I minë-eny Efisös

1 Chū-ö Pôl öich löktö i kuilōn ngam Tēv öich tanīnöṙô Kristū Yēsū, kūichhöti chin in yip töhet tarik aṅ Efisös, yip mi-im hinëngö nö in Kristū Yēsū hēk tökô-en inrē:

2 Teūngen yin yēḵ tö ngam tökiröng miṙēḵlōn hēk lanāmö öi löktö in ngam Yöng hī ngam Tēv hēk löktö in ngam Mā Yēsū Kristū.

3 Nööinyö ngam Tēv yēḵ ngam Yöng ngam Mā hī Yēsū Kristū, pò ò nö kētö minë inkôlò el halīöngö tökūö hī öi im hinëngö in Kristū Yēsū. 4 Urěhangen tī anga-aṅ nö katöllen hī öi im hinëngö in ò* hē ranehlö ngih panam, hòṅ hī öi hangenlōn tö ngam Tēv öi holtö hanëtöre hēk öt pitōtu öi ikūö ò. 5 Sā ngam tölöök lōn ò ngaich urěhangen anga-aṅ nö halēnngen e nö asā ngam kuilōnre, tö hī öi löktö in Yēsū Kristū öi kē-ě öi sā inlahen kūön ò, 6 hòn ineū-eu ngam töt insā-av tökiröng miṙēḵlōn ò, ngam kahëtö ò nö in hī nö holtö miṙēḵlōnre nö löktö in ngam hanangenlōn kūönre. 7 Löktö in ngam mahām ngam kūön nö kētu ngam ṙāi ṙinānyö hī öi ṙānyu, heūṅ, löktö in ò ngam tö tööḵlö tö ngam tökiröng miṙēḵlōn ngam Tēv nö ikui hī ngaich teūngen ayī-ö tö inṙē-ěl nup tököölre.

8 Kēten nup taṙòkhöre anga-aṅ mikah hēk mikah elmat nö pōyen tī nö hameuktö ngam tökiröng miṙēḵlōnre nö in hī 9 tö ngö manah, hameuknyö ngam töhet töt mikahkūö sin inlahen ngam kuilōnre nö in hī. Hakôtenre anga-aṅ nö asā ngam kuilōnre nö halēnlö ngih töt mikahkūö sin 10 hòṅ ò nö rultenre nö halēnlö ngam töhěng ṙētak,* hòṅ nup taṙòkhöre hēk nö hamūlöre nö in Kristū, pòrô nup chehen aṅ el halīöngö hēk ing panam. Heūṅ, hamūlöre in Kristū 11 ngam chūök hī öi im hinëngö ngaich inrē öi kaheūkö öi amin, pò ngam Tēv nö urěhangen tī nö halēnngen e nö asā ngam chö-öinyre nö katöllen hī, heūṅ, anga-aṅ ngam Tēv mahateungngö nup töng sitih nö asā nup kuilōnre. 12 Ṙën ngam Tēv nö katöllen hī, hòṅ hī ayī-ö öi tö urěh öi teūngen tö ngam maheūṅkköre öi in Kristū, löktö in hī yēḵ ngam nööinyö ngam Tēv hēk ineū-eu ò. 13 Ngatī inrē yī-ö hē yīö öi hang ngam tölöök inhānga inyöökenre, ngam ṙô ngam kanô-en ngaich maheūṅkku yī-ö öi in Kristū. Hē yīö öi ṙatö-ellōnre ngaich löktö in Kristū yī-ö öi mikahayö tö ngam töhet kumlēḵ ngam tö kilē-ěyö misī, 14 kētu ngih töhet kumlēḵ sin nö sā inlahen öp kerentī* urēhěkūö taneūngen hī tö ngam aminre, hòṅ ngam Tēv nö ṙānyen yip tarikre* nö löktö in ngam ṙāi ṙinānyi, ngam löktö ineū-eu ò hēk nööinyö ò.

15 Lökten hē Chu öich hang ṙôken ngam ṙinatö-ellōn yīö öi in ngam Mā Yēsū hēk ṙôken ngam hanangenlōn yīö inrē tö yip taṙòkhöre töhet tarik, 16 hēten e Chū-ö öich öt ṙākenre öich vë-ekūötēv öich kētö nööinyö nö chö-öinyten tö yīö, örheūheu Chū-ö öich höng vë-elkui yīö 17 tö ngam Tēv ngam Mā hī Yēsū Kristū, anga-aṅ ngam Yöng tö tööḵlö tö ineū-eu nö kētö mikah elmat yīö öi akahakūö tö minë ṙô, minë tö hameuknyu tö ò nö in yīö, hòṅ yīö öi aṅhavin tö ngam tölöng mikah elmatre tö inlahen ò. 18 Luvënyökūö mat ngam ellōn yīö anga-aṅ, hòṅ yīö öi akahakūö tö ngam maheūṅkköre ngam invëtö yīö tö ò, ngaich asuh angū-ö kanôlò ngam kahëtö ò nö amin yip töhet tarik, 19 hēk akahakūö inrē tö ngam töt insā-avö kumlēḵ nö la-evṙen nö in hī öi ṙamatö-ellōnre. Öt insā-avö ṙôken ngam tökiröng kumlēḵ ngam Tēv, 20 hameuktö e anga-aṅ nö im inlahen Kristū, hē ò nö hachohlen Kristū nö ṙā-ang in yik tökapah ngaich ha-ūichlen ò nö lök lā in ngam lahāmö këlre nö el halīöngö, 21 marò-òl chūök anga-aṅ tö nup taṙòkhöre inyööngö, chööngö, minhôiyö, pūlngö hēk nup taṙòkhöre inrē tö minënyu, rö-ö nöng in ngih ṙētak nö kē-ěvkūö, pön in öp yamih inrē min ṙētak.* 22 Rö-ö nöng anū-ö, pön elröön ò ngaich në taṙòkhöre tö tī ngam Tēv ngaich vīlöng inrē anga-aṅ nö kui nup taṙòkhöre tö nôlta nö in ngam māṅ, 23 alaha Kristū ön ngam māṅ, ngam chūök ò nö keuheūttöre hēk anga-aṅ inrē mahateungngö nup töng taṙòkhöre ṙô.