I minë-eny Heprāi
7 Ngòh Melkisitěk ngam rācha aṅ Salem hēk kūönṙô ngam Tēv Lamātulöng tö në taṙòkhöre, meukkūö Aprahām anga-aṅ ik ṙētak hē ò nö havan nö ṙā-ang i finëlngö yik rācha ngaich kētö inkôlò Aprahām anga-aṅ, 2 ngaich hěnghata i tösöm ang Aprahām nö kētö nuk taṙòkhöre chehen nö in ò. Ngòh Melkisitěk nö asā ngam manah ngam minë-enyre nö urěh nö “Rāchakūö Lanöökö,” hēk rācha aṅ Salem inrē anga-aṅ, ngam tö ngö manah, “Rāchakūö Lanāmö.” 3 Ötrēhěn anga-aṅ nö tö yöngu tö kikōnyö hēk kikānö, ötrēhěn inrē nö tömichaplu, ötrēhěn nö tö ranehlu inuk sakāmö ò, ötrēhěn nö tö manāngenvö ngam nômö ò, kaheūkö pöri anga-aṅ nö sā Kūön ngam Tēv, lökten anga-aṅ nö köp nö kūönṙô.
4 Yěi fē-a tö kinrööngö ngòh tarik misī nö hěnghata i tösöm nö in nuk tövai takô chehen kahil ngam yöngkūö ngam mikūönö* Aprahām. 5 Kô-en nö asā ngam Chööngö yik kūön Lēvi yik tö teūngen tö ngam la-en kūönṙô, kētu chööngö cha-a nö hamūl tö hěng nö i tösöm nö in yik tarik, tö ngö manah, in yik holmaneukre, pòrô yik holmaneuk cha nöng lamöknyö in Aprahām. 6 Ngaich pöri ang Melkisitěk ngam töt mikūönö Lēvi, kēḵ tö hěng nö i tösöm nö in Aprahām, ngam tökilē-ěyö misī ngaich kētö inkôlò ò. 7 Öt hěngtak tökô nö halôngen ngih ṙô tö ngòh tökūöṅnö nö kētu inkôlò tö ngòh tökiröng. 8 Inuk tö urěhngöre inlahngen, tö ngö manah, nuk inlahngen yik Lēvi, yik tarik tö teūngen tö töhěng nö i tösöm, kapah cha-a, in ngam tahëng pöri inlahngen anga-aṅ nö eūka nö aṅ. 9 Hēk mihôiṅ inrē öi ngö ṙô tö më Lēvi nö teūngen tö töhěng i tösöm nö in yip tarik, löktö in Aprahām nö kē-ěvkūö öp tarik tö töhěng i tösöm, 10 pön hē Melkisitĕk nö meukkūö Aprahām ngaich ṙömöng el alaha Aprahām ang Lēvi ök muvöhngöre.*
11 Yěn kô-en ngam hanëtö nö teūngen nö löktö in nuk la-en kūönṙô Lēvi (ngam Chööngö tökētu nö in yik tarik ngaich alaha ngam la-en kūönṙô angū-ö misī) ngaich asuh hēk vinīlö ök tahëng kūönṙô ngam tö vënyu inlahen nö sā inlahen Melkisitĕk, rö-ö nö sā inlahen Āròn? 12 Lökten, yēḵ ngam la-en kūönṙô nö haṙīlöng ngaich hòṅ urööṙen ngam Chööngö nö hòṅ haṙīlöng. 13 Pò ngòh tarik tö vënyu inlahen, aṅ ngam tahëng miyööngö anga-aṅ ngaich öt hěngheuh yip tarik ò nö katöllöng nö la-evṙen nö el ngam tahāklö. 14 Ngaich takô ön nö lööknyi mineūkö tö ngam Mā hī nö lamöknyö im miyööngö Yūta, öt hěngheuh pöri ang Môsös nö ṙò-òvö töm kūönṙô min nö löknyö in ngih miyööngö.
15 Hēk ön nö lööknyi mineūkö takô, pò öp tö hěngtak kūönṙô nö ngaich nö yih nö chö-öinyten tö hī, ngam tö sā Melkisitěk nö kūönṙô, 16 ṙënten anga-aṅ nö öt vīlöng nö kūönṙô, pò ò nö lamöktö im miyööngö yip kūön ngam ma-asā ngam chööngö nö vī-ilre nö kūönṙô, löktö in ngam kumlēḵ pöri anga-aṅ nö vī-ilre nö kūönṙô, ngam kamë-ekūö ò tö ngam töt kinpahavö nômö. 17 Pön ngö ineūkö inlahen anga-aṅ: “Sā Melkisitěk man min öm kūönṙô hēk örheūheu inrē min më-eṅ öm kūönṙô.”
18 Ṙën ngam chööngö tö urěhngöre nö rökiṙen, pò e nö ötkalē-en misī hēk öt yanööluṙen tī inrē. 19 Öt hanetlu tī angū-ö Chööngö, hē ngam mineūka pöri tökētu ngam tö ěhten tö e ngaich mihôiṅ ngaich öi löktö in e öi hetlöre hēk löktö in e inrē ayī-ö mihôiṅ öi haröhtöre in ngam Tēv. 20 Ngaich ngih mineūka nö tö hōlu tö ngam kinlēḵngô 21 (pön ōt inrē yip tarik töng öt kumlēḵngôre ngaich vī-ilre nö kūönṙô, ngòh kūönṙô pöri, ngam tövīlöng tö ngam Tēv nö kūönṙô nö löktö im kinlēḵngô ò, ngö ṙô anga-aṅ tö inlahen ò: “Kilēḵngôre an Yāvē* ngaich ngam kuilōn ò, ōthō anga-aṅ nö haṙīngen* e, ‘Örheūheu man më-eṅ öm kūönṙô’”), 22 asā e ang Yēsū nö vīlöng nö tö ěhten nö kamëtö kerentī ngam kinlēḵngô. 23 Hěnghöre urěh misī cha-a nö kö unôichrit höö nö vīlöng nö kūönṙô, pò ngam kinpaha nö angū-ö tö tī-ivö tö cha nö öt köp nö im kamngö la-en kūönṙô, 24 ngòh kūönṙô pöri töng örheūheu nö aṅ, lökten anga-aṅ nö örheūheu nö köp nö im la-en kūönṙô ngaich öt hěngtak tökô nö kēngö ngam chūök ò. 25 Lökten yip lamöktö in ò nö yihtöre nö chuh in ngam Tēv ngaich heuveū-en anga-aṅ nö hayööken cha, pò ò nö örheūheu nö aṅ nö havëkökūö ngam Tēv nö chö-öinyten cha.
26 Hòṅ lōnu in ayī-ö inrē töp tö ngatī inlahen mākūö kūönṙô, öp tö chiplö, töt fāluṙen hēk töt pitōtu, öt sā inlahen yip tököölö fālen hēk yip tö hapōilöng nö el halīöngö. 27 Öt uroh anga-aṅ nö sā inlahen yip mākūö kūönṙô, yip kamheuk sakāmö nö kētö tökētu, urěh cha-a nö kētö tökētu nö chö-öinyten nup tököölre ngaich möl nö kētö tökētu nö chö-öinyten nup tökööl yip tarik, pò ò nöng hěngheuh hēk urāngen nö kēngö nômöre. 28 Vīlöng yip cha-a tarik nö mākūö kūönṙô nö asā ngam Chööngö, yip tö aṅhavin tö ötkumlē-enre, unôichrit ngam Chööngö pöri ngam tö chūöku kinlēḵngô, asā e ngòh Kūön nö vīlöng nö mākūö kūönṙô ngam töng örheūheu nö teungten nö im hanëtö.