Inlahen La-en Yik Tanīnöṙô
3 Ngaich nā Pītör nā Yôhan nö chuh el ngam töhet chūök hē el ṙētak vinë-ekūötēv im tö lūöi köiṅnyṙô tö harap, 2 hē e ngaich yik tarik nö kumtö ök tö hěngtak kikōnyö, ök lamöktökūö nyinī-öre nö karòk. Örheūheu cha-a nö ṙāḵten ò nö ikūö ök inkūp ök tö röhta nö in ngam chūök vinë-ekūötēv ök Tövai inkūp invëka, hòṅ ò nö icheū-a* nö in yip tarik chamuh el ngam chūök vinë-ekūötēv. 3 Hē ò nö meūkö nā Pītör nā Yôhan nö kuhēthötre nö el ngam chūök vinë-ekūötēv, ngaich icheūkö kūö cha ngaich anga-aṅ. 4 Höng löötö matre nā Pītör nā Yôhan nö meūkö ò, ngaich ngö ṙô: “Ngëichkökūö ai man.” 5 Lökten ngaich anga-aṅ nöng hatīönken cha, pön meūkkö öp taneūngenre min nö in cha. 6 Ngö ṙô pöri ang Pītör: “Hö-ö Chin aṅhavin tö sunna hēk chāntī, öptöng aṅ in Chu pöri, angū-ö min kahëtö Chu in meh. Ngö ṙô chin tö meh öich i minë-eny Yēsū Kristū ngam aṅ Nāsaröt, choholre man ngaich kiröönngöre.” 7 Kēḵ ök lāhāmö kël ò ngaich ang Pītör ngaich hachohlen ò. Im hē e ngaich nuk kalröön ök tarik hēk nuk linkölngökūö tangëḵ ò nö ngönlöre, 8 höng söklöre anga-aṅ nö tisòköre ngaich havötaröön. Kiröön anga-aṅ hēk tisòköre nö ha-öiny ngam Tēv nö holröön cha nö chuh el ngam chūök vinë-ekūötēv. 9 Ṙòkhöre yik tarik nö meūkö ò nö havötaröön nö kiröön nö ha-öiny ngam Tēv. 10 Akahakūö ngaich cha-a tö ò nö anga-aṅ ngòh tarik amūichhak sin nö ikūö ök Tövai Inkūp ngam chūök vinë-ekūötēv nö icheū-a, pingangkūö yik tarik nö meūkö ò nö havötaröön nö kiröön ngaich ötkūöngu ngam ṙanamlōn cha.
11 Hē ngam tarik nöng kiṙapken nā Pītör nā Yôhan ngaich ṙòkhöre yik tarik nö faltöre nö in ngam chūökö, ngam tö ‘Varanta Sòlòmön tö Kampavö’ invëka, pingangkūö ngaich yik tarik nö meuk ngih inlahngen. 12 Ngaich hē Pītör nö meuk yik tarik, ngö ṙô ngaich anga-aṅ nö in cha: “Yī-ö tarik aṅ Israel, kūö yòh öi pingangkūö öi meuk në tö ngatī? Kūö yòh inrē öi höng haköpmatre öi höng ngëichken ai, ai sā lamöktö i kumlēḵre ai ngatī inlahen? Hēk tökô-en ai maha-öiny ngam Tēv, lökten öi lööken tī tö ngòh tarik nö havötaröön nö kiröön? 13 Ngam Tēv Aprahām, Tēv Isāk, Tēv Yāköp hēk ngam Tēv yik muvöhngö hī inrē nö hapōilen ngam Mahalanṙenre Yēsū, ngam tö kētu tö yīö nö eltī yik tö kunyaha elmat, sō-en ò yī-ö öi ikūö Pailět, nöng hòṅ ṙānyen ò lang ang Pailět. 14 Kô-en yī-ö, öi sō-en ngam töhet hēk tölöök tarik ngaich havëkö ṙinānyö ngam famëlhang yī-ö nö ṙënngen ò, 15 ngaich pöri yī-ö öi fëlngen ngam Tökatöllöng nö kētö nômö. Hachohlen ò pöri ngaich ngam Tēv nö ṙā-ang in yik tökapah ngaich īhö vamënyö ngam kanô-en. 16 Höng i minë-eny ò in öi ṙatö-ellōnre hēk i minë-eny ò öi lööken tī tö ngòh tarik ngam maheuk yīö hēk mikahkūö yīö inrē. Kūö ngam ṙinatö-ellōn ih öi in Yēsū ngòh tarik nö lööken nö ikūö yīö. 17 Kahōlö, akahakūö Chin tö yīö öi öt tölngenre öi ngatī inlahen, öi sā inlahen yip mākūö tinlööken yīö. 18 Ngatī inlahen pöri ngam Tēv nö hateungngen minë ṙô, minë tö urěhngöre ṙô ò nö in yik pròfět, tö Kristū min nö tö hòṅ kihngen.
19 Lökten yin öi havöötö ellonre ngaich havantöre, hòṅ nup tökööl yīö nö sīchiyö hēk yih ngam sakāmö hanöhlö yīö nö löktö in Yāvē* 20 ngaich tīnten ngam tö halēniṙen anga-aṅ Kristū ang Yēsū nö chö-öinyten yīö. 21 Hòṅ höngngöh an sin nö el halīöngö, hanöng sā në taṙòkhöre nö öt sā inlahenre tö lā-urěh ngam tö vënyu misī tö ngam Tēv nö löknyö elvāng yik töhet pròfět. 22 Ngö ṙô ök Môsös misī, ‘Ngam Tēv yīö Yāvē* an min ma-asöklen öp tö hěngtak pròfět tö sā inlahen chu nö elhôi yīö tö holre. Nup töng ṙô ò nö in yīö, hāngö u yī-ö. 23 Yip töt hamang ṙô ngòh Pròfět min, ahetiyö min anga-aṅ nö elhôi yip tarik.’ 24 Ṙòkhöre yik pròfět nö löktökūö in Samuěl hēk tö yik taṙòkhöre pròfět inrē nö lööknyi ṙô nö vë-eny inlahen ngih sakāmö. 25 Më-eṅ man kūön yik pròfět öm mikūönlö ngam tökilē-ěyö tö ngam Tēv nö in yik muvöhngö yīö, ngö ṙô an misī ngam Tēv nö in Aprahām: ‘Löktö in öp kūön meh min në taṙòkhöre mikūönö ing panam nö teūngen tö inkôlòre.’ 26 Urěh anga-aṅ nö tīnngen ngam tö halēniṙen mahalanṙen, hòṅ ò nö hayööken yīö öi ṙāngö nup taṙòkhöre tötlöök la-enre ngaich kētö inkôlò yīö.”