I minë-eny Rōma
14 Hō-en ngòh tö kūöṅnen ṙinatö-ellōn, uh pöri öm kaheūkan nö vāich kūö ngam mufē ò nö harīkngöre tö ngam mufē meh.* 2 Ōt yip ṙamatö-ellōnre tö hī mihôiṅ öi keuheūttöre mihëṅṙö nyā-aṅkūö, ngòh tö kūöṅnen ṙinatö-ellōn pöri höng nyā söpchī anga-aṅ. 3 Un miyëḵ elmat ngòh nyamā-avkūö tö ngòh töt nyamā-avkūö, ngatī ngòh töt nyamā-avkūö nö un sūöichkö fālen ngòh nyamā. Pò ngam Tēv nö hō-en ò. 4 Achīö öm më-eṅ samūöichkö fālen tarik alaha holre? Höng ngam mā ò an tö mihôiṅ nö kēḵ fësla ò, yēḵ ò min nö sökhak hēk fukngö, rö-ö an min pön sökhaka pò Yāvē* nö mihôiṅ nö asöklen ò.
5 Ōt yip tarik tö mötlö mat tö ngam töhěng sakāmö nö mööḵlö angū-ö tö öp tahëng sakāmö ngaich ōtre yip tahëng tö hěngren mat tö minë sakāmö nö ṙòkhöre. Hökngen ngòh tö hěngtak tarik nö ṙatö-ellōnre nö in nup tölöng inlahenre. 6 Ngòh tarik tö mötlö mat tö minë töng sakāmö ngaich sakāmö Yāvē* anū-ö nö elmat ò ngaich ngòh nyamā, chö-öinyten Yāvē* anga-aṅ nö nyā pò ò nö kētö nööinyö ngam Tēv yēḵ ò nö nyā, ngaich ngòh töt nyamā öt chö-öinyten Yāvē* anga-aṅ nö nyā sön pöri anga-aṅ nö kētö nööinyö ngam Tēv. 7 Pön öt hěngtak in hī töng chamö-öinytöre nö aṅ hēk ötrēhěn nö hěngtak in hī töng chö-öinytöre nö kapah. 8 Pò hī yēḵ hī öi aṅ ngaich höng chö-öinyten Yāvē* öi aṅ ngaich yēḵ hī öi kapah ngaich höng chö-öinyten Yāvē* öi kapah, lökten yěi pòrô aṅ hēk kapah ngaich höng chö-öinyten Yāvē.* 9 Angū-ö lāinyngen Kristū nö kēngö nômöre ngaich hachohlöng hòṅ ò nö vīlöng nö Mā yip tökapah hēk tö aṅ.
10 Ngaich kūö yòh më-eṅ öm sūöichkö fālen ngam holre? Hēk kūö yòh inrē öm kūöṅn elmat tö ngam holre? Ṙòkhöre in min öi sökhaka öi ikūö ngam chūök kinṙôka tö ngam Tēv. 11 Pò e nö ngö kinūichngö: “Ngö ṙô an Yāvē,* ngö ṙô chin öich kilēḵngôre im nômöre, ṙòkhöre yin min sulngöre ikūö chu hēk ṙòkhöre inrē min öi löknyö elvāngre ṙô öi ikūö yip taṙòkhöre öi höng vënyen chu öich chū-ö Tēv.” 12 Ngaich ṙòkhöre min ayī-ö öi kö kētö kinṙötngöre ikūö ngam Tēv.
13 Lökten töngamuh öi ui sūöichkö fālen höö, hòṅ vī inlahenre pöri ayī-ö öi ui afukngen yip holre hēk ui lökngö fanukngö cha inrē. 14 Akahalōn chin hēk ṙinatu-ellōn inrē öich in ngam Mā Yēsū nö öt ṙòkhöre minë chehen nö töthuich yip tö huichö elmat pöri tö u ngaich huich angū-ö nö in ò. 15 Yěn kūö nup nyā-aṅkūö meh ngam hol meh nö haṙivlōn ngaich öt lamök im talöökö hanangenlōn më-eṅ ngam chö-öiny Kristū nö kēngö nômöre, uh më-eṅ öm filalö e öm chö-öinytö ngam nyā-aṅkūö. 16 Lökten yī-ö tarik ui halöngngen minë tölöök la-enre nö chōich. 17 Tön rö-ö an ngam manah ngam Pūlngö ngam Tēv nö nyina-aṅvkūö hēk inôkö. Pön tölöök, lanāmö hēk ṙanamölōn inrē ngam lamöktö in ngam töhet kumlēḵ. 18 Yěn ōt yip tö ngatī inlahen nö vītöre nö mahalanṙen Kristū nö meukṙen ò ngaich hō-en ò ngam Tēv hēk teūngen inrē anga-aṅ tö ineū-eure nö löktö i tarik.
19 Ta-a chěi töi iṙūöhen in nup ṙô mahaköpken ngam lanāmö ngaich löktö in e öi kö hangönken* höö. 20 Uh pöri öi höng chö-öinytö ngam nyā-aṅkūö öi tiṙōlngö nup la-en ngam Tēv. Kô-en nun nö ṙòkhöre minë chehen nö het, hē e pöri angū-ö nö palā-aiṙen* tī yēḵ öp nyā-aṅkūö ngòh tö hěngtak tarik nö lökngen fanukngö öp tahëng. 21 Ĕhten ngam inlahen meh öm um kāḵ alaha, um rēhěn öm òk vāin, um rēhěn inrē öm kēken nup tahëng la-en nup tö fukngö tī tö ngam hol meh. 22 Ngam ṙinatö-ellōn meh i alaha në inlahngen, hökngen u më-eṅ nöng tölngö in meh nö ikūö ngam Tēv. Töṙamölōn öp anga-aṅ tarik tölöngö ṙô tö nup töng sitih la-en ngaich öt sūöichkö fālenre nö unôichrit inlahenre nö keuheūten nö kēken e. 23 Yēḵ ò nö katööḵngaṙen ellōn ngaich höng sön anga-aṅ nö nyā ngaich kaheūkö anga-aṅ nö fāluṙen, pò ò nö öt holtö ṙinatö-ellōnre nö nyā-aṅvkūö, ṙòkhöre nup la-en töt hōlu tö ngam ṙinatö-ellōn, tökööl anū-ö.