Innëtö Chitri Yik Aṅ Kòrin
1 Chū-ö Pôl, öich löktö i kuilōn ngam Tēv öich tö hěngtak tanīnöṙô Kristū Yēsū, holten ngam prötör hī Timôtī chin öich kūich ngih chitri më prötör aṅ Kòrin, më aṅ el ngam māṅ ngam Tēv hēk in yip taṙòkhöre inrē töhet tarik tökeuheūtngöre chūök nö i Akāya.
2 Teūngen yin yēḵ tö ngam tökiröng miṙēḵlōn hēk lanāmö öi löktö in ngam Yöng hī ngam Tēv hēk ngam Mā Yēsū Kristū.
3 Nöönyö ngam Tēv, ngam Yöng ngam Mā hī Yēsū Kristū, tö aheūkölōn anga-aṅ nö Yöng hēk Tēv kamëtö nup töng sitih inreuskö alaha, 4 kamëtö inreuskö alaha hī anga-aṅ öi in nup taṙòkhöre kinlaha, hòṅ hī öi kēten e angū-ö inreuskö alaha öi in yip tarik yip tö ngatī inlahen nö la-al minë kinlaha, ngam taneūngen ih löktö in ngam Tēv. 5 Lökten sā hī öi pōyen inkihten öi chö-öinyten Kristū, ngatī inlahen inrē öi pōyen taneūngen tö inreuskö alahare öi löktö in Kristū. 6 Pòrô ayī-ö la-al nup kinlahare, sön anū-ö nö chö-öinytö inreuskö alaha yīö hēk inyööken yīö inrē. Ngaich yēḵ ih öi teūngen tö inreuskö alahare ngaich löktö in e inrē yī-ö öi teūngen tö inreuskö alahare. Hayööken yīö ön min ngih inreuskö alaha öi la-al nup taṙòkhöre kanihngen, nup kanihngen ih inrē. 7 Köp ön ngam maheūṅkkö ih tö inlahen yīö, pò ih öi akahalōn tö yīö öi sā inlahen ih öi la-al nup kanihngen, ngatī inrē yī-ö öi sā ih öi teūngen min tö inreuskö alahare.
8 Kahōlö, öt lōnu in tö yīö öi öt akahalōn tö inlahen kanihngen ih öi i Ēsiā tistrik. Pōyen takô minë kanihngen ih ngaich öi höng sā töng ötkô öi la-al u, ngölōn ngaich īhö töre öi höng öt aṅ. 9 Uroh īhö öi ngölōn töre öi ahangnyu sācha min tö ngam kinpaha. Ṙën pöri angū-ö nö ngatī, hòṅ ih öt ṙatö-ellōnre öi in re, in ngam Tēv pöri ngam mahachohlen yip tökapah. 10 Laklen ih anga-aṅ öi ṙā-ang in ngam tökiröng kanihngen ngam kinpaha, ngatī inlahen hēk min anga-aṅ nö laklen ih. Meūka in tö ò nö iṙūöhen min hēk nö laklen ih. 11 Mihôiṅ yin yī-ö inrē öi hayööken ih öi havë-a, hòṅ ih öi teūngen tö ngam miṙēḵlōn nö löktö i ṙô yip töpōyen vamë-ekūötēv ngaich yip töpōyen tarik nö ṙënngö ṙô ih nö kētö nöönyö.
12 Eū ngam inlahenre in hēk vë-eny nang ih inrē ngam lamātuhēt elkuilōn ih tö inlahen ih öi ing panam, möthë öi holtö hanëtöre hēk kanô-enre öi elhôi yīö, nup haköptö ngam Tēv ngaich öt hayönglenre īhö in nup mikah ngih panam, in ngam tökiröng pöri miṙēḵlōn ngam Tēv. 13 Rö-ö pön öt tahëngu ṙô kahūichtö ih, nup mikah elnang yīö min yěi haköpö u* ngaich maheūkku chū-ö tö yīö öi keuheūtlöre* mikah elnang tö në ṙô 14 sā yīö ngaich öi rahëichyen mikah elmat tö ih öi löktö ineū-eu yīö hēk ngatī inrē yī-ö öi kaheūkö öi löktö ineū-eu, öi im sakāmö ngam Mā hī Yēsū.
15 Holtö ngih ṙinatö-ellōnre chū-ö öich ngölōn töre min öich ip innëtvanre öich chuh in yīö, hòṅ yīö hēk öi teūngen tö ṙētakre öi ṙamölōn.* 16 Pò chu öich ngölōn, yēḵ chu min öich chuh Maketònī hēk havan öich löktö in e ngaich el talöököre min öich meukkūö yīö, ngaich vai rôvat min yī-ö öi söömngen chu öich chuh Yūta. 17 Hē chu öich halēn ngam ellōnre, ngaich holtö öt mikah elmatre hòng chū-ö öich ngatī inlahen? Ngaich yēḵ chu halēn ngam ellōnre ngaich höng kamnahanglōnre hòng chū-ö öich ngatī inlahen, urěh sin öich “Heūṅ, heūṅ” ngö ṙô, ngaich unôichngöre öich “Hö-ö, hö-ö” ngö ṙô? 18 Sā ṙinatö-ellōn hī mihôiṅ in ngam Tēv, ngatī ṙinatö-ellōn yī-ö mihôiṅ öi in ih, yēḵ ih ngö ṙô öi in yīö “heūṅ” ngaich öt tö ngö manah angū-ö “hö-ö.” 19 Pò ngam Kūön ngam Tēv ang Yēsū Kristū ngam tö ahangka tö ih, tö ngö manah tö chu chū-ö Silvanös* hēk Timôtī inrē nö elhôi yīö ngaich hö-ö angū-ö nö urěh nö “heūṅ” ngaich unôichngöre nö “hö-ö,” pön in ngam inlahen ò nö meūkö ngam manah ngam “heūṅ” nö örheūheu nö “heūṅ.” 20 Pò nup taṙòkhöre töng sitih kinlēḵngô ngam Tēv, ṙòkhöre anū-ö nöng löktö in ò nöng heūṅ. Lökten ayī-ö öi löktö in ò öi “Āmen” ngö ṙô im Tēv ngaich löktö in e ngam nöönyö ngam Tēv. 21 Ngam kamëtö ngam tökiröng pöri ṙinatö-ellōn hī tö yīö hēk tö ih öi aṅ in Kristū hēk ngam mahacham elkui hī anga-aṅ ngam Tēv. 22 Mikahngö kanô-en ṙô re anga-aṅ nö in ih hēk vënyö inlahen öp tö hòṅ yamih anga-aṅ ngam tö ngö manah töhet kumlēḵ ngam tö vīhötvö tö ò nö ellōn hī.
23 Ṙën chin öich öl öich yih i Kòrin, pò chu öich öt lōnu töre öich pōyen miṙivlōn tī tö yīö, hökngen ngam Tēv nö vënyö inlahen chu yēḵ ngih ṙô nö tö minyôiny. 24 Rö-ö nö kūö ih öi yöngkūö ngam ṙinatö-ellōn yīö, pöi chö-öinytö ngam ṙanamölōn yīö öi holṙen yīö, pò yīö öi söktöhëich öi holtö ngam ṙinatö-ellōnre.