I minë-eny Rōma
8 Lökten ngòh mi-im hinëngö nö in Kristū Yēsū, öt kaheūkö min anga-aṅ nö töfāluṙen. 2 Pò ngam chööngö ngam töhet kumlēḵ ngam kamëtö nômö Kristū Yēsū nö ngaich ṙānyen yīö nö ṙā-ang im chööngö ngam tökööl hēk kinpaha. 3 Tī yip tököölö fālen tarik ön ngam Chööngö nö ötkalē-en, lökten ngam tötkanò-òṅ ngam chööngö nö la-evṙen ngaich la-evṙen ngam Tēv tö e. Tīnten ngam Kūönre ngam Tēv nö alaha tö alaha tarik* hòṅ ò nö kēngen ngam tökööl ngaich ngatī inlahen anga-aṅ nö kaheuk ngam tökööl el alaha hī nö töfāluṙen, 4 hòṅ hī öi öt lök im kuilōn ngam alaha, lök in ngam töhet kumlēḵ pöri ngam mahateungngö kuilōn ngam Chööngö. 5 Ngòh lamök im kuilōn ngam alaha ngaich chumkūöṙen cha-a tö minë ṙô ngam alaha, ngòh lamök im kuilōn ngam töhet kumlēḵ pöri nö aṅ ngaich chumkūöṙen cha-a tö minë ṙô ngam töhet kumlēḵ. 6 Ngam manah ngam chumkūöṙen cha tö minë ṙô ngam alaha nö kinpaha, ngam manah ngam chumkūöṙen cha pöri tö minë ṙô ngam töhet kumlēḵ nö nômö hēk lanāmö. 7 Lökten ngòh tö chumkūöṙen tö minë ṙô ngam alaha tö kunyaha elmat anga-aṅ tö ngam Tēv, pò ngam alaha nö öt elkatòh chööngö ngam Tēv, ötrēhěn nö kô. 8 Lökten cha-a yip lamök kuilōn ngam alaha ngaich ötkô cha-a nö haṙamlōn ngam Tēv.
9 Yēḵ ngam töhet kumlēḵ ngam Tēv pöri nö kô-en nö in yīö, ngaich öt lök in ngam kuilōn ngam alaha yī-ö, pöi lök in nup kuilōn ngam töhet kumlēḵ. Yěn ōt pöri töt īnu tö ngam tinrīken Kristū ngaich öt lamöktö in Kristū anga-aṅ. 10 Yēḵ Kristū pöri nö in yīö nö im hinëngö ngaich pòrô ngam alaha yīö nö kapah tö tī ngam tökööl, sön pöri ngam töhet kumlēḵ nö kē-ěkūö yīö tö ngam nômö nö löktö im lanöökö. 11 Ngam Tēv mahachohlen Yēsū nö ṙā-ang in yik tökapah, yēḵ ngam töhet kumlēḵ ò nö in yīö, ngaich anga-aṅ ngam Tēv ngam mahachohlen Kristū Yēsū nö hachohlen ngam tökapah alaha yīö min nö aṅhtī tö ngam töhet kumlēḵre ngam mi-in yīö.
12 Lökten kahōlö, hö-ö in pītnyöre öi aṅ öi lök kuilōn ngam alaha hēk la-evṙen inrē tö nup la-en e, 13 yēḵ yīö öi lök kuilōn ngam alaha ngaich kô-en takô min ngam kinpaha yīö, yēḵ yīö pöri öi fëlngen minë la-en ngam alaha öi aṅhtī tö ngam töhet kumlēḵ ngaich aṅ min yī-ö. 14 Lökten yip töng lamök in ngam inchō-okūöre tö ngam töhet kumlēḵ ngam Tēv ngaich kô-en cha-a nö kūön ngam Tēv. 15 Pò ngam töhet kumlēḵ ngam Tēv nö öt haköövö hī, ötrēhěn nö pinhë-elkūö hī, pöi löktö in e öi sā inlahen yip kūön öi kē-ě ngaich angū-ö ngih töhet kumlēḵ tamölṙô hī öi havëken ò öi ngö ṙô: “Appa,* Ō Kayööngö!” 16 Holre tö ngam ellōn hī ngam töhet kumlēḵ ngam Tēv nö vë-eny nang hī tö hī öi kūön ngam Tēv. 17 Ngaich yēḵ hī öi kūön ò ngaich amin ò inrē ayī-ö. Heūṅ, amin ngam Tēv hēk tökô-en amin Kristū, sā ò ayī-ö öi kihngen hòṅ hī inrē hapōilöng öi hol ò.
18 Akahalōn chin tö në kanihngen hī töngamuh in në ṙētak nö öt ṙōngta anū-ö nö in ngam inpōilö, ngam tö hameuktu min nö in hī. 19 Pò në tövīlöng nö meūkö takô nö hökkö öp ṙētak inmeuknyö më kūön ngam Tēv min. 20 Pò në tövīlöng nö elkatòh në töng öt chööḵnyu, öt lök in nup kuilōnre pöri, pön lök i kuilōn ngam mahalēn nö lökngörit im maheūṅkkö. 21 Lökten in ngih maheūṅkkö në tövīlöng nö ṙānyu nö el inköövö ngam ötlanöökö ngaich teūngen tö ṙinānyöre nö kūön ngam Tēv. 22 Pò hī akahalōn tö në taṙòkhöre tövīlöng nö söl ing töngamuh nö ayôkö chanököre. 23 Rö-ö nöng anū-ö pöi ayī-ö inrē tö teūngen tö ngam raneh ṙòng ngam töhet kumlēḵ öi höng ellōnre chanökö miṙivlōn, i ngih ṙētak öi höng kasë-a öi hökkö inlahen ngam Tēv nö kē-ě hī nö sā kūönre, ngaich löktö in ngam ṙāi ṙinānyi öi ṙānyu ṙā-ang im alaha. 24 Hē hī öi ṙānyu ngaich teūngen ayī-ö tö ngih maheūṅkkö, yěn ngaich pöri nö meūkö ngih maheūṅkkö hī ngaich öt ōt angū-ö, pò nup tö ngaich nö meūkö tö ngòh tarik ngaich meūkken ò hòng min anga-aṅ? 25 Yēḵ hī pöri öi meūkkö nup tö öl nö meūkö tö hī ngaich holtö manööyöre takô min ayī-ö öi hökken u.
26 Hěnghöre hayööken hī inrē ngam töhet kumlēḵ ngam Tēv öi in nup öt kumlē-enre, pön ngih kanihngen hī yēḵ hī öi hòṅ vë-ekūötēv ngaich öt akaha elmat ayī-ö töp tö hòṅ ṙô re öi vë-ekūötēv, ngam töhet kumlēḵ pöri mahayööken hī nö hateungnyö nup töt teungnyi elkuilōn hī.* 27 Ngaich akahakūö pöri ngòh chamöh ellōn tö ṙô ngam töhet kumlēḵ pò e nö vë-elkui yip töhet tarik nö asā lōn ngam Tēv.
28 Akahalōn in tö ngam Tēv nö haṙongtö minë taṙòkhöre la-enre tö yip tö hangenlōn tö ò hēk yip tö havëtu nö asā ngam kuilōn ò, tölöök yip cha-a 29 pön yip urěh tö chumkūökaṙen tö ò, urěhngöre cha-a nö halēni ṙētak nö sā inlahen ngam Kūön ò min, ngaich ngam Kūön ò min nö lanòh yip töpōyen prötör. 30 Rö-ö nöng angū-ö, pön yip tö urěhngöre inlēnlö tö ò cha-a yin, yip tö havëka tö ò, ngaich yip tö havëka tö ò cha-a yin, yip tö kaheūkö tö ò nö tölöök. Ngaich yip tö kaheūkö tö ò nö tölöök, cha-a yin, yip tö hapōilöng tö ò.
31 Sitih ṙô öi pökeh min tö inlahen në ṙô? Yēḵ ngam Tēv nö lā in hī, ngaich achīö öp lama-al hī? 32 Uroh anga-aṅ nö kēngen ngam Kūön re nö chö-öinyten hī hēk kēten ò inrē nö im kinpaha, ngaich hö-ö hòng min anga-aṅ tö ngam Kūön ò nö hameuktö miṙēḵlōnre nö in hī nö kē-ěkūö hī tö nup taṙòkhöre chehen? 33 Achīö yip tökô samūöichkö fālen yip tö katöllöng tö ngam Tēv? Höng ngam Tēv an kamheūkö cha nö löök. 34 Achīö öp min kamëtö sācha cha? Öt hěngtak. Pò Kristū Yēsū nö kēngö nômöre, rö-ö nöng angū-ö, pön hachohlöng anga-aṅ nö ṙā-ang in yik tökapah, lāhāmö ngam Tēv anga-aṅ nö ūichhak, anga-aṅ inrē vamë-elkui hī.
35 Achīö öp tökô nö haköhngen ngam hanangenlōn hī tö Kristū? Kanihngen hòng, miṙivlōn, inkihten, inyāichö, linchôyö, pinlāḵngen hēk sanët? 36 Sā kinūichngö e nö ngö: “Kaheuk sakāmö in höng chö-öinyten meh la-al ngam kinpaha, höng sā inlahen nup sīṅp in nup tö ṙatnyu likeun.” 37 In u pöri nö mööḵngöre ngam tö hangenlōn tö hī, löktö i inyöökenre ayī-ö tö ò öi mihôiṅ öi la-al minë taṙòkhöre kanihngen. 38 Pò chu öich ṙatö-ellōnre nö ötrēhěn ngam kinpaha, ötrēhěn nö ngam nômö, ötrēhěn ma-ahānga, ötrēhěn më mahayöng, ötrēhěn minë chehen töngamuh, ötrēhěn nup yamih chehen, ötrēhěn nö kumlēḵ, 39 ötrēhěn nö rôlòng, ötrēhěn nö ṙū-uti, ötrēhěn nup tahëng tövīlöng tökô min nö haköhngen hī tö ngam hanangenlōn hī tö ngam Tēv ngam mi-in ngam Mā hī Kristū Yēsū.