I minë-eny Yāköp
5 Ō yī-ö tökôlò, hangihtöre yin, yih ön ngam tökiröng kanihngen nö ikui yīö, lökten yin öi kalē-ě ṙô öi peuiny. 2 Ngaich nun minë kanôlò yīö nö chahū-uyö, kātiyö inrē minë chehen yīö tö kamlökö. 3 Yëichngö nun minë sunna hēk chāntī yīö ngaich nup yeich u min nö vamënyö inlahen yīö hēk kāngen yīö inrē ngaich minë hamūl yīö nö sā tameūiyö min ip manā-aṅ sakāmö. 4 Yěh meuk! Yip töla-evṙen nö uvòh nö el panô-òṅ yīö ngaich hachīlngen cha yī-ö tö nup raneushö cha, ayôṙa nun minë raneushö cha nö vë-eny inlahen yīö ngaich teungta nup ṙô cha nö havëkö inyöökenre nö elnang Yāvē* ngam Tēv tömaṙôngö. 5 Haṙamlōnre hēk kumchikngenre yī-ö öi ikūö ngih panam hēk hateungngen nup töng sitih kuilōnre inrē ngaich minë ellōn yīö nöng sā töṙeūla nöng föhnyi hē el ṙētak ngam sakāmö u nö halāliyö. 6 Vīlö fālen ngam tölöök tarik yī-ö öi fëlngen ò, hö-ö hòng anga-aṅ nö la-al yīö?
7 Lökten kahōlö, hamööyöre yin öi söl ip yanīhi ngam Mā hī. Chumkūöṙen yin! Hökkö tölöök aṅ ngih tumlat ön ngòh tameūich ngaich möi anga-aṅ nö löktökūö ip raneh kumrah söl ip manā-angrit ngam kumṙah. 8 Hamööyöre yin yī-ö inrē. Hangön ngam ellōnre tön röhta an nö ngaich ngam ṙētak yanīhi ngam Mā.
9 Kahōlö, uh yin uyëḵku tö inlahen höö,* hòṅ yīö öt teūngen tö sāchare. Yěh meuk! Höng ikūö inkūp an nö ngaich ngam kamhòkken hī. 10 Kahōlö, asīnköröön yik pròfět yin, yik tö ṙò-òvö nö i minë-eny Yāvē* nö la-al minë kanihngenre hēk möi inrē. 11 Yěh meuk! Ṙatö-ellōnre in ayī-ö tö yip tö īnu tö manööyö nö ṙamölōn.* Hang inlahen Yōp yin misī nö sitih inlahen nö īnu tö ngam manööyö hēk asuh inrē ök raneushö ò kahëtö Yāvē,* ngam löktö mikahlōn yīö tö Yāvē* nö tökirööngen hanangenlōn* hēk tö aheūkölōn inrē nö Tēv.
12 Möthë in yīö kahōlö, ṙāngenre yin ui chūöku ṙô kilēngôre. Uh rēhěn öi chūöku ṙô kilēngôre el halīöngö, ing panam hēk in nup töng sitih chehen inrē. Hökngen nup ṙô yīö pöri nöng “tö Hòṅ” hēk “tö Hö-ö.” Hòṅ yīö öt teūngen tö sāchare.
13 Ōt hòng elhôi yīö lama-al minë kanihngen? Hökngen ò nöng iṙūöhen nö vë-ekūötēv. Ōt hòng töṙamölōn nö in yīö? Hökngen ò nö tikökṙôre* nö ha-öiny ngam Tēv. 14 Ōt hòng tövāhavö nö elhôi yīö? Hökngen ò yēḵ nö havëken më minṙöinylen aṅ el ngam māṅ ngaich vë-ekūötēv min cha-a nö chö-öinyten ò hēk hacham alaha ngam tövāhavö tö tavī-i nö i minë-eny Yāvē.* 15 Ngaich ngam vinë-ekūötēv lamökngö im ṙinatö-ellōn nö lööken tī min tö ngam tövāhavö* ngaich hachohlen ò min ang Yāvē.*
16 Lökten yin öi hō-en minë tököölre öi ikūö höö hēk kö vë-elkui höö, hòṅ yīö öi lööken. Pön lökngöre tī ngam vinë-elkui tö ngòh tölöök tarik. 17 Töng sā hī ök inrē Ĕlaicha nö tarik, sā mufē hī inrē anga-aṅ, sön pöri hē ò nö holtö ellōnre nö vë-ekūötēv nö sōḵngen ngam kumṙah nö suktöre ngaich lūöi ròngti samyeūheu rò-òten ngam kumṙah nö öt suktöre nö im panam. 18 Ngaich ik sā ò hēk nö vë-ekūötēv ngaich suktöre ngam kumṙah nö löktö el halīöngö ngaich kētö ṙòngre ngam tumlat.
19 Kahōlö, yěn ōt in yīö tölō-ongkūö tö ngam talöökö ngam kanô-en hēk yěn ōt öp mahavan ngam tölō-ongkūö, 20 akahalōn pöri, yěn ōt mahavan ngam tököölö fālen nö ṙā-ang im tövaich talöökö ngaich lamaklen ò anga-aṅ tö ngam kinpaha hēk ruptö kui nup taṙòkhöre tökööl ò.