I minë-eny Heprāi

9 Ōt misī nuk inchöngten tö hòṅ hateūngi nö chö-öiny tö minë töhet la-en nö in ngam mu-urěh kinlēḵngô, ōt inrē ök töhěng misī töhet chūök nö ing panam. 2 Ngam tö vī-i raneh alaha ök inrūkui ök tö aṅhav tö chūök rööntö manyaṅk, mīs hēk tökētu ròtī,* ngaich kaheūkö angū-ö nö töhet chūök. 3 Kaheūkö pöri nö töhet kūö töhet ök lā-uk ngam innëtö ranangkūö hilā. 4 Aṅhav angū-ö tök sunna chūök tö tahūsa töfööngö hēk kasòng chööngö ök tö keuheūtngöre alaha tö sunna, el ngam kasòng ök sunna tanīöyö tö aṅhav tö nuk manna hēk tök tinkung Āròn ök tö sīöpnyi rōi hēk nuk tö mitāk inrē chūök kinūichö ngam chööngö. 5 Vī-i nak tökirööngö minā-aṅ kërup nö ikui ngih kasòng nö mahanyattö kui ök chūök inṙē-ěl. Ötkô pöri töngamuh öi keuheūtnyöre ṙô öi vënyö inlahen në taṙòkhöre chehen.

6 Hē vīnilö në taṙòkhöre chehen ngaich örheūheu yip kūönṙô nö urěh nö kuhēthötre nö el ngam raneh alaha ngam inrūkui yěn hòṅ kēken ngam töhet la-en. 7 Höng yik mākūö kūönṙô chamuh el ngam innëtö alaha ngam inrūkui nöng hěngheuh i tö hěng samyeūheu, öt kuhēthötre pöri cha-a yěn öt kūmu tö ngam mahām ngam tökētu nö inṙē-ěl tökööl cha hēk yik tarik töt tamölngenre nö kēken tökööl. 8 Ngatī inlahen ngam töhet kumlēḵ nö hameuknyö ngam talöökö ngam töhet chūök* nö öl nö vīnyukūö hanöng saha ngam raneh inrūkui* nö söktöhëich. 9 Höng nyat ön ngih inrūkui in ngih ṙētak töngamuh ngaich asā ngam tö halēnlöng nö tökētu inlōnti hēk tökētu inrē, öt keuheūtngöre tī pöri ngih inlōnti hēk tökētu nö hetlöre tī tö ngam lamātuhēt elkuilōn ngòh tarik tö la-evṙen tö tölöök. 10 Tö nôlta ngih inlōnti hēk tökētu nöng in minë nyinā-avkūö hēk sinöichlö minë tö ṙōlkangen inlanen,* höng inteungngö minë chööngö inlahen ngam alaha nun misī ngaich ṙömöng kēkaṙen anū-ö hanöng saha ngam ṙētak inlööktö në taṙòkhöre nö öl nö yih.

11 Ngaich pöri Kristū nö yih nö mākūö kūönṙô, hòṅ ò nö kumtö nup tövai inkôlò hī nup taneūngen hī ngaich, kuhēthötre anga-aṅ nö el ngam inrūkui ngam tö mötlö kinrööngö hēk hanëtö inrē. Öt tövī-i ön ngih inrūkui tö kuntī tarik, tö ngö manah öt alaha minë tövīlöng ing panam. 12 Öt kumtö mahām pöököre hēk nuā anga-aṅ, hakôtenre pöri nö kumtö ngam mahāmre nö urāngen nöng hěngheuh nö kuhēthötre nö el ngam töhet chūök ngaich kētö ngam tö örheūheu ṙinānyö hī.* 13 Yēḵ nup mahām pöököre hēk nuā hēk yěn piṙōngtu kui yip tötlöök tarik tö nup tisum kun nuā ngaich hetlöre ngam alaha cha nö ikūö ngam Tēv. 14 Ngaich ngam mahām Kristū ngam töng urāngen nö köp nö löktö im töhet kumlēḵ nö hakôtenre nö kētö ngam töt fāluṙen alahare nö ikūö ngam Tēv ngam tö mihôiṅ nö pōyen tī nö ha-etlö ngam elkuilōn hī nö in nup yanëḵngen la-en,* hòṅ hī öi la-evṙen tö minë töhet la-en ngam tö aṅ Tēv.

15 Angū-ö ngih lāinyngen ò nö ihôi ngam tö tufömngöre kinlēḵngô, hòṅ yip tö havëtu nö teūngen tö ngam kinlēḵngô ngam tö örheūheu amin, löktö i kinpaha ò minë taṙòkhöre nö ngatī inlahen ngam kamëtö ngam ṙāi ṙinānyö nö ṙānyen cha nö ṙā-ang in minë tökööl ngam inlahen cha sin hē cha nö elkatòh ngam kinlēḵngô. 16 Yěn ōt öp tarik kumlēḵngôre ngaich tö hòṅ kapah anga-aṅ ngam kumlēḵngôre tö e. 17 Pön yěn kapah ngam kumlēḵngôre ngaich möl nö kēkaṙen ngam töhěng kinlēḵngô hanöng saha ò pöri nö ṙömöng aṅ ngaich öthō nö kēkaṙen ngih kinlēḵngô. 18 Angū-ö lāinyngen ngih raneh kinlēḵngô nö lökngörit im mahām nö kô-en nö hateungtukūö. 19 Hē Môsös nö vë-ekūö nuk taṙòkhöre chööngö nö ikūö yik tarik ngaich kēḵ ök mak anga-aṅ nö holtö mahām nuk pöököre ngaich löktö im tö ngāṅv sanôi pöököre hēk chōn hissòp anga-aṅ nö kichënykui ngam līpöre* kinlēḵngô hēk tö yik taṙòkhöre inrē tarik, 20 ngaich ngö ṙô: “Löktö ing mahām nö hateungtukūö takô ngih kinlēḵngô ngam hinôtö yīö öi hang ngih chööngö ngam tökētu tö ngam Tēv nö in yīö öi ṙòkhöre. 21 Ngatī tī anga-aṅ nö kichënytö ngam mahām nö ikui ngam inrūkui hēk tö minë taṙòkhöre tanīöyö tö yūsö nö in minë töhet la-en.* 22 Kô-en, asā ngam Chööngö ngaich nöng hòṅ keuheutlöre nö ha-etlöng tö ngam mahām hēk hanöng saha ngam mahām nö öl nö kitaknyu ngaich öthō öre öi teūngen tö inṙē-ěl tökööl.

23 Lökten nö urööṙen minë nyat minë chehen aṅ el halīöngö nö hòṅ ha-etlöng tö ngam mahām nup töṙeūla, hòṅ ha-etlöng pöri minë chehen aṅ el halīöngö nup tö mötlö tö alaha töṙeūla tökētu. 24 Pò Kristū nö öt kuhēthötre nö el ngam töhet chūök vahīkūö kuntī tarik ngam töng insā ngam tökô-en, kuhēthötre pöri anga-aṅ nö el halīöngö, lökten anga-aṅ töngamuh nö hameuktöre nö ikūö ngam Tēv nö chö-öinyten tö hī. 25 Öt ṙōlheuh an min Kristū nö kēngö nômöre nö sā inlahen yik mākūö kūönṙô nö öt hěnghang samyeūheu nö öt kuhēthötre nö kumtö mahām nuk töṙeūla nö el ngam töhet chūök. 26 Yēḵ Kristū öre nö ṙōlheuh nö kēngö nômöre ngaich iṙôken kanihngen öre anga-aṅ nö löktökūö ranehlö ngih panam ngaich pöri anga-aṅ nöng hěngheuh nö urāngen nö hameuktöre nö ing manā-aṅ sakāmö ngih ṙētak ngih panam,* hòṅ ò nö kēngö nômöre nö ha-etngen ngam tökööl. 27 Sā inlahen vē tarik nöng hěngheuh nö kapah ngaich unôichrit e ngam kinṙòkken cha, 28 Ngatī ṙēngen ang Kristū nö keun kanihngen yip tömaṙôngö tarik nöng hěngheuh nö urāngen nö kēngö nômöre, ngaich ip innët van ò min nö yih, öt maha-etngen ngam tökööl* min anga-aṅ nö yih ngaich cha-a min mameūkö ò yip tö maheūṅkku nö hökken ò nö hòṅ teūngen tö inyöökenre.