Innëtö Chitri Yik Aṅ Kòrin
8 Kahōlö, lōnu in töngamuh tö yīö öi akahalōn tö inlahen ngam tökiröng miṙēḵlōn ngam Tēv ngam mi-ikui minë māṅ i Maketònī. 2 Hē cha nö ṙònghöichṙen nö la-al minë tökiröng kinlahare hēk kanihngenre, pòrô cha-a nö el ṙūngö ngam inyāichö, sön cha-a nö holtö ṙanamlōnre nö kētö kòntripiūsön nö hameuktö ngam tökiröng miṙēḵlōnre. 3 Asā nup kanô-òṅre cha-a nö kē-ěti, rö-ö pön mötlö ṙôken tī tö u ngaich Chū-ö vamënyen e öich tö kôtamat, 4 urēhěre cha-a nö hòṅ aṙētu ṙô tö ih, höng iṙūöhöṙô cha-a nö peuinyhökūö ih töre nö hòṅ kētu minlēḵken nö kētö kòntripiūsön minë rilīf chamuh in yip töhet tarik. 5 Mööḵlö ṙôken inlahen cha-a tö ngam maheūṅkkö ih, pò cha nö asā kuilōn ngam Tēv nö urěh nö kētöre nö im Mā ngaich möl nö kētöre nö in ih. 6 Lökten īhö öi ṙūöhöl alaha Taitös nö keuheūtngen ngam la-en inmūlö minë kòntripiūsön kahëtö yīö öi holtö hanangenlōnre, ngam la-en tö rěhlöngrit misī tö ò. 7 Lökten sā yīö in nup tökeuheūttöre, tö ngö manah, im ṙinatö-ellōn hēk heuneū-eu ṙô, im mikah elmat hēk nganötö, sā ih öi hangenlōn tö yīö, ngatī inlahen inrē yī-ö kòlô im hanangenlōn. Ngatī inlahen inrē yī-ö öi ṙòngnyökūö ellōnre im kinëtö kòntripiūsön.
8 Ötkūöre chin öich kētö chööngö, lökten öich ngatī ṙô, hameukhömat yīö pöri tö inlahen yip tahëng nö holtö ṙanamlōnre nö kētö kòntripiūsön ngaich hòṅ meuk ṙôken ngam hanangenlōn yīö chū-ö, yēḵ e nö tökô-en. 9 Pò yīö öi akahalōn tö ngam tökiröng miṙēḵlōn ngam Mā hī Yēsū Kristū nö pòrô anga-aṅ nö kòlô, sön pöri anga-aṅ nö vī-ingre nö yāich nö chö-öinyten yīö, hòṅ yīö öi löktö im yanāichö ò öi vī-ilre öi kòlô.
10 Ngih ön ṙô chu i alaha e: Höng yanöölen yīö an, yēḵ yīö öi keuheūtngen ngih la-en, pön ngaich nö hěnghang samyeūheu rò-angen hē yīö öi rehlörit ngih la-en ngaich hameuktöre sin yī-ö öi kò-òlōn inrē öi ngatī inlahen. 11 Asā ṙôken nganötö yīö öi rěhlörit ngih la-en, ngatī nganötö yin yēḵ öi keuheūtngen ngih la-en. Asā ṙôken nup aṅ in yīö, ngatī ṙôken tī yī-ö öi kē-ěti öi keuheūtngen ngih la-en. 12 Lökten yēḵ ngòh tö hěngtak tarik nö kuyulōn nö kētö nup aṅ in re ngaich nup töng aṅ in ò kahëtö ò, hō-ov min anū-ö, öthō öi meūkken öp töhö-övö nö in ò nö kētu tö ò. 13 Ötkūö Chu öich lōnu tö yip tahëng nö kuchīken ngaich langanköti elkui yī-ö, 14 lōnu pöri chū-ö i ngih ṙētak tö nup ṙôken aṅ in yīö nö hateungngö nup hanakten cha, hòṅ cha inrē cha-a nö hateungngö nup hanakten yīö nö asā ṙôken nup aṅ in re, hòṅ yīö öi ṙōngö inlahen. 15 Sā kinūichngö e inrē nö ngö: “Ngòh töpōyen aṅ in, öt uroho ṙôken aṅ in anga-aṅ, ngaich ngòh tökūöṅnen aṅ in, öt yaha kanūöṅnen angū-ö nö in ò.”
16 Kētö nööinyö ngam Tēv in, pön löktö in ò ang Taitös nö holtö ellōnre nö chumkūöṙen tö yīö, sā chumkūöṙen ih tö yīö, 17 rö-ö anga-aṅ nöng kūöṙô ih öi tīnten ò, lökten nö hōḵ nö chuh in yīö, pön kūö kumlēḵ lōnre anga-aṅ nö kahngenre nö chuh in yīö. 18 Tīntö hol ò in inrē tö ngam prötör, ngam töla-evṙen tö ngam la-en tölöök inhānga, keuheūtngöre chūök ineūkö inlahen anga-aṅ nö el minë māṅ. 19 Rö-ö nöng anū-ö, pön tö halēnlöng ngòh prötör nö kiröönngöre nö holröön ih tö minë māṅ, hòṅ ò nö la-evṙen nö holṙen ih öi söömngen në inlōnti nö tökētu, minë kahëtö yīö öi holtö hanangenlōnre. Katölngen në kòntripiūsön in min nö chö-öinytö nööinyö ngam Mā hī nö inmeuktö e min tö hī öi lōnu öi hòṅ hayööken yip tahëng. 20 Ṙën in öi chumkūöṙen i sinöömngö minë kòntripiūsön kahëtö yīö öi löknyö ellōnre, hòṅ yip tarik nö öt vīlö fālen ih. 21 Pöi “rö-ö öi höng imat Yāvē,* pöi imat yip tarik inrē öi chumkūöṙen öi hameuktöre öi öt michūṙen i nup tökeuheūttöre.”
22 Rö-ö nöng angū-ö, pöi tīnngen ngòh prötör inrē nö holṙen yīö, ngam tö ngëichka inlahen tö ih, ngaich kôtökūö īhö tö ò nö tökalēḵ alaha, ṙinatu-ellōn inrē anga-aṅ nö in yīö, lökten min anga-aṅ nö ṙūöhöl alahare. 23 Yěn ōt intöönö i alaha Taitös ngaich vë-eny nang yīö chū-ö tö ò nö hol* chu hēk hamòlṙen chu anga-aṅ, ngam töla-evṙen nö chö-öinytö yanöölen yīö hēk yěn ōt intöönö nö i alaha më tahëng prötör, ngaich köpölōn yī-ö tö cha nö tanīnöṙô nö tahīntö minë māṅ hēk maharōilen Kristū inrē. 24 Lökten yin hameuktö hanangenlōnre tö cha hēk hameuktöre ikūö minë māṅ tö ih öi kūö yòh öi eū-eu yīö.