Raneh Chitri Yik Aṅ Kòrin
1 Chū-ö Pôl, öich löktö in ngam kuilōn ngam Tēv öich havëtu öich tanīnöṙô Kristū Yēsū, holten ngam prötör hī Sòstēnēs 2 öich kūich ngih chitri chamuh el ngam māṅ ngam Tēv i Kòrin. Tö ahetlöng yī-ö öi mahaköp öi in Kristū Yēsū hēk töhetö invëka inrē, kūichhöti chin inrē öich in yip taṙòkhöre prötör tökeuheūtngöre chūök nö mahavëkö minë-eny ngam Mā Yēsū, ngam Mā hī hēk Mā cha inrē:
3 Teūngen yin yēḵ tö ngam tökiröng miṙēḵlōn hēk lanāmö öi löktö in ngam Yöng hī ngam Tēv hēk löktö in ngam Mā Yēsū Kristū;
4 Örheūheu chin öich ha-öiny tī ngam Tēvre tökūö ngam tökiröng miṙēḵlōn kahëtö ò nö in yīö nö löktö in Kristū Yēsū; 5 kētö heuneū-en yīö anga-aṅ öi ahangken ngam ṙô hēk kētö ngam töpōyen mikah elmat, hòṅ yīö öt hāṅten in Kristū, 6 köp inrē ngam ineūkö inlahen Kristū nö in yīö, 7 lökten yī-ö öt hēngö hanāṅten tö minë inlōnti hēk hökken ngam Mā hī Yēsū Kristū inrē yī-ö nö hameuktöre. 8 Söl manā-aṅ an min ngam Tēv nö hangëken yīö hòṅ yīö kaheūkö öt fāluṙen ip sakāmö ngam Mā hī Yēsū Kristū. 9 Tökô-en an ngam Tēv ngaich havëten yīö anga-aṅ öi hanôl ngam Kūön ò ngam Mā hī Yēsū Kristū.
10 Kahōlö, hòṅ aṙētu ṙô Chin tö yīö öich i minë-eny ngam Mā hī Yēsū Kristū, tö yīö öi hēngö ṙô öi ṙò-òvö, hòṅ ngam tinṙōlen nö öt elhôi yīö, ṙòkhöre pöri minë mufē yīö hēk mufē elkuilōn yīö nöng hēngö inlahen, hòṅ ngam hinëngö nö elhôi yīö. 11 Tön vënyu nang chin kahōlö tö yip aṅ patī Kolō tö yīö öi höng la-alkūöre. 12 Ngih manah ṙô chu tö yip rīkre in yīö tö ngö ṙô: “Mahaköp chin chū-ö in Pôl,” Ngaich ngö ṙô yip tahëng: “Mahaköp chin Chū-ö in Apòlös,” hēk ngö ṙô yip rīkre: “Mahaköp chin Chū-ö in Kīfös,”* hēk “Mahaköp chin Chū-ö in Kristū.” 13 Harēvngöre hòng ang Kristū nö elhôi yīö? Chö-öinyten tö yīö hòng ang Pôl nö fëli nö kilöllöng nö i rōi ngam chōn? Hēk i minë-eny Pôl hòng yī-ö öi kēḵ ngam vinôkö? 14 Ha-öiny ngam Tēv chin pò Chu öt hěngtak vahōk tö yīö höng nā Krispös nā Kai-ös, 15 hòṅ yip rīkre nö öt ngö ṙô tö cha nö i minë-eny Chu nö kēḵ ngam vinôkö. 16 Kētö vinôkö yip aṅ patī Istěfenās Chin inrē, öt akahakūö pöri Chū-ö töre yěich kētö vinôkö hēk öich in yip tahëng. 17 Pò Kristū nö öt tīnngen Chu öich kamëtö ngam vinôkö, tö tīntu pöri öich ahangkö ngam tölöök inhānga; öt sā ṙô yip töpōihöl* pöri chū-ö öich vënyen e hòn öt yëngen ngam chōn inkihten* Kristū.
18 Töng kumlō-ov an ngam inhangkö ngam chōn inkihten* nö in yip tarik kamū-ötö in ngam ötlanöökö, minhôinyö ngam Tēv pöri angū-ö nö in hī ayī-ö öi tö hayöökaṙen. 19 Tön ngö kinūichngö an: “Ha-etngö mikah yip tö akaha chin min hēk sō-en* yip tö aṅhavin tö ngam inkaha.” 20 Isuh öp ngaich tarik tö akaha i ngih ṙētak?* Isuh öp ngaich kamūich?* Isuh öp lama-al ṙô ing panam? Öt hameuknyen ngam mikah ngih panam hòng ngam Tēv nöng kumlō-ovö? 21 Lökten an nö meūkö ngam mikah ngam Tēv, hē ngam mikah ngih panam nö ötkô nö akahakūö tö ngam Tēv nö löktö i mikahre ngaich meuk ngam ahangkö hī ngam Tēv inhānga ngam töng kumlō-ovö nö imat tarik, hayööken yip ṙamatö-ellōnre min anga-aṅ nö in e.
22 Höng lōntö minkahngö yin vē Yahūti ngaich höng chöh ngam mikah vē Krīk. 23 Ahangkö inlahen Kristū pöri ayī-ö ngam tökilöllöng nö irōi chōn, ngam lökngen fanukngö më Yahūti hēk kumlō-ovö nö in më tahëng mihëṅrö. 24 Kristū pöri kumlēḵ ngam Tēv hēk mikah ngam Tēv nö in cha yip tö havëtu pòrô cha-a nö Yahūti hēk Krīk inrē. 25 Pò nup töng ṙô ngam Tēv nöng kumlō-ovö nö imat tarik, mööḵlö pöri anū-ö tö nup mikah tarik ngaich ngam ṙô ngam Tēv töt kumlē-en nö imat tarik, mötlö kumlēḵ pöri angū-ö tö kumlēḵ tarik.
26 Kahōlö, mihôiṅ yin ngëichkö inlahenre tö yip havëtö ngam Tēv nö öt pōyen yip in cha tö akaha nö elmat tarik* hēk tökalēḵ hēk lamöknyö in yip tö tulöngö minā-aṅ inrē nö fötnyu, 27 katöllen yip tökulō-ovö pöri ngam Tēv nö ing panam, hòṅ cha nö sumrōngngökūö yip tö akaha hēk katöllen yip tötkalē-en inrē anga-aṅ nö ing panam hòṅ cha nö sumrōngngökūö yip tökalēḵ. 28 Katöllen yip tarik ngam Tēv yip töng sō-ovö hēk töng kūöṅnö nö imat ngih panam hēk katöllen nup töng hö-övö inrē anga-aṅ hòṅ nup tö ōt nö hameuknyu nöng töng yanëngen, 29 ngaich öt tarīku min ameū-eure nö ikūö ngam Tēv. 30 Tī ngam Tēv pöri yī-ö öi hěng in Kristū Yēsū, ngam mahameuktö mikah hēk lanöökö ngam Tēv ngam kamheūkö hī öi töhet hēk ṙamānyen hī nö löktö im ṙāi ṙinānyö, 31 hòṅ e nö ngatī inlahen nö sā ngih tökūichi: “Ngòh ameū-eure, eūkö inlahen Yāvē* anga-aṅ.”