Raneh chitri Yôhan
3 Yěh meuk, tö ṙôkö hanangenlōn ngam Yöng tö hī, lökten nö kētö minlēḵken hī öi kūön ò invëka ngaich kô-en ayī-ö inrē öi kūön ò! Öt akahakūö ngih panam tö hī, pò ngih panam nö öt akahakūö tö ngam Yöng. 2 Kahōlö, ngaich in ayī-ö töngamuh öi kūön ngam Tēv, öl pöri ayī-ö öi akahakūö töp tö hameuknyu min inlahenre ip yamih ṙētak. Rö-ö in pöi akahakūö tö hī min öi sā ò yēḵ ò min nö hameuknyu, pò hī min öi meūkö ò nöng sā mineūköre. 3 Ngaich ngòh tö maheūṅkku nö in ò, ahetlöre min anga-aṅ, sā ò anga-aṅ nö töhet.
4 Ngòh töng iṙūöhen nö kēken ngam tökööl, fumlal ngam chööngö anga-aṅ, pön ngam manah ngam tökööl nö finlalngö ngam chööngö. 5 Akahalōn yin inrē tö Yēsū nö kameun minë tökööl hī nö yih* ngaich öt aṅhavin anga-aṅ tö ngam tökööl. 6 Ngòh töng örheūheu nö im hinëngö nö in ò, öt iṙūöhen anga-aṅ nö kēken ngam tökööl, ngòh töng iṙūöhen nö kēken ngam tökööl, töt mameūkö ò anga-aṅ hēk töt akahakūö inrē tö ò. 7 Yī-ö kūön chu, un hěngtak mahalō-ongkūö yīö, ngòh töng iṙūöhen nö in minë tölöök la-en, tölöök anga-aṅ, sā Yēsū nö tölöök. 8 Ngòh töng iṙūöhen nö im tökööl, aṅ in ngam Satān* anga-aṅ, pò ngam Satān nö lamöktökūö raneh nöng kamëken ngam tökööl ngaich ṙën ngam Kūön ngam Tēv nö hameuknyu, hòṅ ò nö ahetngen minë la-en ngam Satān.
9 Ngòh töfötnyu nö ṙā-ang in ngam Tēv, hö-ö anga-aṅ nöng iṙūöhen nö im tökööl, pò ngam kulöl* ò nöng köp nö in ò ngaich öt iṙūöhen anga-aṅ nö im tökööl, pò ò nö töfötnyu nö ṙā-ang in ngam Tēv. 10 Ngih ön löktö mikahkūö hī tö më kūön ngam Tēv hēk tö më kūön ngam Satān: Ngòh töt la-evṙen tö tölöök la-en, öt lamöktö in ngam Tēv anga-aṅ, ötrěhēn nö aṅ in ngam Tēv ngòh töt hangenlōn tö holmaneukre. 11 Pò yīö öi löktökūö raneh öi hang ngih inhānga tö hī öi hòṅ hangenlōn tö höö, 12 ngaich ötkô öi sā inlahen Kēn ök aṅ in ngam Satān,* ök töng öt aṙē-ěvlōn nö fëlngen ök kahëmre. Kūö yòh takô anga-aṅ nö fëlngen ò? Pò nuk la-en ò nö tötlöök, tölöök pöri nuk la-en ök kahëm ò.
13 Kahōlö, uh yin öi pingangkūö töng panam nö kunyaha elmat tö yīö. 14 Akahalōn in ayī-ö töre öi höng sā ṙēngen töng kapah sin ngaich pöri töngamuh öi aṅ, pò hī öi hangenlōn tö më prötör. Ngòh töt hangenlōn, sā ṙēngen töng kapah anga-aṅ. 15 Ngòh tö kunyaha elmat tö holmaneukre, famëlhang anga-aṅ ngaich akahalōn yī-ö tö ngòh tarik famëlhang nö öt teūngen min tö ngam nômö tö örheūheu-aṅ. 16 Asuh öng ngam hanangenlōn, löktö in e in öi akahakūö tö Yēsū Kristū nö kēngö nômöre töpòkūö hī ngaich la-en hī inrē angū-ö tö hī öi hòṅ kēngö nômöre töpòkūö yip holmaneukre. 17 Yěn ōt pöri tö aṅhavin tö minë chehen aṅ ing panam ngaich meuk öp holmaneukre anga-aṅ nö hāṅten, sön pöri nö öt hameuktö neūkölōnre nö in ò ngaich sitih inlahen ṙô min ayī-ö tö ò nö tö hangenlōn tö ngam Tēv? 18 Yī-ö kūön chu, rö-ö in öi höng löktö in minë ṙô hēk litāk re, pöi hòṅ löktö in minë la-enre öi hameuktöre öi tökô-en hanangenlōn.
19 Löktö in e mikahlōn ayī-ö töre öi lā-in ngam kanô-en ngaich kētö rinatö-ellōnre* tö ngam Tēv nö hangenlōn tö hī 20 pòrô ngam ellōn hī nö vīten hī öi tö fāluṙen, köpölōn pöri ayī-ö tö ngam Tēv nö mööḵlö ṙôkö tö ngam ellōn hī hēk akahakūö tö nup taṙòkhöre. 21 Kahōlö, yēḵ ngam ellōn hī nö öt kaheūkö hī öi tö fāluṙen ngaich mihôiṅ ayī-ö öt pinyū-uvṙô öi vë-ekūö ngam Tēv, 22 ngaich nup töng havëkö hī öi in ò, kē-ěkūö hī anga-aṅ, pò hī öi hang minë chööngö ò ngaich la-evṙen tö nup tölöök nö imat ò. 23 Angū-ö ön ngih chööngö tö hī öi ṙatö-ellōnre i minë-eny ngam Kūön ò Yēsū Kristū hēk hangenlōn tö höö, sā ngam chööngö kahëtö ò nö in hī. 24 Ngaich ngòh hamang minë chööngö ò, in ò anga-aṅ nö im hinëngö, ngatī inlahen inrē anga-aṅ nö im hinëngö nö in öp tarik. Ngam kahëtö ò töhet kumlēḵ nö in hī, löktö in e mikahlōn ayī-ö tö ò nö im hinëngö nö in hī.