nö tölöṙô nö tunyīnyi, hòṅ ò nö yöng yip taṙòkhöre yip töt tunyīnyi ngaich kaheūkö nö löök tökūö ngam ṙinatö-ellōnre, 12 hěnghöre yöng cha inrē yip tö tunyīnyiyö, tö ngö manah, rö-ö nöng yip tö tunyīnyiyö pön yip ma-asīnkö el talöökö ök yöng hī Aprahām ngaich asīnkö ṙinatö-ellōn ò inrē pòrô anga-aṅ hē e nö öl nö tunyīnyi.
13 Pön öt lökten im chööngö ngam kinlēḵngô nö in Aprahām hēk in yip kūön* ò inrē nö cha-a min nö amīnu töng panam, pön lökten in ngam ṙinatö-ellōn ò inrē nö kaheūkö nö tölöök. 14 Lökten yěn höng yip lamök im chööngö tö amīnuvö ngaich höng chanök alaha ngam ṙinatö-ellōn hēk höng yëḵngen ngam kinlēḵngô. 15 Pò ngam Chööngö nö vamīlö tanāinyö, ichūök ngam chööngö pöri nö hö-övö ngaich öt ōt inrē pumyāyngen e.
16 Lökten nö kūö ngam mikūönlö Aprahām ngam ṙinatö-ellōn ò hēk löktö in ngih kinlēḵngô inrē nö meūkö ngam tökiröng miṙēḵlōn ngam Tēv ngaich kô-en ngih kinlēḵngô nö in yip taṙòkhöre kūön* ò, tö ngö manah tö e nöng rö-ö nöng in yip lamök im Chööngö, pön in yip tö sā ṙinatö-ellōn Aprahām inrē ngam yöng hī öi ṙòkhöre. 17 (Ngatī inlahen angū-ö sā kinūichngö e nö ngö: “Vīlen meh chin yöng yip tö pōyen pumnāmö tarik.”) Ikūö ngam Tēv angū-ö ngam chūök ò nö ṙatö-ellōnre hēk ngam maha-aṅlö yip tökapah inrē hēk ṙamôten nup ṙô inrē tö öl nö teungtökūö nö in në ṙētak hī nö sā tö ngaich nö hòṅ teungtökūö anū-ö.* 18 Rö-ö pön keuheūt ngam maheūṅkkö Aprahām, sön pöri anga-aṅ nö ṙatö-ellōnre nö im maheūṅkköre tö ò min nö yöng yip tö pōyen pumnāmö tarik sā e nö kilē-ěyö nö in ò: “Ngatī ṙôken yip min kūön* meh.” 19 Rö-ö ngaich ang Aprahām pön öt kalē-en el alaha (pò ò lohten ngaich nö 100 samyeūheu ṙēḵti) akahakūö inrē anga-aṅ tö öp pīhöre Sëra nö ötkô nö kūönu,* sön pöri ngam ṙinatö-ellōn ò nö öt kūöṅnngöre. 20 Öt katööngaṙen anga-aṅ tökūö kanūöṅnen ngam ṙinatö-ellōnre nö im kinlēḵngô ngam Tēv, hameuktu pöri anga-aṅ nö kālēḵ tökūö ngam ṙinatö-ellōnre ngaich hapōilen ngam Tēv inrē anga-aṅ, 21 ṙatö-ellōnre takô anga-aṅ tö ngam Tēv kumlēḵngôre nö öthō min anga-aṅ nö öt hateunngen u. 22 Lökten, “angū-ö chö-öiny ò nö kaheūkö nö tölöök.”
23 Ngam tö kūichi pöri imat ngam līpöre nö ngö, “kaheūkö anga-aṅ” nö rö-ö nöng ṙôtö inlahen ò, 24 pön ṙôtö inlahen hī inrē ayī-ö, kaheūkö in ayī-ö inrē öi tölöök, pò hī öi ṙatö-ellōnre im Tēv ngam mahachohlen ngam Mā hī Yēsū nö ṙā-ang in yik tökapah. 25 Kētu ang Yēsū nö im kinpaha nö chö-öiny tö minë tökööl hī ngaich pöri anga-aṅ nö hachohlöng nö chö-öinyten hī öi kaheūkö öi tölöök.