I minë-eny Yūt

1 Chū-ö Yūt öich mahalanṙen Yēsū Kristū hēk kahëm Yāköp, kūichhöti chin in cha yip tö teūngen tö invëtöre, hangenlōn an ngam Tēv, ngam Yöng hī tö cha hēk laklen cha inrē, hòṅ cha nö örheūheu nö hol Yēsū Kristū:

2 Kirööngen taneūngen yin yēḵ tö ngam neūkölōn, lanāmö hēk hanangenlōn öi löktö in ngam Tēv.

3 Kahōlö, pītnyöre Chin öich kūichtö inlahen öp inyööken öich in yīö, ngam taneūngen hī ngaich öi ṙòkhöre, ngih pöri tö mööḵlö nö imat Chu, tö chu öich hòṅ ṙūöhöl alaha yīö öi laklö ngam ṙinatö-ellōnre, ngam töng hěngheuh nö urāngen nö kinë-ekūö yip töhet tarik. 4 Angū-ö ön ngih lāinyngen chu inrē öich kūichhöti, pò yip tarik ngaich nö kuhēthötre nö elhôi hī, yip tö urěhangen inlēnngö sācha nö imat ngam līpöre, cha-a yin vē tarik töt maha-öiny ngam Tēv hēk chamöh inlahen re nö la-evṙen tö nup töt sinrōngkūö la-en* nö löktö im tökiröng miṙēḵlōn ngam Tēv hī hēk hameuktöre cha-a nö la-al ngam töng hěngtak yöngkūöre hēk Mā re ang Yēsū Kristū.

5 Töng urěhēten mikahkūö yin tö në ṙô, sön pöri Chū-ö öich fēḵlen yīö, rö-ö ang Yāvē* pön ṙānyen yik tarikre nö ṙā-ang im panam Aikup, unôichngöre pöri anga-aṅ nö ahetngen yik tarik yik töt ṙamatö-ellōnre. 6 Ngaich yip ma-ahānga töt köp nö im chūökre ngam kinë-ekūö cha hēk yip ṙamāngen ngam chūök ngam tö hòṅ chūök cha öre ngaich haköpi tö ò nöng örheūheu nö nyëki, hòṅ cha nö el ngam tökalē-ě sinngūlö nö söl ip ṙētak ngam tökiröng sakāmö kinëtö sācha cha. 7 Ngatī ṙēngen më tarik aṅ Sôtöm Kômòra hēk tö minë ranghö u inrē el panam nö öt kūöngu inlahen nö im chinô-òṅkānö* hēk iṙūöhen nö hateungngö ngam töt nehngenre kuilōn ngam alaha. Kētu sācha cha-a hēk urāngen nö ahetiyö nö ikūö tameūiyö ngaich finëḵlö hī cha-a, hòṅ hī öi haköplu öi in cha.

8 Sön pöri vē tarik nöng lōngen nö in nup sanehkūöre, hachōichngö alaha yip tahëng, miyëḵ elmat tö yip tö chööngūvö hēk ötlēḵkôre nö ṙôtö inlahen yip tarik, yip tö kētu ineū-eu tö ngam Tēv. 9 Hē ök yöngkūö ma-ahānga ang Maiköl nö la-alkūöreṙô cha-a tö ngam Satān* nö kakkö inlahen ngam alaha Môsös ngaich ötrēhěn anga-aṅ nö ötlēḵköṙôre tö ngam Satān nö sūöichkö inlahen ò nö tö fāluṙen, ngö ṙô pöri anga-aṅ: “Yāvē* an vamëken meh.” 10 Yip tarik pöri töt aṅhavin tö mikah elmatre tö inlahen në ṙô, ötlēḵköṙôre cha-a tö inlahen u. Ngaich sā inlahen nup töṙeūla cha-a töt aṅhavin tö mikahre, nup töng öt mufē-ěv tö inlahenre ngaich höng hachōichngöre nö asā nup la-enre.

11 Öt hakôlöngṙô min cha-a, pò cha nö lök el talöökö Kēn ngaich fal nö lök el ngam tövaich talöökö Pēlām nö chö-öinytö nup taneūngen raneushö hēk ahetiyö cha-a kūö cha nö sā inlahen Kōröh nö in minë ṙô linā-al! 12 Nyā-aṅvkūö cha-a nö holkūö yīö el ṙētak nyīna-aṅ,* sā nup ihong pöri cha-a tö hayunngöre nö el mak, sā inlahen yip yōm sīṅp cha-a töng mahatööḵngenre hēk öt pa-ekūö nö ngatī inlahen, sā inlahen nup taṙul cha-a töt aṅhav tö mak nöng fööka tö kuföt nöng heuingö, sā ṙēngen nup chōn cha-a töt ṙôngu hē nup ṙētak u nö hòṅ ṙôngu, kapah takô* ngaich cha-a, ngaich teuklöng nö ṙā-ang in minë ṙěhre, 13 tökalēḵ mahūṅvö ngam mai cha-a, nö pumranylö pěh töt sumrōngkūö. Tölō-ongkūö taneūsömat cha-a, nup töng örheūheu nö iyöng el tökalē-ě sinngūlö.

14 Heūṅ, Ēnòk inrē ngam sinatkölchap Ātöm nö eūkö inlahen vē tarik nö ngö ṙô: “Yěh meuk! Yih an Yāvē* holtö yip tö lāku ṙôken töhet maha-ahānga re, 15 hòṅ ò nö kētö sācha cha nö ṙòkhöre ngaich öt hakôlò më tarik töt maha-öiny ngam Tēv tö nup kahëken cha la-en nup la-en töt maha-öiny ngam Tēv, nup kahëken cha tötlöök la-en nö la-al ngam Tēv ngaich ṙòkhöre nup ṙô sin-òkkūö, nup ṙô yip tötlöök tarik nö la-al ò nö kētu sācha.”

16 Cha-a yin vē sumṙösṙôre hēk höng kakkö minë inlahngenre, höng lök in nup kuilōnre cha-a hēk pōyen ṙô cha-a nö eū-eure nö löknyö elvāngre ngaich eū yip tahëng* cha-a nö chö-öinytö yanöölenre.

17 Yī-ö pöri kahōlö, köpölōn yin tö në ṙô tö urěhangen vinënyi tö yik tanīnöṙô ngam Mā hī Yēsū Kristū 18 ngaich sitih inlahen ṙô cha-a hē e nö vë-eny nang yīö: “Yih yip min tömināich ṙô ip manā-aṅ ṙētak, yip töla-evṙen nö asā minë tötlöök kuilōnre.” 19 Cha-a yin vē tarik vamīlö tinṙōlen, töng famëkö lōn ngam alaha* hēk töt aṅhavin tö ngam töhet kumlēḵ ngam Tēv. 20 Yī-ö pöri kahōlö, hangöönöre yin öi im machööḵlö ngam töhet ṙinatö-ellōnre hēk asā ngam inchō-okūöre tö ngam töhet kumlēḵ öi vë-ekūötēv, 21 hòṅ hī öi hökkö ngam taneūngenre tö ngam neūkölōn ngam Mā hī Yēsū Kristū, ngam lökten yīö teūngen tö ngam nômö tö örheūheu-aṅ öi vī-ire öi töhō-ovö tö ngam hanangenlōn ngam Tēv. 22 Hěnghöre iṙūöhen hameuktö ngam neūkölōnre in yip tarik, yip tö katööngalōn 23 ngaich kēnyen cha nö ṙā-ang el ngam tameūyö ötinkôlò hēk laklen cha. Iṙūöhen pöri hameuktö neūkölōnre tö yip tahëng ngaich chumkūöṙen hēk i ngih ṙētak öi kunyaha elmat tö nup tötlöök la-en cha ngam lökngen cha nö hachōichngöre.*

24 Mihôiṅ an ngam Tēv nö laklen yīö tö nup lökngen fanukngö hēk asöklen yīö öi öt pitōtuvö nö lakūö ngam nööinyöre hēk kētö tökiröngen ṙanamölōn yīö inrē. 25 Örheūheu an yēḵ nöng löktö in ngam Mā hī Yēsū Kristū, löktökūö misī, töngamuh hēk höng örheūheu, ngam nööinyö, kanôlò, minhôiyö hēk minā-aṅ ngam töng hěngtak Tēv hēk Mahayööken hī. Āmen.