I minë-eny Kalatī
2 Unôichrit tö 14 samyeūheu Chū-ö öich hēk öich holten Parnapas öich chuh Yērūsalem ngaich kumten Taitös nö holre. 2 Ṙën Chū-ö öich chuh in e, pò Chu öich hameukhumat töre öich hòṅ chuh in e. In e Chū-ö öich vë-eny nang cha tö ngam ahangkö chu tölöök inhānga öich in yip tahëng mihëṅṙö. Höng in yik prötör ṙô Chū-ö öich vënyen ngih ṙô yip tökirööngen minlēḵken. Ṙën Chū-ö öich vë-eny nang cha, hòṅ ngam inlahen chu öich la-evṙen nö öt lök yò-òv hēk öt yanëḵngen. 3 Ngaich ang Taitös ngam hamòlröön chu sin, pòrô anga-aṅ nö Krīk, sön anga-aṅ nö öt pītlöng alaha nö in ngam tunnyinyngö. 4 Ngaich tī yik tötkô-en prötör ngih inlahen nö taṙōllöngṙen, yip töng mahayunkenre nö kuhēthötre nö el ngam māṅ. Yamih cha-a nöng töng mahayunkenre nö chöhnyö nup inlahen ih, hòṅ kēngen ngam kanahanglōn ih öi tamömrit Kristū Yēsū ngaich vīten ih öi töhaköövö tö cha. 5 Öt halöngenre pöri īhö öi hěngvan öi sōnngöre ikūö cha, ötrēhěn öi tumṙeūtöre elkatòh cha, hòṅ ngam kanô-en ngam tölöök inhānga taneūngen yīö nö in yīö.
6 Yip prötör pöri tö mööḵlö minlēḵken, heūṅ, yip tö mööḵlö minlēḵken takô tö yip tahëng, öt vahënyu cha-a tö nup tö tufömngöre ṙô nö in chu. Pòrô cha-a nö tö mööḵlö minlēḵken, öt lökngöre Chū-ö tö inlahen cha, pò ngam Tēv nö öt kamëḵ lā-a ngòh tö hěngtak. 7 Rö-ö nöng angū-ö, pön meūkö Chu më prötör tö chu öich tövīlöng öich ma-ahangken ngam tölöök inhānga öich in më tahëng mihëṅṙö,* sā inlahen Pītör nö tövīlöng nö ma-ahangken ngam tölöök inhānga nö in më Yahūti.* 8 Lökten ngam kamëtö kumlēḵ Pītör nö kēken ngam la-en kamngö tanīnöṙô nö chö-öinyten më Yahūti, anga-aṅ kamëtö kumlēḵ chu öich hateungngen ngih la-en öich chö-öinyten më tahëng mihëṅṙö. 9 Hē cha ngaich nö akaha elmat tö chu öich sitih inlahen öich kē-ěvkūö tö ngam tökiröng miṙēḵlōn. Ngaich hē Yāköp, Kīfös* hēk Yôhan, më machööḵlö ngam māṅ ngaich aṅhtī tö ngam lahāmö këlre nö kēḵ eltī chu hēk kēḵ eltī Parnapas nö hameukten ih öi hamòlṙen re, īhö chamuh in më tahëng pumnāmö ngaich cha-a chamuh in më Yahūti. 10 Ngö vinë-ekūö īhö inrē tö ih öi hōtu köplōn tö yip töng yāich prötör, kalēḵ alaha Chū-ö öich pītnyöre öich ngatī inlahen.
11 Ngaich hē Kīfös* nö yih nö i Anti-òk ngaich la-alkūö ò Chū-ö öich ikūö yik tömaṙôngö, pön höng meūkö takô ngam fālen ò. 12 Urēhěkūö yanīhi yik tarik tö tīntu tö Yāköp, nyā hēk òk sin ang Kīfös nö holkūö yik tahëng mihëṅṙö ngaich hē më prötör nö yih, haköhngenre ngaich anga-aṅ tö më tahëng mihëṅṙö tökūö vanööröre tö më tö tunyinyiyö hēk höng marôvat inrē anga-aṅ tö cha. 13 Meuk inlahen ò ngaich yik tahëng Yahūti ngaich asīnkö inlahen ò nö ngatī inlahen nö hanyatkö elmat. Uroh inrē ang Parnapas nöng asīnkö inlahen cha nö hanyatkö elmat. 14 Hē Chu pöri öich meuk inlahen cha nö öt asīnkö ngam kanô-en ngam tölöök inhānga ngaich ikūö yik tömaṙôngö chū-ö öich ngö ṙô öich in Kīfös,* “Yēḵ më më-eṅ öm tö hěngtak öm Yahūti ngaich höng sā inlahen yip tahëng mihëṅṙö më-eṅ, rö-ö öm sā inlahen më Yahūti, ngaich sitih inlahen min më-eṅ öm haköpten më tahëng mihëṅṙö tö minë kui panam inlahen më Yahūti?”
15 Lamöktökūö finötnyöre in ayī-ö öi Yahūti hēk rö-ö öi lamöktö in yip tököölö fālen tahëng mihëṅṙö, 16 akahakūö in ayī-ö tö ngòh tö hěngtak tarik nö rö-ö nö löknyö in minë tö vënyu nö in ngam chööngö, pön höng löktö in ngam ṙinatö-ellōnre nö in Yēsū Kristū nö kaheūkö nö tölöök. Lökten in ayī-ö inrē öi ṙatö-ellōnre öi in Kristū Yēsū, hòṅ hī öi kaheūkö öi tölöök öi löktö im ṙinatö-ellōnre in Kristū, rö-ö öi lökten in minë la-en tö vënyu nö in ngam chööngö, pò ngòh tarik nö öt kaheūkö nö tölöök nö löktö in minë la-en tö vënyu nö im chööngö Môsös. 17 Yěi pòrô öi kaheūkö öi tölöök öi löktö in Kristū, öi töng köölö fālen invëka ngaich tö ngö manah hòng angū-ö tö Kristū nö mahalanṙen ngam tökööl? Hö-ö, öt ngatī! 18 Yēḵ Chu ngaich hěngheuh tī öich afukhang ngaich mihôiṅ Chū-ö hēk öich havanlötīre öich mānlen e, ngaich kahngenre min Chū-ö öich hameuktöre öich tö fāluṙen. 19 Asā ngam chööngö Chū-ö öich kapah, hòṅ Chu öich aṅ öich chö-öinyten ngam Tēv. 20 Hol Kristū Chū-ö öich tōklöng in ngam chōn. Lökten Chin öich öt chö-öinytöre öich aṅ, aṅ pöri Chū-ö öich löktö in ngam tinrīkenre öich im hinëngö in Kristū.* Sā inlahen tinrīken tarik Chin öich aṅ töngamuh ngaich höng löktö in ngam ṙinatö-ellōnre Chū-ö öich in ngam Kūön ngam Tēv öich aṅ, ngam tö hangenlōn tö chu hēk kamëngö nômöre töpòkūö chu. 21 Öt sō-en* ngam tökiröng Chin miṙēḵlōn ngam Tēv, lökten yēḵ ngòh tö hěngtak tarik nö kaheūkö nö tölöök tökūöre nö hang ngam chööngö ngaich höng yanëḵngen ngam inlahen Kristū nö kapah.