Innëtö Chitri Yik Aṅ Kòrin
5 Akahalōn in tö ngih patī hī ing panam, tö ngö manah, yēḵ ngam alaha hī min nö chuhngöre ngaich teūngen min ayī-ö tö ngam töt chanuhuvṙen patī el halīöngö ngam lamöktö in ngam Tēv, ngam patī töt vī-i tö tarik. 2 Pò ih kô-en öi höng halöinyöre tö chanököre öi el ngih patī ngaich ngam lamātuhēt ih* nö lōnu takô töre nö hayutlöre tö ngam tö halēniṙen nö el halīöngö* nö chö-öinyten ih, 3 ngaich yēḵ ih min hayutlöre tö e ngaich ötkôti min īhö öi lichôi. 4 Kô-en in ayī-ö më-el ngih patī öi halöiny chanököre tökūö lumnganre. Ötkūö ih öi lōnu hòṅ luhnyen u, hòṅ hayutlöre pöri tö ngam patī lamöktö el halīöngö, hòṅ ngam tö chuhngöre nö ngeūktu tö ngam nômö. 5 Anga-aṅ an ngam Tēv ngam mahalēnlen ih öi in e, ngaich kētö minkahngö öp tö hòṅ yih anga-aṅ nö kēten ngam töhet kumlēḵre nö in ih.
6 Lökten īhö örheūheu hangönöre, pön asā ih ṙömöng el ngam patī, tö sā ngam alaha ngaich ṙömöng marôvat īhö tö ngam Mā, 7 pò ih öi lök in ngam ṙinatö-ellōn, öt in nup tö meūkö chehen. 8 Hangönöre pöri īhö hēk angū-ö ngih kūilōn ih öi hö-ö ngaich öi hòṅ aṅ öi alaha tö alaha tarik ngaich i patī öi holtö ngam Mā. 9 Lökten pòrô öi hōlu tö ò öi i patī hēk marôvat tö ò, angū-ö ngih kūilōn ih öi haṙamlōn ò. 10 Pò hī min öi kö hěngtak öi kēnyu öi lākūö Kristū öi chuhkūö ngam chūök kamhôka ngaich nup la-en ngòh tö hěngtak nö in ngam alaha, pòrô nö tölöök hēk tötlöök, kētö kinṙöötöre min anga-aṅ nö asā ṙôken u.
11 Pòrô īhö akahalōn töre hòṅ pa-ekūö tö ngam Mā, lökngöre ellōn tī īhö tö më tarik, hòṅ cha nö hangṙô ih ngaich akahalōn takô ngam Tēv tö ih öi tö sitih inlahen öi tarik. Ngaich meūka chū-ö tö ngam elkūilōn yīö öi ṙòkhöre nö akahakūö takô tö ih öi tö sitih inlahen öi tarik. 12 Rö-ö in hēk öi tumfömlö inlahenre öi mikahtökūö yīö tö ih, ṙūöhöl alaha yīö pöri öi eū-eure töpòkūö ih, hòṅ yīö heuveū-eu ṙô öi sapṙô yip töt ngamëichkö ngam ellōn, ngamëichkö ngam arëkūö pöri nö eū-eure. 13 Yēḵ ngam elkui ih nö ötlöng, ngaich chö-öinyten ngam Tēv angū-ö, yēḵ e pöri nö löng, ngaich chö-öinyten yīö angū-ö. 14 Ngam hanangenlōn Kristū lamīpten ih ngaich meuk ngam ṙòng e īhö, tö ngam tö hěngtak tarik nö kapah töpòkūö tömaṙôngö, ngatī inlahen ngaich nö ṙòkhöre nö kapah. 15 Chö-öinytö taṙòkhöre pöri anga-aṅ nö kapah, hòṅ yip tö aṅ nö öt chö-öiny töre nö aṅ, aṅ pöri nö chö-öinyten ngam kamëḵngö nômöre ngaich hachohlöng nö hēk.
16 Lökten in töngamuh öi öt sā mat tarik öi ngëichkö tarik. Pòrô sin öi akahalōn tö Kristū nö in ngam alaha, hö-ö pöri ngaich öi akahakūö tö ò nö ngatī inlahen. 17 Ngaich yěn ōt mi-im hinëngö nö in Kristū ngaich tö tufömngöre anga-aṅ nö tövīlöng. Hö-övö nuk nö ngaich töhötṙeh chehen, yěh meuk! yih nun ngaich minë tufömngöre chehen. 18 Ṙòkhöre pöri minë chehen nö lamöktö in ngam Tēv, ngam mahalāmten hī nö in re nö löktö in Kristū hēk kētö la-en hī öi halāmhöti, 19 tö ngö manah, ngam la-en ineūkö inlahen ngam Tēv tö ò nö löktö in Kristū tī nö halāmten ngih panam nö in re, ngaich öt kaheuk ṙôken nup fālen cha anga-aṅ hēk kē-ěkūö hī anga-aṅ tö ngam la-en inhānga, ngam mahayööken yip tarik nö halāmtöre nö in ngam Tēv.
20 Lökten in īhö tanīnöṙô Kristū, nö löktö in ih ngam Tēv nö hòṅ aṙētu ṙô. Ṙīnngö ṙô Kristū in öi hòṅ aṙētu ṙô öi ngö ṙô, “Halāmtöre yin in ngam Tēv.” 21 Ngam töt hēngö fālen ngaich vītu anga-aṅ tö ngam Tēv nö inlām tökööl* töpòkūö hī, hòṅ hī öi löktö in ò öi kaheūkö öi löök ikūö ngam Tēv.