Kahūich Lūkös
22 Ngaich röhta öp paratīn ngam töt aföhlöng ròtī, ngam tö Pāska invëka. 2 Ngaich yik mākūö kūönṙô, tö yik kamūich nö chöh inlahen tīre nö kumpahngövah Yēsū, pa-ekūö pöri cha-a tö yik tarik lökten cha-a nö chöh ök tövai ṙētak inlahenre. 3 Meūtö alaha ngaich ang Yūta tö ngam Satān ngam tö Iskaryôt invëka, tökatöllöng anga-aṅ inrē nö in më tö nëtsīön tak, 4 kiröönngöre ngaich ang Yūta nö chuh in yik mākūö kūönṙô hēk tö yik yöngṙen ngam chūök vinë-ekūötēv inrē, ngaich vë-ekūö cha anga-aṅ tö inlahen tīre min nö kē-ě Yēsū. 5 Ṙamlōn ngaich cha-a tö ṙô ò, ngaich vë-eny nang ò tö cha min nö kē-ěkūö ò tö chāntī coin. 6 Hōḵ ngaich ang Yūta ngaich chöh öp tölöng ṙētakre nö kē-ě Yēsū hē yik tömaṙôngö nö öt röhta nö in ò.
7 Yih ngaich ngam paratīn ngam töt aföhlöng ròtī, hē minë töṙeūla nö kētu nö chö-önyten ngam Pāska; 8 tīnngen nā Pītör hēk Yôhan ngaich ang Yēsū nö ngö ṙô: “Kuṙòh kiröönngöre nan ngaich halēnkö nyinā-aṅ ngam Pāska.” 9 Ngö ṙô ngaich cha-a: “Isuh chūök lōn öm tö ai, ai halēnken e?” 10 Ngö ṙô ngaich anga-aṅ: “Yěh meuk! Yēḵ nā min an chuh in öp panam, ngaich meuk öp tö hěngtak min nā-a tarik tamyuk chūök mak ngaich unôichrit ò nā-a an chuh in öp patī öp chahuhu ò. 11 Ngaich ngö ṙô nā-a an in öp tö patī-ivö, ‘Ngö ṙô öp mahaköphöti nö hatön: “Isuh öp uròhò chūök chu min öich holkūö yip haköptöre öich nyā ngam töt aföhlöng ròtī?”’ 12 Ngaich hameukhömat nā min anga-aṅ tö öp tökiröng uròhò lātulöng, öp tö hanyöötö nö ngaich, in e min nā-a an halēnken e.” 13 Kiröönngöre ngaich cha-a ngaich höng ngatī kanôtökūö nö sā nup ṙô ò, ngaich halēnken ngam Pāska ngaich cha-a.
14 Hē ngam ṙētak nö yih, ūichhak ngaich anga-aṅ nö holkūö yik tanīnöṙô nö nyā.* 15 Ngö ṙô ngaich ang Yēsū nö in cha: “Kuilōn Chu takô ön ngih öich hòṅ holkūö yīö öich nyā ngih Pāska urēhěkūöre öich hakihtuṙen; 16 tön ngö ṙô Chin tö yīö, hö-ö chin min öich nyā-aṅ e hanöng sā kinheūtngen nup ṙô nö im Pūlngö ngam Tēv.” 17 Kē ök kulah ngaich anga-aṅ ngaich ha-öiny ngam Tēv nö vë-ekūötēv nö ngö ṙô: “Euṅh, kē-ě e ngaich kö hěng hěngtak öi ôkö e, 18 lökten Chin ngö ṙô tö yīö, öt hēk chin min havantökūöre öich òk ngih vāin hanöng sā ngam Pūlngö ngam Tēv nö öl nö yih.”
19 Kēḵ ök ròtī hēk anga-aṅ ngaich ha-öiny ngam Tēv nö vë-ekūötēv ngaich likölö e, ngaich kē-ěkūö cha nö ngö ṙô: “Minkahngö ngih alaha chu ön ngih tökētu töpòkūö yīö. Ngatī tī pöichö haköpkölōnre tö chu.” 20 Hē kinheūtkūö cha nö nyā tö lā harap ngatī inlahen hēk anga-aṅ nö kēḵ ök kulah ngaich ngö ṙô: “Ngih ön kulah tufömngöre kinlēḵngô* nö i mahām chu, ngam tö kitaknyu töpòkūö yīö.
21 Yěh meuk! tö ngam kamëngen chu nö holtī chu nö ṙāḵtö këlre nö ikui ngih mīs. 22 Tö hòṅ kiröönngöre ön ngòh Kūön tarik nö sā ngam töhalēniṙen ṙētak ò, tötkòlô pöri anga-aṅ tarik ngam mahachīlngövah ngòh Kūön tarik nö kēngen ò!” 23 Lökten ngaich cha-a nö vë-ekūö höö, töp tö ngatī inlahen takô min nö in cha.
24 La-alkūöre hēk cha-a nö chö-önytö öp tökiröng nö in cha. 25 Ngö ṙô pöri anga-aṅ tö cha: “Chööngu yin vē rācha ngih panam nö ikui vē tarik ngaich vē tö minā-aṅvö nö tökòlô invëka. 26 Uh pöri yī-ö ngatī inlahen, ane pöri ngòh tö hòṅ kiröng nö in yīö hökngen ò nö hakūöṅngöre, ngaich ngòh mahachōkūö yīö hökngen ò nö sā mameukṙen. 27 Hēk achīö öp tö mööḵlö kinrööngö, öp amūichtöre hòng nö in öp mīs nö nyā, öp mameukṙen ṙöng? Hö-ö ang nö ngam amūichtöre nö in öp mīs? Höng sā mameukṙen pöri chū-ö öich in yīö.
28 Yī-ö yin pöri hamòlṙen chu hē el ṙētak kanihngen chu, 29 sā ngam yöng chu nö kilēḵngôre* nö in chu, ngatī Chū-ö öich kilēḵngôre* in yīö öich in ngam Pūlngö, 30 hòṅ yīö min öi el ngam Pūlngö chu öi nyā, òk öi ikui ngam mīs chu ngaich ūichhaka min yī-ö öi el minë kantēra, öi kahòkken yip tö 12 miyööngö Israel.
31 Sīmōn, Sīmōn, Yěh meuk! Hòṅ kichāṅngö yīö an ngam Satān nö sāḵtīre tö sāiny. 32 Vë-elkui meh pöri chū-ö hòṅ ngam ṙinatö-ellōn meh nö öt chatngen, yēḵ meh min öm havan im ṙinatö-ellōn ngaich hangönken yip holre më-eṅ.” 33 Ngö ṙô ngaich Pītör nö in ò: “Mā, höng hōḵ Chin chū-ö hol meh chuh el chēl hēk fëli inrē.” 34 Ngö ṙô ngaich anga-aṅ: “Pītör, ngö ṙô chin tö meh, öt takeūk nup min hayöm, hanöng saha meh öl lūöi heuh ṙô öm mahngen chu.”
35 Ngö ṙô hēk anga-aṅ nö in yik haköptöre: “Hē chu tīnngen yīö öi höng öt chūöku rupīö, öt chūöku nyā-aṅ hēk höng öt kunrööpu inrē, ngaich ōt hòng chehen hanakten yīö ik hē e?” Ngaich ngö ṙô cha-a: “Hö-ö!” 36 Ngö ṙô hēk anga-aṅ nö in cha: “Yip tö aṅhavin pöri tö nup chūök rupīö kē-ě u cha-a, ngaich in re tī inrē tö nup chūök nyā-aṅre, ngòh töt aṅhavin pöri tö sanëtre hökngen ò yēḵ nö inyihngö nup chehenre ngaich havah ngam tö hěng sanët. 37 Ngö ṙô Chin tö yīö tö hòṅ teung nun në ṙô tö kūichi nö in chu, ngih tö ngö: ‘Kaheuktu anga-aṅ nö hol yik töfāluṙen.’ Teungta nun nö ngaich nö ṙòkhöre nö in chu.” 38 Ngö ṙô ngaich cha-a: “Mā, Yěh meuk! nët nòng nun në sanët nö ihih.” Ngö ṙô anga-aṅ: “Kò-òre nun nö ngaich.”
39 Kunyī-inyre ngaich anga-aṅ, ngaich sā ngam tönehngenre inlahenre nö chuh kui ngam Rôngö Òliv, holröön ò inrē yik haköptö ò. 40 Hē ò ngaich nö teung ngaich ngö ṙô anga-aṅ nö in cha: “Iṙūöhen yin vë-ekūötēv hòṅ yīö min öt kētu im kinlaha.” 41 Vai rôvat ngaich anga-aṅ nö ṙūöhöngre tö cha,* ngaich sulngöre nö vë-ekūötēv, 42 nö ngö ṙô: “Kayööngö, yēk meh hō-olōn, mihôiṅ öm kēngen ngih kulah nö lākūö chu. Hökngen e pöri nö un sā lōn chu, sā ngam lōn meh pöri.” 43 Hěngtak ngaich ök ma-ahānga yamihtöre nö lākūö ò ngaich hangëkö alaha ò. 44 Kalē-ě ṙô hēk anga-aṅ nö vë-ekūötēv, kūö ò nö pōyen kanihngen ellōn hēk mufē inrē ngaich nuk vang ò nö katāka nö sā mahām nö el tumlat. 45 Hē ò ngaich nö choholre nö ṙā-ang im vinë-ekūötēv yihtöre ngaich anga-aṅ nö in yik haköptöre, ngaich meūkö cha nöng haṙòh, kūö cha nö kalē-ě miṙivlōn. 46 Ngö ṙô ngaich anga-aṅ nö in cha: “Kūö yòh öi kan höng haṙòh? Choholre yin ngaich iṙūöhö ṙô vë-ekūötēv hòṅ yīö min öt kētu im kinlaha.”
47 Hē ò nö ṙònghöichṙô nö ṙò-òv, Yěh meuk! yih ngaich yik tömaṙôngö nö umuh tökumtu tö ök tarik tö Yūta minënyi, ök aṅ in yik tö Nëtsīön tak, yihtöre ngaich anga-aṅ nö chuh in Yēsū ngaich hāmkūö ò. 48 Ngö ṙô pöri ang Yēsū nö in ò: “Yūta, hòṅ kēngen ngòh Kūön tarik öm lökten öm hāmkūö ò?” 49 Hē yik hamòlröön ò ngaich nö meuk ngam inlahen ò, ngaich ngö ṙô cha-a: “Mā, mihôiṅ öi fāngö cha aṅhtī tö fël?” 50 Uroh ngaich ök tö hěngtak in cha nö fangngö ök lāhāmö nang ök tö hěngtak mahalanṙen ök mākūö kūönṙô. 51 Ngö ṙô pöri ang Yēsū: “Ngaichchö, ṙāngenre yin.” Ngaich Yēsū nö lūölkö nang ök mahalanṙen ngaich halanken ò. 52 Ngö ṙô ngaich ang Yēsū nö in yik mākūö kūönṙô, tö yik yōm kūö chūök vinë-ekūötēv hēk tö yik mākūö yik tarik inrē yik yamihtöre nö hòṅ kē-ě ò: “Tötūmu öich kan chū-ö lökten yī-ö öi sanëtu hēk tinkūngu öi kē-ě chu? 53 Kaheuk sakāmö Chin öich haköphöti el ngam chūök vinë-ekūötēv, hö-ö pöri yī-ö öi kē-ě chu, ṙētak yīö pöri ngih hēk ṙētak ngam sinngūlö inrē nö hayöng.”
54 Kē-ě ò ngaich cha-a ngaich kēten ò nö i patī ök mākūö kūönṙô. Höng marôvat pöri ang Pītör nö fachūken ò. 55 Hē cha ngaich nö hameui tameūiyö nö ellōn ngam patī ngaich el hôi cha inrē ang Pītör nö ūichhaka. 56 Hěngtak pöri ök mahalanṙen kikānö mameūkö ò nö hameūyöre nö ikūö ök tameūiyö, chumkūöṙen anga-aṅ nö hatīönken ò, ngaich ngö ṙô: “Ngòh ön inrē tarik hol ò.” 57 Mahangre pöri anga-aṅ nö ngö ṙô: “Hö-ö chin chū-ö akahakūö tö ngòh tarik.” 58 Rěh rò-angen hēk ök tahëng nö meūkö ò, ngaich ngö ṙô: “Më-eṅ man tö hěngtak öm aṅ in cha.” Ngö ṙô pöri ang Pītör: “Hö-ö hol, hö-ö chin chū-ö.” 59 Unôichrit tö hěng kanta hēk ök tarik tö kalē-ě ṙô nö ngö ṙô: “Hol ò man kòl më-eṅ inrē, tön tö hěngtak man öm aṅ Kelelī.” 60 Ngö ṙô pöri ang Pītör: “Öt akahakūö chin chū-ö tö ṙô meh.” Höng ṙònghöichṙô anga-aṅ nö ṙò-òv ilööṙen ngaich nuk hayöm nö takeūk. 61 Havöölökūöre ngaich ngam Mā nö ngëichken Pītör, fē-ělre ngaich ang Pītör tö ṙô ngam Mā re, nö ngö ṙô: “Urēhěkūö ṙô hayöm nö takeūk, lūöi heuh ṙô min më-eṅ öm mahngen chu.” 62 Kunyī-inyre ngaich anga-aṅ ngaich peuiny miṙivlōnre.
63 Yik tarik kamë-e Yēsū, hayë-e ò ngaich cha-a hēk fōho ò inrē. 64 Kahulngö kui ò ngaich cha-a ngaich ngö ṙô nö hatöönan: “Vë-eny nang ih man, achīö öp famëlö meh?” 65 Pōyen ṙô cha-a nö ötlēkôre tö ò.
66 Hē ngam tahëng sakāmö nö yih, hamūlöre ngaich yik mākūö yik tarik, tö yik mākūö kūönṙô hēk tö yik kamūich inrē, kē-ě ò ngaich cha-a nö el öp chūök kamhôṅka ngaich hatöönö ò nö ngö ṙô: 67 “Vë-eny nang ih man, yēḵ meh öm Kristū.” Ngö ṙô pöri anga-aṅ: “Yēḵ chu min öich vë-eny nang yīö, sön min yī-ö öi höng öt ṙatö-ellōnre. 68 Ngaich yēḵ chu min öich hatöönö yīö ngaich öt sapṙô chu min yī-ö. 69 Ngaich pöri ngòh Kūön tarik nö töngamuhten nö ūichhak nö lāhāmö ngam tökalēḵ kël ngam Tēv.” 70 Hē cha nö hāngö e, ṙòkhöre ṙô ngaich cha-a nö ngö ṙô: “Kūön ngam Tēv öm më-eṅ?” Ngö ṙô ngaich anga-aṅ: “Ngaich chin öich höng Chū-ö tö ṙô yīö.” 71 Ngö ṙô ngaich cha-a: “Iṙòktöre lōn öi hēk tö vamënyö inlahen ò? Ngaich yin öi kôta ahang tö ṙô ò.”