Raneh chitri Yôhan
4 Kahōlö, uh yin höng ilöö ṙatö-ellōnre öi in nup ṙô tö ahangka nup töng sā lamöktö in ngam Tēv, ngëichken u pöri yēḵ u nö tökô-en nö lamöktö in ngam Tēv hēk hö-ö, tön pōyen yin ngaich më tö minyôny pròfět nö chuh in në panam.
2 Löktö in ngih yin min öi akahalōn tö ngam inhānga yěn lamöktö in ngam Tēv hēk hö-ö: Nup inhānga tökô-en nö lamöktö in ngam Tēv ngaich hō-ov ngih ṙô tö Yēsū Kristū misī nö alaha tö alaha tarik nö yih. 3 Nup inhānga pöri töt hamô-en Yēsū nö ngatī inlahen, öt lamöktö in ngam Tēv anū-ö, lamöktö in yip lama-al Kristū pöri ngih inhānga. Ngaich yin öi hang, tö yip lama-al Kristū nö ahangken ngih inhānga ngaich kô-en töngamuh ngih inhānga nö keuheūtngöre chūök nö ahangka nö ikūö në panam.
4 Yī-ö kūön chu, aṅ in ngam Tēv yin yī-ö ngaich mihôiṅ yī-ö tö vē tarik, pò ngam Tēv mi-im hinëngö nö in yīö, kiröng anga-aṅ tö ngam Satān ngam mi-im hinëngö nö ing panam. 5 Lamöktö ing panam yin cha-a, lökten cha-a nö ṙò-òv tö nup ṙô nup lamöktö ing panam hēk hangṙô cha ngih panam. 6 Aṅ in ngam Tēv in ayī-ö. Ngòh tö akahakūö tö ngam Tēv, hamang ṙô hī cha-a, ngòh töt aṅ in ngam Tēv, töt hamang ṙô hī cha-a. Löktö in e ayī-ö öi akahakūö tö ngam inhānga yēḵ e nö lamöktö in ngam Tēv hēk yěn lamöktö in yip tö minyôny.
7 Kahōlö, ta-a töi iṙūöhen öi kö hangenlōn tö höö, tön aṅ in ngam Tēv an ngam hanangenlōn ngaich ngòh tö hangenlōn, lamöktö in ngam Tēv anga-aṅ nö fötnyu hēk tö akahakūö tö ngam Tēv. 8 Ngòh töt hangenlōn, töt akahakūö anga-aṅ tö ngam Tēv, pò ngam Tēv nö hanangenlōn. 9 Hameuktu an nö in hī ngam hanangenlōn ngam Tēv nö tīnten ngam töng hěng maneuk Kūönre nö ing panam, hòṅ hī öi löktö in ò öi teūngen tö ngam nômö. 10 Ötkūö hī ayī-ö öi hangenlōn tö ngam Tēv lökten ò nö hangenlōn tö hī, anga-aṅ pöri tö hangenlōn tö hī ngaich tīnten ngam Kūönre, hòṅ ò nö kēngö nômöre töpòkūö minë tökööl hī ngaich halāmten* hī öi in ngam Tēv.
11 Kahōlö, yēḵ ngam Tēv nö ngatī ṙôken hanangenlōn tö hī ngaich la-en hī angū-ö öi kö hangenlōn tö höö. 12 Öt hěngtak mameuk ngam Tēv. Yēḵ hī öi hangenlōn tö höö ngaich in hī min ngam Tēv hēk meūkö min ngam hanangenlōn ò nö in hī. 13 Kē-ěkūö hī anga-aṅ tö ngam töhet kumlēḵre, lökten ayī-ö öi akahakūö töre öi im hinëngö öi in ò ngaich in hī inrē anga-aṅ nö im hinëngö. 14 Ngaich ayī-ö öi kôtamat hēk eūken e tö ngam Yöng nö tīnten ngam Kūönre nö mahayööken ngih panam. 15 Ngòh tarik hamô-en Yēsū nö Kūön ngam Tēv, im hinëngö ngam Tēv nö in ò ngaich im hinëngö anga-aṅ nö in ngam Tēv. 16 Akahalōn in ngaich tö ngam Tēv nö iṙôken hanangenlōn tö hī hēk ṙinatu-ellōn inrē ayī-ö öi in e.
Hanangenlōn an ngam Tēv ngaich ngòh tö iṙūöhen nö im hanangenlōn, im hinëngö anga-aṅ nö in ngam Tēv hēk im hinëngö inrē ngam Tēv nö in ò. 17 Ngatī inlahen ngam hanangenlōn nö teungten nö in hī, hòṅ hī holtö nganönöre* öi öt pinyū-uvṙô öi ṙò-òvö ip sakāmö ngam kinṙôka, pò hī ayī-ö öi sā inlahen Kristū öi ing panam. 18 Öt aṅhavin an ngam hanangenlōn tö pinhë-eṅkūö, ngam tö teung pöri hanangenlōn, kēngen* ngam pinhë-eṅkūö angū-ö, pò ngam pinhë-eṅkūö nö asökngen hī. Pò ngòh tö aṅhavin tö ngam pinhë-eṅkūö, töt teung ngam hanangenlōn ò. 19 Ṙën in ayī-ö öi hangenlōn, pò ngam Tēv nö urěh nö hangenlōn tö hī.
20 Yěn ōt tö ngö ṙô, “Hangenlōn Chin tö ngam Tēv,” kunyaha elmat pöri töp holmaneukre ngaich tö minyôny-aṅ anga-aṅ. Pò ngòh töt hangenlōn tö holmaneukre ngam tö meūkö tö ò ngaich ötkô min anga-aṅ nö hangenlōn tö ngam Tēv ngam töt meūkö tö ò. 21 Ngaich teūngen ayī-ö tö ngih chööngö nö löktö in ò, tö ngòh tö hangenlōn tö ngam Tēv, hòṅ hangenlōn inrē anga-aṅ töp holmaneukre.