Innëtö Chitri Tösalònikē
2 Kahōlö, yěi ṙôtö inlahen ngam yanīhi ngam Mā hī Yēsū Kristū hēk tö ngam inmūlö hī öi in ò ngaich hòṅ aṙētu ṙô īhö 2 yěn ōt tö ngö ṙô tö ngam sakāmö Yāvē* nö yih ngaich ui veut alaha öi in nup töng inlahenre hēk ui pa-ekūö pòrô nö ōt yip vamë-enyre töre nö akahalōn nö löktö in ngam ṙô ngam Tēv, pòrô ngih inhānga nö löknyö elvāng hēk löktö i chitri nö kūichö nö sā lamöktö in ih.
3 Un hěngtak tarik mahalō-ongkūö yīö, pön öl min ngam sakāmö nö yih, hanöng sa yip lama-al ngam Tēv* nö öl hēk nö hameuknyu, ngam kūön ötkanôlò, angū-ö ngam tökööl. 4 Lama-al anga-aṅ, tö hòṅ hapōilöng nö i nup tö tēvö invëka hēk hòṅ ha-öinyö tö nup töng sitih chehen* ngaich ngatī inlahen anga-aṅ nö ūichlöre nö el ngam chūök vinë-ekūötēv ngaich vë-enyre nö in yip taṙòkhöre töre nö tēv. 5 Öt köpölōn öi hē chu ṙömöng in yīö ngaich vë-eny nang yīö hē e Chū-ö tö në nö tö hòṅ ngatī inlahen?
6 Akahakūö yin ngaich tö ngòh ma-asökngen u, hòṅ ò min nö hameuknyu ip yamih ṙētak. 7 Kô-en ngam ötlanöökö ngam tökööl nö töt mikahkūö sin ngam tö ngaich töngamuh nö rultenre, ṙömöng köp pöri ngam ötlanöökö ngih töt mikahkūö sin, hanöng sā ngam ma-asökngen e nö öl nö kē-ěyö, ngam tö ṙònghöichṙen nö asökngen e töngamuh. 8 Ngaich unôichrit e min ngam tökööl nö hameuknyöre nö lākūö ngaich ip yanīhi ngam Mā Yēsū nö fööngen ò nö aṅhtī töm elvāngre ngaich haṙāpngen ò. 9 Höng lamöktö im Satān pöri ngam inlahen ngam tökööl nö hameuktöre. Ngaich keuheūttöre la-en ngam tökööl tö minë la-en minhôiṅyö, tö minyôny minkahngö hēk pinngangkūö 10 hēk i tökeuheūttöre inrē ötlanöökö hēk la-en inchīlö ngaich löktö in e min cha-a nö hachīlö yip kamū-ötö im ötinkôlò, angū-ö ngih sācha cha, pò cha nö öt hangenlōn tö ngam kanô-en töp lökten cha öre nö hayöökaṙen. 11 Angū-ö ngih lāinyngen ngam Tēv nöng hökngen cha nö lōmngö nö in minë töng minyôny inköphöti, hòṅ cha nö ṙatö-ellōnre nö in minë minyôny, 12 ngaich kētu sācha cha-a nö ṙòkhöre, pò cha nö öt ṙatö-ellōnre nö im kanô-en, ṙamölōn pöri nö i tötlöök.
13 Kahōlö, yī-ö töhanghuṙen tö Yāvē,* la-en ih ön öi örheūheu kētö nööinyö ngam Tēv öi chö-öinyten tö yīö, pò ngam Tēv nö katöllen yīö nö im inyööken ik raneh nö löktö im inlahen yīö öi ahetlöng tö ngam töhet kumlēḵ hēk löktö im ṙinatö-ellōn yīö inrē im kanô-en. 14 Ngaich ngam invëtö yīö öi löktö in ngam tölöök inhānga, ngam tö ahangka tö ih, hòṅ yīö öi teūngen tö ngam ineū-eu ngam Mā hī Yēsū Kristū. 15 Lökten kahōlö, iṙūöhen haköpöre söktöhëichṙen ngaich nup ṙô* inköptö yīö, iṙūöhen hāngö u, pòrô anū-ö nö löknyö elvāng nö haköptu hēk löktö in nup chitri ih. 16 Ngam Mā hī Yēsū Kristū hēk ngam Yöng hī, ngam Tēv, ngam tö hangenlōn tö hī ngaich löktö in ngam tökiröng miṙēḵlōnre tī nö kēten ngam inreuskö alaha tö örheūheu nö köp hēk ngam töt insā-av mineūka, 17 höng cha-a kamëtö inreuskö alaha yīö hēk mahangönken yīö öi in nup tölöök la-en hēk tölöök ṙô.