Innëtö Chitri Yik Aṅ Kòrin
4 Lökten hē ih öi kē-ěvkūö tö ngih la-en kūö ngam neūkölōn nö hameuktu nö in ih ngaich öt heūlngöre īhö öi ngatī inlahen. 2 Ṙāngen minë la-en michīl pöri īhö minë tö sirōngkūö tī, hö-ö in inrē michīl hēk ötrēhěn öi kēhöt nup tahëng hēk kēngen nup tahëng öi in minë ṙô ngam Tēv, vënyö ngam kanô-en pöri öi hameuktöre ikūö ngam Tēv öi löökö la-en, hòṅ ngam elkuilōn yip taṙòkhöre tarik nö akahakūö tö e. 3 Ngam tölöök inhānga tö-eūka tö ih, yěn kô-en ngam hilā nö harangngökūö e ngaich angū-ö ngih hilā nö chö-öinyten yip tarik kamū-ötö in ngam ötinkôlò. 4 Tilūpi ön ngam mikah yip töt ṙamatö-ellōnre tö ngam tēv ngih panam,* hòṅ ngam yanāngö ngam tölöök inhānga inlahen Kristū ngam nyat ngam Tēv nö öt meūkö tö cha. 5 Lökten īhö rö-ö öi höng vënyö inlahenre, ahangkö inlahen Yēsū Kristū pöri öi vënyö inlahen ò nö anga-aṅ Mā hēk vënyö inlahenre inrē öi chö-öinyten Yēsū öi mahalanṙen yīö. 6 Lökten sā ṙô ngam Tēv nö ngö ṙô: “Yang an yēḵ ngam hanātö nö el sinngūlö,” anga-aṅ an mahayangtö ngam hanātö nö ellōn hī, hòṅ hī öi hayangtö mat cha tö ngam töt insā-av mikah elmat ngam Tēv ngam tö meūkö nö i arëkūö Kristū.
7 El tanīöyö pöri ngih töpōiṙāi chehen nö in ih, hòn hameuktu ngam kumlēḵ nö tö mööḵlö angū-ö tö kumlēḵ töng tarīka, ngam taneūngen hī löktö in ngam Tēv, rö-ö nö aṅ in ih. 8 Keuheūtngöre la-a kinrāchö in īhö, höng öt yahngen inlahen pöri öi öt maheūṅkku ngaich töp inlahenre. Kô-en in kasëṅ-a, öt yaha ṙôken kinsëṅ-a pöri öi uroh öi öt meuk talöököre.* 9 Ötlēkaṙen īhö, hö-ö pöri öi ṙā-ayö. Afūkiyö īhö, hö-ö pöri öi ahetiyö. 10 Kaheuk ṙētak īhö öi höng ötlēkaṙen hēk kētu inrē eltī ngam kinpaha sā inlanken Yēsū, hòṅ ngam nômö Yēsū nö meūkö im alaha ih. 11 Lökten ayī-ö öi tö aṅ öi kaheuk ṙētak öi la-al ngam kinpaha, hòṅ ngam nômö Yēsū nö meūkö im tö chuhngöre alaha hī. 12 Ngatī inlahen ngam kinpaha nö la-evṙen nö in ih, in yīö pöri ngam nômö.
13 Ngatī inlahen an ngam ṙinatö-ellōn nö in ih ngam tökūichi inlahen nö ngö ṙô: “Ṙatö-ellōnre chin chū-ö lökten öich ṙò-òv.” Ngatī in īhö inrē ṙatö-ellōnre, lökten öi ṙò-òv. 14 Pò hī öi akahakūö tö ngam mahachohlen Yēsū misī, ngatī inrē min anga-aṅ nö hachohlen hī öi hol Yēsū ngaich holten yīö min īhö öi kētu öi chuh lākūö ò. 15 Ṙòkhöre nun nöng chö-öinyten yīö, hòṅ ngam tökiröng miṙēḵlōn nö ikui yip tö pōyen tarik, pò yip tarik nö pōyen yip kamëtö nöönyö ngam Tēv ngam löktö ò nö hapōilöng.
16 Lökten in ayī-ö öt heūlngöre, pòrô ngam lamātunyī tarik* in ih nö chuhngöre, sön pöri ngam lamātuhēt tarik in ih nö tumfömlöng nö kaheuk sakāmö. 17 Rö-ö pön töng rahëichyen hēk töng öt yahngen minë kanihngen* hī, kētö ngam kanôlò hī pöri angū-ö ngam töt insā-av* hēk tö örheūheu inrē nö köp. 18 Lökten in ayī-ö in ngih ṙētak öi öt haköpmatre öi ngëichkö nup tö meūkö chehen, haköpmatre pöri öi ngëichkö nup töt meūkö chehen. Lökten nup chehen tö meūkö, töng rahëichtakūö anū-ö i ngih ṙētak, nup töt meūkö pöri chehen, örheūheu anū-ö nö köp.