I minë-eny Rōma
5 Lökten yēḵ hī öi kaheūkö öi tölöök tökūö ngam ṙinatö-ellōnre, ta-a chěi töi haköpkö ngam lanāmöre öi in* ngam Tēv nö löktö in ngam Mā hī Yēsū Kristū. 2 Lökten in ò ayī-ö öi halöngtuṙen chuh kūö ngam Tēv tökūö ngam ṙinatö-ellōnre, hòṅ hī öi teūngen tö ngam tökiröng miṙēḵlōn ò ngam mi-in hī töngamuh, lökten ta-a töi ṙamölōn* tökūö ngam maheūṅkköre öi teūngen haṙōilen ngam Tēv. 3 Rö-ö nöng angū-ö, pöi holtö ṙanamlōnre* inrē öi la-al minë kanihngenre, pò hī öi akahakūö tö ngam manööyö nö sīöp nö löktö in minë kanihngen, 4 hō-en hī min ngam Tēv yěi īnu tö ngam manööyö ngaich lökten in e min öi teūngen tö ngam mineūka, 5 Öt miṙivngölōn hī ön ngih mineūka, pò ngam hanangenlōn ngam Tēv nö hatööḵlöng tö ngam töhet kumlēḵ nö ellōn hī ngam kinë-ekūö hī misī.
6 Pò hī hē hī ötkalē-en misī ngaich kapah ang Kristū nö chö-öinyten yik tarik töt lamöklōn ngam Tēv nö in ngam töhalēniṙen ṙētak. 7 Pön lohten nö ōt kamëḵngö nômöre töpòkūö tölöök tarik, heūṅ, ngaich mihôiṅ lohten öp tö hěngtak töt pa-ekūö nö kēngö nômöre nö chö-öinyten tö ngòh tölöök tarik. 8 Hameuktö ngam hanangenlōnre pöri ngam Tēv nö in hī, ik hē hī öi īnu tö ngam tököölre ngaich kapah ang Kristū nö chö-öinyten hī. 9 Lökten yēḵ hī ngaich töngamuh öi kaheūkö öi tölöök öi löktö im mahām ò ngaich öt laklöng hòng min ayī-ö tö öp tanāinyö ngam Tēv öi löktö in ò? 10 Hē hī sin öi kunyaha elmat tö ngam Tēv ngaich yēḵ ò nö halāmtöre nö in hī nö löktö im kinpaha ngam Kūönre, ngaich yēḵ hī pöri ngaich töngamuh öi halāmtöre öi in ò ngaich iṙôken hēk ngam ṙinatö-ellōn hī tö hī öi teūngen tö inyöökenre öi löktö im nômö ò. 11 Rö-ö nöng angū-ö, pöi ṙamölōn inrē tö kūö ngam innôlö hī in ngam Tēv ngam lamöktö in ngam Mā hī Yēsū Kristū ngaich löktö in e öi halāmtöre in ngam Tēv.
12 Lökten sā ngam tökööl nö yih nö ing panam nö löktö in ngòh tö hěngtak tarik ngaich löktö im tökööl ngam kinpaha nö yih, ngatī inlahen ngam kinpaha nö söl i taṙòkhöre tarik, pöi ṙòkhöre ngaich öi kööl. 13 Ngaich misī ngam tökööl nö ing panam urēhěkūö minë Chööngö nö kētu, yěn öt ōt pöri ngam chööngö ngaich öt hěngtak tökô nö kaheūkö nö tökööl. 14 Ngaich pöri ngam kinpaha nö löktö in Ātöm nö hayöng nö söl ik ṙētak Môsös, in cha inrē yip töt sā inlahen Ātöm nö filal ngam chööngö ngaich kēken tökööl, sā inlahen ò takô ang Ātöm misī ngam tö hòṅ yih misī.
15 Hö-ö pöri ngam inlōnti ngam Tēv nö sā inlahen fālen. Yěn pōyen tarik tökapah tökūö fālen ngòh tö hěngtak tarik, pōyen yanöölen pöri yip tömaṙôngö tökūö ngam tökiröng miṙēḵlōn ngam Tēv hēk tö ngam tötṙāyu inlōnti, ngih tötṙāyu inlōnti holtö ngam tökiröng miṙēḵlōnre angū-ö nö kētu nö löktö in ngam tö hěngtak tarik ang Yēsū Kristū. 16 Öt sā minë ṙòng ngam tökööl ngòh tö hěngtak tarik nun minë yanöölen taneūngen hī lamöktö in ngam tötṙāyu inlōnti, lökten nö kētu sācha ngòh tö hěngtak tarik nö kaheūkö nö falūṙen tökūö ngam tö hěng fālen, unôichrit minë tö pōyen pöri fālen ngam taneūngen cha inlōnti löktö in e cha-a nö kaheūkö nö tölöök tarik. 17 Yēḵ ngam kinpaha nö hayöng nöng löktö im fālen ngòh tö hěngtak tarik ngaich yip tarik pöri töpōyen taneūngen tö ngam tökiröng miṙēḵlōn hēk kaheūkö inrē nö tölöök nö löktö in ngam tötṙāyu inlōnti, öthō min cha-a nö öt teūngen tö ngam nômö löktö in ngòh tö hěngtak tarik anga-aṅ ang Yēsū Kristū ngaich hayöng min inrē nö rācha.
18 Lökten sā ngam ṙòng ngam tö hěng fālen nö teūngen më taṙòkhöre tarik tö sāchare nö löktö in e, ngatī ṙēngen ngam ṙòng ngam tölöök la-en nö kaheūkö më taṙòkhöre tarik nö tölöök hòṅ cha nö teūngen töm nômö. 19 Ngaich sā e nö löktö in ngòh tö hěngtak tarik fumlal chööngö ngaich kaheūkö yip töpōyen tarik nö köölö fālen, ngatī ṙēngen nö löktö in ngòh tö hěngtak hamang chööngö nö kaheūkö yip töpōyen tarik nö tölöök. 20 Yih ngaich ngam Chööngö ngaich hameuknyö minë töpōyen hēk anū-ö fālen, ichūök ngam tökööl pöri nö ṙūöhölre ṙôken, in e inrē ngam tökiröng miṙēḵlōn nö ṙūöhölre ṙôken. 21 Asuh öp chö-öiny e? Pön sā ṙēngen ngam tökööl nö holṙen ngam kinpaha nö hayöng, ngatī ṙēngen ngam tökiröng miṙēḵlōn nö löktö im lanöökö nö hayöng ngaich teūngen min ayī-ö tö ngam nômö tö örheūheu-aṅ öi löktö im Mā hī ang Yēsū Kristū.