I minë-eny Heprāi
2 Lökten ayī-ö hòṅ mötlö chumkūöṙen tö nup tö ngaich ahangre ṙô, hòṅ hī öt amahaiṙen hëmngö ṙā-ang in u. 2 Yēḵ nup ṙô lamöktö in më ma-ahānga nö hameuktu nö köp ngaich yip tököölö fālen nö la-al ò hēk filal chööngö ngaich teūngen cha-a tö sāchare nö asā ngam kinṙôka, 3 sitih inlahen öi min ötkò-òngvah yěi öt chumkūöṙen tö ngam tö ngatī ṙôken inyööken? Ngam Mā hī an misī mu-urěh vamënyö inlahen e ngaich yik tarik hamang nö löktö in ò ngaich hameuktu anū-ö nö kô-en nö in hī tö cha, 4 hameuktö minkahngö hēk pinngangkūö inrē ngam Tēv hēk löktö in nup töṙōlkangen la-en minhôiṅyö ngaich asā ngam kuilōnre anga-aṅ nö katölngen ngam inlōnti ngam töhet kumlēḵ nö vë-eny.
5 Ngam yamih min panam, ngam tö eūka tö hī, öt më-el katòh më ma-ahānga angū-ö nö kētu tö ngam Tēv. 6 Ngö ṙô pöri ngam tö hěngtak vamë-eny: “Asuh ang ngòh tarik töp lāinyngen meh öm chumkūöṙen tö ò, asuh ang ngòh tarik tö meh öm meukṙen ò? 7 Pò meh vīlen ò nö kūöṅnö hö-ö tö më ma-ahānga ngaich sumpīövlen ò tö ngam ineū-eu hēk minlēḵṙen ngaich kētö chööngö ò më-en nö in minë la-en kūö kuntī meh. 8 Kô-en më-eṅ öm keuheūtten minë taṙòkhöre chehen nö iröön ò.” Hē ngam Tēv nö kēten në taṙòkhöre chehen nö elkatòh ò ngaich öt hēngö ṙahāngö anga-aṅ nö in ò nö töt më-elkatòh ò. Kô-en, öl pöri ayī-ö töngamuh öi meuk nup taṙòkhöre chehen nö elkatòh ò. 9 Ngaich pöri ayī-ö öi meūkö Yēsū, ngam tökūöṅnö hö-ö vīni-i tö më ma-ahānga hēk sumpīövlöng anga-aṅ tö ngam ineū-eu hēk minlēḵṙen tökūö ò nö la-al ngam kinpaha, hòn löktö in ngam tökiröng miṙēḵlōn ngam Tēv anga-aṅ nö la-al ngam kinpaha töpòkūö taṙòkhöre tarik.
10 Pò në taṙòkhöre nö chö-öinyten tö ngam Tēv ngaich löktö in ò në taṙòkhöre nö ōt, tölöng angū-ö nö in ngam Tēv tö ò nö kētö ineū-eu më töpōyen kūönre ngaich hökngen ngam Mahachōkūö ngam tökatöllöng mahayööken nö kihngen ngaich ngatī inlahen nö vīten ò nö het. 11 Lökten yip ma-ahethölö hēk tö yip tö ahetlöng, ṙòkhöre cha-a nö lamöktö in ngam töng hěngtak Yöng, lökten anga-aṅ nö öt sirōngkūö nö holmaneuk ngö ṙô tö cha. 12 Sā ṙô ò nö ngö ṙô: “Vënyö ngam minë-eny meh chin min ikūö yip holmaneukre, elṙôngö ngam māṅ Chin min tikökṙôre tö nööinyö meh.” 13 Hēk ngih inrē: “Ṙatö-ellōnre Chin min in ò.” Hēk ngih inrē: “Yěh meuk! Tö Chu hēk tö vē nyīö, vē kahëtö Yāvē* nö in Chu.”
14 Lökten sā më nyīö nö alaha tö alaha tarik, ngatī anga-aṅ nö vī-ingre nö alaha tö alaha tarik, hòṅ ò nö löktö im kinpahare nö ahetngen ò, ngam Satān* ngam tö aṅhavin tö minhôiṅyöre nö fëlhang. 15 Ngaich ṙānyen cha nö ṙòkhöre më tö pa-ekūö tö ngam kinpaha më töhaköövö nö i rò-òtö nômöre. 16 Rö-ö anga-aṅ nö mahayööken më ma-ahānga, pön mahayööken yip kūön* Aprahām. 17 Lökten angū-ö nö töt ṙanāngen nö sā inlahen yip holmaneukre nö i tökeuheūttöre, hòṅ ò nö hameuktö neūkölōnre nö in minë ṙô tö nôlhöt nö in ngam Tēv hēk vī-ire nö tökô-en nö mākūö kūönṙô inrē ngaich kētö tökētu nö inlām tökööl yip tarik.* 18 Kôten inrē anga-aṅ nö kihngen ik ṙētakre hē ò nö kalaha, lökten anga-aṅ töngamuh nö heuveū-en nö hayööken yip tarik yip mi-im kinlaha.