Inlahen La-en Yik Tanīnöṙô

7 Ngö ṙô ngaich ök mākūö kūönṙô nö hatöönö ò: “Tökô-en ön në ṙô në?” 2 Sapṙô ò ngaich ang Istěfen nö ngö ṙô: “Kahōlö hēk yī-ö inrē tö ṙēḵtivö öi sā ṙēngen yöng chu, hangihtöre yin. Urēhěkūö ök muvöhngö hī Aprahām nö iyöng Haran ngaich urěh sin anga-aṅ nö mi-iyöng Mësopōtamiā ngaich hameukhumat anga-aṅ tö ngam tökiröng kanôlò ngam Tēv. 3 Ngaich ngö ṙô nö in ò: ‘Kiröönngöre man öm ṙāngen ngam panamre hēk tö yip mak alahare ngaich öp hameuktö chu min panam ngaich chuh in e min më-eṅ.’ 4 Kiröönngöre ngaich ang Aprahām nö ṙāngen ngam panam Kaltī ngaich iyöng Haran. Unôichrit kinpaha ök yöng ò, kēnyen ò ngaich ngam Tēv nö ṙā-ang ikūö öp panam ngaich tölṙô ò nö iyöng ikūö ngih panam ngih chūök yīö töngamuh öi iyöng. 5 Sön pöri ngam Tēv nö öt kē-ěkūö Aprahām tö tumlat nö ikūö ngih panam, ötrēhěn anga-aṅ nö kētö chūökröön ò. Kilēḵngôre pöri ngam Tēv tö ò min nö kēten ngih panam nö in ò ngaich unôichrit e min anga-aṅ nö kēten e nö amin yip kūön ò, nöng öl hē e ang Aprahām nö kūönu. 6 Ngö ṙô inrē ngam Tēv tö yik kūön Aprahām nö iyöng kūö minë tahëng panam nöng sā inlahen yik töt aṅkūö ngam panam, ngaich haköövö min cha-a tö yik tarik aṅ in e ngaich 400 samyeūheu nöng ötlēḵkaṙen. 7 Ngö ṙô hēk ngam Tēv nö in ò, ‘Ngam panam mahaköv vē tarik chu, kētö sachā cha chū-ö min, ngaich unôichrit kinheūten u min nö ṙòkhöre, kēnyu min cha-a tö chu, nö ṙā-ang in e ngaich i ngih chūökö min nö la-enten minë töhet la-en chu.’

8 Kilēḵngôre inrē ngam Tēv nö in Aprahām tö inlahen ngam tunnyinyngö. Hē Aprahām ngaich nö kūönu tö Isāk ngaich im hinëvhöre sumkam anga-aṅ nö tunyinyngen ò, fötnyu ang Yāköp nö löknyö in Isāk ngaich 12 tak yik kūön Yāköp* yik tö minā-av nö ikui yik mikūönöre. 9 Rāinyngö ngaich cha-a tö ngam kahëmre Yôsěf ngaich inyihngen ò nö in yik aṅ Aikup, örheūheu pöri ngam Tēv nö in ò. 10 Ṙānyen ò ngam Tēv nö ṙā-ang in nup töng sitih kanihngen ngaich kētö heuneū-en ò hēk mikah ò. Lökten ang Fërō nö ṙamlōn nö in ò, vīlen ò ang Fërō nö chöönguvö nö i Aikup hēk el ngam patī ò. 11 Yih pöri ngaich ngam tökiröng inyāchö nö in ngam panam Aikup hēk i Kanā-an ngaich öt chūökuvö yik muvöhngö hī nö teūngen tö nyā-aṅkūöre. 12 Hē Yāköp pöri nö hang yik aṅ Aikup nö aṅhavin tö nyā-aṅkūö, raneh angū-ö nö inlahen ò nö tīnngö yik kūönre yik muvöhngö hī nö chuh in e. 13 Ngaich ik innët van cha nö chuh muh mikahtökūö yik mëm re ngaich ang Yôsěf töre, akahalōn ngaich ang Fërō tö inlahen ngam mikūönö ò. 14 Havëten ök yöngre Yāköp ngaich ang Yôsěf hēk tö yik aṅ patī ò nö ṙòkhöre nö löktö Kanā-an, 75 ṙôken cha-a. 15 Iyöng kūö ngam panam Aikup ngaich ang Yāköp ngaich in e anga-aṅ nö kapah hēk kapah inrē yik muvöhngö hī. 16 Keūni ngaich nuk tangëḵ cha ngaich ṙāḵtu nö el nuk anūlö ök havah Aprahām nö ṙāi tö nuk chāntī nö i Sīkem nö in ök kūön Hamôr.

17 Asā ranöhta taneungtökūö minë kinlēḵngô ngam Tēv nö in Aprahām ngatī ṙanūöhlöre ṙôken yik kūön Aprahām nö i Aikup nö öt kanṙeūken. 18 Tahëng ngaich ök rācha i Aikup ök töt akahakūö tö Yôsěf. 19 Vī inlahenre ngaich anga-aṅ nö la-al yik aṅ panam ih ngaich timlö alaha yik muvöhngö ih nöng ṙāngen yik kūönre nö kapah yěn kayônyu. 20 Fötnyu hē e ang Môsös ngaich vāyö mineūkö anga-aṅ.* Lūöi chumngëṅtö nak yöng ò nö harūkö ò nöng i patīre.* 21 Hē ò pöri nö ṙā-ayö ngaich kē-ě ò ngaich ök kūön Fërō ngaich haruklen ò nö sā kūönre. 22 Ngaich haköptu ang Môsös tö nup inköptö yik aṅ Aikup. Rö-ö nöng anū-ö, pön heuveū-eu ṙô inrē anga-aṅ nö ṙò-òv hēk kirööngen la-en inrē.

23 Hē ò ngaich nö 40 samyeūheu ṙēḵti, yih ngaich ngam mufē ellōn ò* tö ò nö hòṅ kiröönngöre nö chöhkö* yik holmaneukre, yik tahëng aṅ Israel. 24 Hē ò nö meuk inlahen ök tö hěngtak aṅ Aikup nö ötlēḵken ök tö hěngtak aṅ Israel ngaich chuh in ò anga-aṅ nö laklen ò ngaich fëlngen ök aṅ Aikup nö havahalvah ök aṅ Israel. 25 Ngölōn anga-aṅ tö yik aṅ Israel nö akaha elmat min tö ngam Tēv nö löktö in ò nö ṙānyen cha, hö-ö pöri cha-a nö ngatī lōn. 26 Im tahëng sakāmö hē nak tö nëttak aṅ Israel nö fëlö höö, ngaich halāmö cha anga-aṅ nö ngö ṙô: ‘Höng holmaneukre nan na-a, ngaich kūö yòh pöri an chökhutī tö höö?’ 27 Ngaich ök tö chökhutī pöri tö ök holmaneukre aṅ Israel, kuringngen Môsös anga-aṅ ngaich ngö ṙô: ‘Achīö öp vamīlen meh chööngu hēk kahòkken ih inrē? 28 Hòṅ fëlngen chu öm inrē, öm sā tīre tö ök aṅ Aikup vahë?’ 29 Falngöre ngaich ang Môsös nö ṙā-ang umuh hē ò nö hāngö e ngaich chuh in öp panam Mitiā nöng sā inlahen yik aṅ tahëng panam. Nëttak kūön anga-aṅ nö in e.

30 Unôichrit tö 40 samyeūheu, hē Môsös nö el ök tönyalnyi nö ikui ök rôngö Sīnāi ngaich hameuktöre ök ma-ahānga nö ikūö ök töhūkūö tameūyö nö el ök töchökhukūö kun kiyôp. 31 Hē Môsös nö meūkö e pingangkūö ngaich anga-aṅ, hē ò nö yihtöre nö ngëichken e ngaich hang ngih ṙô Yāvē* anga-aṅ: 32 ‘Chū-ö chin Tēv yik muvöhngö yīö Tēv Aprahām, Tēv Isāk, Tēv Yāköp inrē.’ Kichëyöre ngaich ang Môsös hē ò nö hāngö e ngaich ötrēhěn nö kô hēk anga-aṅ nö yihtöre nö meūkö e. 33 Ngö ṙô ngaich ang Yāvē* nö in ò: ‘Luhnyen minë kunrööpöre man, pò ngam tumlat chūök meh öm sökhak nö töhet. 34 Kô-en chin meuk ötlinëken yik tarik re nö i Aikup ngaich hangṙô cha chū-ö inrē nö ayôṙa, yônti chin öich chuh lātaṙeū öich ṙānyen cha. Ta-a, töich tīnngen meh öm chuh Aikup.’ 35 Anga-aṅ ön ngòh Môsös tö hayë-eiṙen tö cha nö ngö ṙô: ‘Achīö öp vamīlen meh öm chööngu hēk kahòkken ih inrē?’ Anga-aṅ ön ngòh tö kētu chööngö hēk ṙamānyen cha nö löktö in ök ma-ahānga ök tö meūkö tö ò nö el ök töchökhukūö kun kiyôp. 36 Anga-aṅ ön ngòh Môsös mahameuktö minë tökiröng pinngangkūö la-en nö kēnyen cha nö ṙā-ang Aikup hēk ṙā-ang el ök Töngāṅv Mai, 40 samyeūheu anga-aṅ nö el tönyalnyi nö hameuktö minë pinngangkūö la-en.

37 Anga-aṅ ön ngòh Môsös tö ngö ṙô nö in yik aṅ Israel: ‘Ngam Tēv an min ma-asöklen öp tö hěngtak pròfět, tö sā inlahen chu nö elhôi yīö tö holre.’ 38 Anga-aṅ ön ngòh Môsös më-elhôi ngam māṅ më Israel nö el tönyalnyi nö hol ök ma-ahānga vamë-ekūö ò nö ikui ök Rôngö Sīnāi, höng Môsös ök vamë-ekūö yik muvöhngö hī hēk kamëḵ ngam tö aṅ hēk töhet līpöre hòṅ ò nö hateungten e nö hī. 39 Öt hang ṙô ò yik muvöhngö hī hēk sō-en ò inrē, höng sehkūö cha-a tö inlahenre nö hòṅ havan nö chuh Aikup. 40 Ngaich ngö ṙô cha-a nö in Āròn: ‘Öt akahakūö in ngaich min tö inlahen Môsös ngam kamënyen hī öi ṙā-ang Aikup ngaich chuhih, lökten man vīlö Tēv ih nö mahachōkūö hī.’ 41 Vī insā ök kun nuā ngaich cha-a ngaich kētö tö kētu nö ikūö ò ngaich haṙamlōnre nöng ikūö ngam vahīre insā. 42 Lökten ngam Tēv nö havööngökūöre tö cha ngaich hökngen cha nöng vë-ekūö nup tö vīlöng el halīöngö, sā kinūichngö e nö imat līpöre yik pròfět: ‘Ō yī-ö aṅ patī Israel, höng chū-ö öich tö kē-ěvkūö tö yīö tö minë tö kētu, hē yīö 40 samyeūheu öi el tönyalnyi? 43 Hö-ö, pò yīö keunken ngam inrūkui Mōlok hēk ngam insā taneūsömat ngam Tēv Rēfan, ṙën yī-ö öi vī-i ò, hòṅ yīö öi vë-ekūö ò. Lökten chin min öich kēnyen yīö öich ṙā-ang ing panam ngaich tīnngen yīö öi chuh lāmuh tö Pēpilön.’

44 Īnu yik muvöhngö ih tö ngam inrūkui vamë-eny nö el ök tönyalnyi nö sā inlahen ngam Tēv nö kētö chööngö Môsös nö vī ngam inrūkui nö sā ngam inchōtenre. 45 Tö kētu ön nö in yik muvöhngö hī, kumtu angū-ö nö ing panam nö holröönten Yôsuā ngam tö kē-ě tö yik tahëng mihëṅrö, yik tö ahōṙi tö ngam Tēv nö ikūö yik muvöhngö ih söl in nuk sakāmö Tāvit ön ngih inrūkui vamë-eny nö ihih. 46 Ikui Tāvit ngam miṙēḵlōn ngam Tēv, lökten anga-aṅ nö hòṅ aṙēḵtu ṙô nö hòṅ kētu ṙētak nö vīlö inrūkui ngam Tēv Yāköp. 47 Hö-ö pöri nö anga-aṅ vamīlö ngam patī ò pön Sòlòmön. 48 Sön pöri ngam Tēv ngam Lamātulöng tö në taṙòkhöre nö öt iyöng el minë patī tö vī-i tö kuntī, sā vinënyö e tö ök tö hěngtak pròfět misī, 49 ‘Ngö ṙô an Yāvē,* Kantēra chu an ngam halīöngö ngaich ranöönöröön chu ngih tumlat ngaich sitih inlahen tī min yī-ö öi vīlö patī chu? Isuh tī öi min vīlö chūök chu? 50 Röh ön në kuntī chu nö vamī-il në taṙòkhöre?’

51 Yī-ö tökehe likeun, höng öpngökūö elnangre hēk öpngökūö ellōnre yin, höng örheūheu inrē yī-ö öi la-al ngam töhet kumlēḵ. Ngatī inlahen yī-ö öi höng sā inlahen yik muvöhngöre misī. 52 Achīö ök in yik pròfět ök töt hakôlöng ṙô tö yik muvöhngö yīö? Heūṅ, cha-a yin famëlngen yik tarik yik mu-urěh nö vënyö inlahen yanīhi ngam tölöök tarik, ngatī yin yī-ö öi hachīlngövah ò hēk fëlngen ò inrē. 53 Heūṅ, ngatī inlahen yī-ö. Teūngen yī-ö tö minë Chööngö tö söömtu tö yik ma-ahānga nö in yīö. Hö-ö pöri yī-ö öi lök in u.”

54 Hē cha nö hang ngih ṙô, hūlökūö tanāinyö ngaich cha-a ngaich kapkui kanapre. 55 Tööḵlö pöri anga-aṅ tö ngam töhet kumlēḵ ngaich haköpmatre nö ngëichkö el halīöngö ngaich meuk kanôlò ngam Tēv hēk meūkö Yēsū inrē nö sökhaka nö lāhāmö kël ngam Tēv. 56 Ngaich ngö ṙô: “Yěh meuk! Meuk ngam halīöngö chin nö luvë-akkūö hēk meuk ngam Kūön tarik inrē nö sökhak nö lāhāmö ngam Tēv.” 57 Pōitô ngaich cha-a nö ayôṙa ngaich tilupngö elnangre nö aṅhtī tö këlre ngaich ṙòkhöre cha-a nö faltöre nö in ò. 58 Tūöknyen ò ngaich cha-a nö lātunyī tö ök panam ngaich kuleh kui ò tö ihong, yik tarik tö minyônyaṅ ṙô nö vënyö inlahen Istěfen luhngö nuk kinṙum alahare ngaich cha-a ngaich ṙāḵten u nö iröön ök tö hěngtak ṙālö ök tö Sôl minënyi. 59 Hē Istěfen nö kulëhe tö ihong ngaich vë-ekūötēv anga-aṅ nö ngö ṙô: “Ō Mā Yēsū, kētö ngih nômöre* chin öich eltī meh.” 60 Sulngöre ngaich anga-aṅ ngaich pōitô nö ayôṙa nö ngö ṙô: “Yāvē,* uh ön yēḵ ngih tökööl nö ikui cha.” Kapah ngaich anga-aṅ unôichrit ṙô ò nö ngatī ṙô.