I minë-eny Kalatī
1 Ngih chitri lamöktö in chu chū-ö Pôl, ötrēhěn nö lamöktö i tarik hēk ötrēhěn öich vīlöng tanīnöṙô öich löktö i tarik, vīlöng pöri chū-ö öich tanīnöṙô tö ngam Tēv ngam Yöng hī nö löktö in Yēsū Kristū ngam tö hachohlöng tö ò nö ṙā-ang in yik tökapah, 2 kūich ngih chitri chin hēk tö më hol chu inrē prötör nö ṙòkhöre nö chamuh el minë māṅ i Kalātiya tistrik:
3 Teūngen yin yēḵ tö ngam tökiröng miṙēḵlōn hēk lanāmö öi löktö in ngam Tēv ngam Yöng hī hēk löktö in ngam Mā Yēsū Kristū. 4 Kēngö nômöre Kristū töpòkūö minë tökööl hī nö asā lōn ngam Tēv ngam Yöng hī, hòṅ hī öi ṙānyu öi ṙā-ang in ngih tötlöök panam i ngih ṙētak* töngamuh, 5 kanôlò ngam Tēv yēḵ nöng örheūheu. Āmen.
6 Pingangkūö chin tö inlahen yīö öi höng ilööṙen havööngökūöre tö ngam Tēv ngam mahavëten yīö nö hameuktö ngam tökiröng miṙēḵlōn Kristū hē e ngaich yī-ö töngamuh öi kū-ö tö in minë tahëng tölöök inhānga. 7 Öt ōt ngöre vö pöri hēk tahëng tölöök inhānga, rö-ö pön kô-en yip rīkre tarik mu-umuh vamīlö kanihngen yīö ngaich hòṅ pisūngen ngam tölöök inhānga cha-a inlahen Kristū. 8 Pòrô in īhö öre hēk tö yip ma-ahānga aṅ el halīöngö öi i minë-eny ngam tölöök inhānga ngam tö ahangka tö ih öi in yīö ngaich tahëngö ṙô öi ahangken ngam tölöök inhānga ngaich tötkôlò anga-aṅ nö kaheūkö. 9 Hēk Chin öich havannyö ṙôre, töp ṙô ih öi höng fömngöre ṙô, ngam tölöök inhānga töhō-ovö tö yīö, yěn ōt mi-i minë-eny e nö tahëngö ṙô nô haköphöti ngaich kaheūkö anga-aṅ nö tötkôlò.
10 Hö-ö Chin öich haṙamlōn tarik pöich hòṅ haṙamlōn ngam Tēv. Ngö lōn hòng yī-ö tö Chu öich hòṅ haṙamlōn tarik? Yēḵ Chu öich ṙömöng haṙamngölōn më tarik ngaich hö-ö Chū-ö öich mahalanṙen Kristū. 11 Kahōlö, mikahtölōn yīö Chin, tö ngam tölöök inhānga vahënyö Chu öich in yīö, hö-ö ön nö lömöktö i tarik, 12 pò Chu ötrēhěn teūngen tö e öich löktö i tarik, ötrēhěn öich haköp öich löktö i tarik pön hakôtenre ang Yēsū Kristū nö hameukten e nö in Chu.
13 Kô-en yin sin urěh hamang inlahen Chu öich ṙamatö-ellōnre öich in ngam tinlööken Yahūti ngaich sitih inlahen tinrīken Chū-ö, tö miyëḵ Chin sin tö ngam māṅ ngam Tēv hēḵ piyāingen e inrē, 14 hēk Chū-ö kamū-ö urěh öich in ngam tinlööken Yahūti öich im panam hēk in yip tarik inrē tö sā ṙēḵtire, pò Chu öich Chū-ö tö ngöt öich hang minë kui panam yik muvöhngö ih misī. 15 Ngam Tēv pöri ngam famötnyen Chu öich ing panam hēk hameuktö ngam tökiröng miṙēḵlōnre nö in Chu nö havëten Chu, ṙamölōn anga-aṅ 16 nö löktö in Chu nö hameuknyö ngam Kūönre, hòṅ Chu öich vënyen ngam tölöök inhānga inlahen ò öich in më tahëng mihëṅṙö ngaich öt ilööṙen Chū-ö öich chuh i tarik öich kēḵ inlēnöre tö inlahen e, 17 ötrēhěn öich chuh Yērūsalem öich in yip tö urěhten nö tanīnöṙô tö Chu, chuh in ngam panam pöri Chū-ö Arēpīa ngaich unôichrit e öich havan öich i Tāmöskös.
18 Ngaich unôichrit tölūöi samyeūheu Chū-ö öich chuh Yērūsalem öich chuh in Kīfös* ngaich 15 sumkam öich iyöng in ò. 19 In e Chū-ö öich meukkūö Yāköp ök kahëm ngam Mā, öt tahëngu hēk maheukkūö Chu tanīnöṙô, höng anga-aṅ. 20 Höng ngam Tēv an vamënyö në inlahen Chu, minë ṙô kahūichtö chu öich in yīö nö töt minyôiny anū-ö.
21 Unôichrit e Chū-ö öich chuh in minë kamngö i Sīriā hēk i Kilikiā. 22 Öt ha-eh pöri nö meūkö Chu yip aṅ minë māṅ Kristū i Yūta. 23 Höng töng hamang inlahen chu sin minë māṅ nö ngö: “Ngòh tarik mu-urěh sin nö öt lamëken hī ngaich an töngamuh nö ahangkö ngam tölöök inhānga nö vënyö inlahen ngih ṙinatö-ellōn, ngam tö urěh sin nö piyāyi tö ò.” 24 Lökten ngaich cha-a nö ha-öiny ngam Tēv töpòkūö Chu.