I minë-eny Heprāi

11 Ngam ṙinatö-ellōn an tö tī-ivö tö hī öi holtö ellōnre mihôiṅ öi hökkö nup tö-öl töyīhi tö meūkka nö inmeuknyö nup tökô-en inrē nup tö-öl nö meūkö töngamuh. 2 Pön löktö in ngam ṙinatö-ellōnre misī yik tarik* nö teūngen tö vinë-eny inlahenre tö ngam Tēv nö ṙamlōn nö in cha.

3 Lökten im ṙinatö-ellōn ayī-ö öi akaha elmat tö ngih ṙētak ing panam* nö löktö in ngam ṙô ngam Tēv nö halēniṙen, lökten nup tö meūkö, lamökten in nup chehen anū-ö nö yih, nup töt meūkö.

4 Lökten im ṙinatö-ellōn ang Apēl nö kētö ök tökētu nö ikūö ngam Tēv ök tö mötlö tö ök kahëtö Kēn ngaich kūö ngih ṙinatö-ellōn anga-aṅ nö eūka inlahen nö tölöök, pò ngam Tēv nö hō-en ök kahëtö ò, pòrô ang Apēl ngaich nö kapah, sön pöri nö kūö ngam ṙinatö-ellōnre anga-aṅ nö ṙömöng ṙò-òvö töngamuh.

5 Lökten im ṙinatö-ellōn ang Ēnòk nö kē-ě nö chuh im tahëng kamngö, hòṅ ò nö öt meukkūö ngam kinpaha ngaich öt hěngkang chūök anga-aṅ nö kôti, pò ngam Tēv nö söömngen ò nö in ngam tahëng kamngö, urēhěkūö chanūhu ò pöri ngaich vënyu inlahen anga-aṅ tö ò nö tö ṙamlōn tī tö ngam Tēv. 6 Yěn öt ōt ngam ṙinatö-ellōn ngaich ötkanò-òṅvö öi haṙamlōn ngam Tēv, pò yip tö hòṅ yihtöre nö in ò ngaich hòṅ ṙatö-ellōnre cha-a tö ngam Tēv nö kô-en nö ōt ngaich kētö raneushö yip tarik anga-aṅ yip kumheūttö ellōnre nö chöhö ò.

7 Lökten im ṙinatö-ellōn ang Nō-a nö holtö pinhë-eṅkūöre tö ngam Tēv nö laklen ngam mikūönöre nö vī ök töhěng nòng chōng, kūö ngam Tēv nö urěhnyi ṙô nö vë-eny nang ò tö inlahen nup chehen, nup tö öl nö meūkö inuk ṙētak ò, löktö in ngih ṙinatö-ellōn anga-aṅ nö vënyen ngih panam nö kētu sācha ngaich kūö ngam ṙinatö-ellōnre anga-aṅ nö kaheūkö nö tölöök.

8 Lökten im ṙinatö-ellōn ang Aprahām nöng hōḵ nö hang ngam invëtöre ngaich kiröönngöre nö chuh in ök chūökö ök tö hòṅ taneūngen ò min amin, öt akahakūö anga-aṅ tö öp chahūhure, sön anga-aṅ nöng kiröönngöre. 9 Kūö ngam ṙinatö-ellōn anga-aṅ nö sā inlahen yip töt aṅkūö ngih panam nö ikūö ngam kinlēḵngô panam, holten nā Yāköp nā Isāk anga-aṅ nöng el inrūkui, minā tö sā ò nö amīnu tö ngih kinlēḵngô. 10 Pò ò nöng hökken öp el panam öp mi-ikui ngam tökô-en machööḵlö nö söktöhëichṙen, ngam tövī-i* hēk tö mānlöng tö ngam Tēv.

11 Lökten im ṙinatö-ellōn ang Sëra nö teūngen tö kumlēḵre nö pirūkö nyīö, pòrô angū-ö nö öt ṙēḵti ò nö kayônyö nyīö, pò ò nö ṙatö-ellōnre tö ngam Tēv kumlēḵngôre nö tökô-en.* 12 Lökten nö löktö im tö hěngtak tarik ngam töng sā inlahen töng hòṅ kapah, nö öt kanṙeūken yip tö kayônyu kūön ò nö sā ṙôken taneūsömat ngam halīöngö hēk sā ṙôken kuyāyö ikūö mai.

13 Ṙòkhöre vē tarik nö kapah vē tö aṅhavin tö ngam ṙinatö-ellōn, rö-ö cha-a pön öl nö ṙòkhöre nö teūngen tö minë kinlēḵngô, sön pöri cha-a nöng marôvat mat nö meūkö u hēk teūngen tö ṙanamlōnre nö löktö in u ngaich vë-eny nang yik taṙòkhöre tarik tö cha nö aṅ tahëng panam hēk töt akahka. 14 Pò yip tö ngatī ṙô ngaich hameuktöre cha-a nö keuheūttö ellōnre nö chöh öp chūökre, öp chūök cha min. 15 Ngaich yēḵ cha öre nöng fēkö ök panam, ök ṙahāngö cha sin ngaich ṙētakvö cha-a nö havan nö chuh in e. 16 Ngaich pöri cha-a nö kū-ö urěh nöng pītnyöre nö hòṅ teūngen tö ngam tövai kamngö ngam tö nôlta nö el halīöngö, lökten ngam Tēv nö öt sirōngkūö nö vë-enyre nö Tēv cha ngaich halēnlö ök töhěng el panam anga-aṅ nö chö-öinyten tö cha.

17 Lökten im ṙinatö-ellōn ang Aprahām, hē ò nö kalaha ngaich anga-aṅ nöng hòṅ kēten Isāk nö tökētu. Heūṅ, ngam hamòltö ṙanamlōnre nö hō-en minë kinlēḵngô, hööngöre anga-aṅ nö kēngö ngam tö hěng maneuk kūönre nö tökētu, 18 rö-ö pön ngö vinënyi nang anga-aṅ: “Ngam tö kilē-ěyö nö kūön* meh, löknyö in Isāk öp min nö yih.” 19 Kirööngen ṙinatö-ellōn anga-aṅ tö ngam Tēv nö īnu tö kanô-òṅre nö hachohlen ngam kūön ò min nö ṙā-ang in yip tökapah ngaich kô-en anga-aṅ nö teūngen nö havan ngam kūönre nö ṙā-ang im kinpaha, töhěng angū-ö nö inchōḵ-oṙô nup yamih.

20 Lökten im ṙinatö-ellōn ang Isāk nö kētö inkôlò nā Yāköp nā Isô tö inlahen nup yamih ṙētak.

21 Lökten im ṙinatö-ellōn ang Yāköp nö urēhěkūö kinpahare nö kētö inkôlò nak tö nëttak kūön Yôsěf ngaich höng hayönglenre anga-aṅ nö in ök kui kinchīṙöre nö ha-öiny ngam Tēv.

22 Lökten im ṙinatö-ellōn ang Yôsěf nö urēhěkūö kinpahare nö vë-eny inlahen yik Israel min nö kiröönngöre nö ṙā-ang Aikup ngaich kētö chööngö* anga-aṅ tö inlahen inlēnngö nuk tangëḵre.*

23 Lökten im ṙinatö-ellōn nak yöng Môsös nö hayunngen ò nö lūöi chumngëṅtö unôichrit finötnyö ò, pò cha nö meūkan nö tövai nö nyīö ngaich öt pa-ekūö cha-a tö ngam chööngö ök rācha, 24 Lökten im ṙinatö-ellōn ang Môsös hē ò nö kiröng ngaich sōḵ anga-aṅ nö havëka nö kūön ök kūön Fërō kikānö, 25 atöllö ngam inlahenre pöri anga-aṅ nö hakihtuṙen nö hol yip tarik ngam Tēv, ěhten tö ngam inlahenre nöng kumchikngenre nö in ngam tökööl töng rahëichtaṙen, 26 akahakūö anga-aṅ tö inlahen sinrōngökūö ngòh töhachāmö elkui tarik ngam Tēv nö mötlö kanôlò angū-ö tö minë töpōṙāi kanôlò i Aikup. 27 Lökten im ṙinatö-ellōn anga-aṅ nö ṙāngö ngam panam Aikup, rö-ö pöri nö kūö pinhë-eṅkūöre tö tanāinyö ngam rācha, pò ò nö hakööpöre nö sā ṙēngen mameuk ngam töt meūkö Tēv. 28 Lökten im ṙinatö-ellōn ang Môsös nö kēken ngam Pāska ngaich kichënytö ngam mahām nö ikūö inkūp, hòṅ yip maha-ethānga nö un hēngö kanihngen tī tö yip lanòh.*

29 Lökten im ṙinatö-ellōn cha-a nö havāngngen ngam Töngāṅv Mai nö sā ṙēngen lamök el ngam tönyô tumlat, hē yik aṅ Aikup pöri nö kalahtenre lang nö havāngngen e ngaich pökngö cha-a tökūö ngam mai.

30 Lökten im ṙinatö-ellōn hē e yik aṅ Israel nö sat sumkam nö havīlö ngam kinlōngö Yerikō ngaich möl angū-ö nö taṙöli. 31 Lökten im ṙinatö-ellōn ök tö Rahap minënyi mi-inyihköre nö öt anòngngövah yik tarik töt hamang chööngö, pò ò nö holtö lanāmöre nö in re tī tö nak chamôngken ngam panam.

32 Achīö yip min hēk tö kakka minë-eny tö Chu? Höng öt kò-òre ṙētak Chin min yēḵ chu öich vë-eny inlahen hē Kītīön, Pērak, Sëmsön, Yefta, Tāvit, hěnghöre Samuěl hēk tö yik tahëng inrē pròfět. 33 Lökten im ṙinatö-ellōn vē tarik nö mihôiṅ tö minë inyööngö, kētö ṙinūöhöl alaha ngam lanöökö, teūngen tö kinlēḵngô, haköpngökūö nuk elvāng lāyön, 34 hanyangngökūö tameūyö, öt kò-òngvah tökūö sanët, kē-ěvkūö tö kumlēḵre hē cha nö ötkalē-en, mihôiṅ nö i kinyūngö hēk ahōngen yik kumyung tö hòṅ fëlö cha. 35 Havan yik hanangenlōnre tökapah yik yöngnyīö ngaich ōtre yik tahëng yik tö hachökka nômö nö kumpaha, pön öt ööire cha-a tö nuk ṙāi ṙinānyö cha, hòṅ cha nö unôichrit ngam kinpahare nö hachohlöng nö im tölöök invanlö tökapah. 36 Heūṅ, iṙôken yik hē e töhayë-e hēk tö fōho inrē, rö-ö nöng anū-ö, pön nyëkö cha-a tö nuk inlök hēk hachēlhötvö inrē ngaich ngatī inlahen cha-a nö kalaha. 37 Kulëhe cha-a tö ihong, kalaha cha-a, tökngö cha-a nö ṙatö tö ṙanat hēk sāpi tö sanët, höng havöötaröön cha-a nö inyut tö minë uktit alaha sīṅp hēk pöököre hēk inyāichö, kanihngen hēk la-al minë ötlinëken 38 hēk sō-ov cha-a töng panam ngaich höng öt kamngu cha-a nö el tönyalnyi, ikui rôngö, el kinlūhu hēk ṙeūvö ngih panam inrē.

39 Rö-ö pön ṙòkhöre cha-a nö löktö im ṙinatö-ellōnre nö teūngen tö ngam tövai ineūkö inlahenre, sön pöri cha-a nö öt meuk taneungtökūö minë kinlēḵngô, 40 pò ngam Tēv nö urěhngöreṙô nö fēkö öp tö mötlö kahëtöre nö in hī, hòṅ cha nö öt sölta nö im hanëtö nöng ṙāngen hī.