Raneh Chitri Yik Aṅ Kòrin
10 Kahōlö, lōnu Chin tö yīö öi ṙòkhöre akahalōn tö yik muvöhngö hī nö ṙòkhöre nö lātaṙeū tök taṙul ngaich ṙòkhöre inrē cha-a nö lökngö el mai nö kiröön. 2 Hē cha nö lātaṙeū tö ök taṙul hēk lökngö el mai nö kiröön ngaich vōkö hē e cha-a nö in Môsös, 3 höng hěng ök nyā-aṅkūö cha nö ṙòkhöre nö lamöktö in ngam Tēv 4 hēk höng hěng inrē ök mak òk cha lamöktö in ngam Tēv, pò cha nö òk aṅ in ök ihong ngam Tēv ök töng hamòlröön cha nö kiröön, ngam manah ngam ihong nö Kristū. 5 Sön pöri ngam Tēv nö öt ṙamlōn nö in cha nö ṙòkhöre, lökten cha-a nö fëli nö el tönyalnyi.
6 Haköplö hī në ṙô tö hī ötkô höng sā öp tarik töng lōntö nup tötlöök ṙô nöng sā inlahen cha misī. 7 Uh rēhěn öi sā vamë-ekūö insātēv öi sā inlahen yik mi-in cha misī, sā kinūichngö e nö ngö: “Ūichhak yik tarik nö nyā hēk òk inrē ngaich choholre nöng haṙamngölōnre.” 8 Uh rēhěn öi kēken ngam tökööl chinô-òṅkānö* öi sā inlahen yik mi-in cha misī ngaich im töhěng sakāmö nö 23,000 ṙôken yik töfëliyö nö in cha. 9 Uh inrē öi kalaha Yāvē,* öi sā inlahen yik rīkre misī in cha nö kalaha ò. Lökten ngaich cha-a nö kāpö tö nuk pēch ngaich kapah. 10 Uh rēhěn öi siṙösṙôre öi sā inlahen yik rīkre mi-in cha sumṙösṙôre ngaich ahetiyö cha-a tö ngam ma-ahānga ngam Tēv. 11 Në inlahngen tö teungtökūö nö in cha, inchōḵ-okūö hī anū-ö hēk kūichiyö inrē nö finëḵlö hī öi tö aṅ ikūö në taṙòkhöre panam ing manā-aṅ sakāmö.
12 Lökten ngòh tö ngö lōn töre tö ò nö köp nö söktöhëichṙen, ngaich hòṅ hīnöre anga-aṅ, hòṅ ò nö öt fukngö. 13 Öt ōtngöre kinlaha chamuh ikui yīö nö töt teung nö ikui yip tahëng tarik, tökanô-envö pöri ngam Tēv ngaich öthō min anga-aṅ nöng hökngen yīö öi in nup kinlaha nup tömööḵlö tö kanô-òṅ yīö, kēnyö kūö talöökö yīö pöri min anga-aṅ nö holre tö ngam kinlaha, hòṅ yīö öi mihôiṅ öi la-al u.
14 Lökten yī-ö hanangenlōn chu, ṙūöhöngre yin tö ngam vinë-ekūö insātēv. 15 Vë-ekūö yīö Chin öich sā ṙôre öich vë-ekūö yip tö akaha tarik, kahngenre yī-ö öi katöllö lōnre tö minë ṙô Chu yěn tölöng hēk yěn tövaich. 16 Ngam kulah inkôlò ngam tö hakôlöng ṙô tö hī öi vë-ekūötēv, röh öng nö inmūlkūö nö im mahām Kristū? Ngam ròtī tölikölö tö hī, röh öng nö inmūlkūö nö im alaha Kristū? 17 Hěng an ngam ròtī ngaich pòrô ayī-ö öi maṙôngö sön ngam alaha hī nöng hěng, lökten ayī-ö öi ṙòkhöre kūö öi nyā öi im töng hěng ròtī.
18 Yēḵ hī öi ṙô tö inlahen yik töfötnyu takô nö Israel, yik nyamā nö in nuk tökētu, röh yik nö hamòlkūö nö el ngam tahāklö? 19 Tö ngö manah hòng ngaich ngam ṙô Chu tö ngam insā hēk tö minë tökētu nö in ngam insā nö mötlö angū-ö? 20 Hö-ö, ngih pöri ṙô Chu tö nup tökētu tö yip tahëng mihëṅṙö nö öt chö-öinytö ngam Tēv anū-ö, pön chö-öinytö yip tötlöök ma-ahānga nö kētu, ngaich öt lōnu Chū-ö tö yīö öi hamòlkūö yip tötlöök ma-ahānga. 21 Ötkô yin òk ngam kulah aṅ in Yāvē* hěnghöre òk ngam kulah aṅ in yip tötlöök ma-ahānga, ötkô yin inrē öi nyā-aṅvkūö öi ikui mīs Yāvē* hěnghöre nyā öi ikui mīs yip tötlöök ma-ahānga. 22 Hēk ‘vīlö lanīnö Yāvē* hòng ayī-ö’? Mötlö kumlēḵ öi ayī-ö tö ò?
23 Ṙòkhöre nun në ṙô nö hō-ovö tö chu, öt ṙòkhöre pöri anū-ö nö yöölen tī, ṙòkhöre nun nö sā ngam chööngö, öt ṙòkhöre pöri anū-ö nö reushlöre alaha tī. 24 Uh yin höng fēkö yanöölenre, fēkö yanöölen yip tahëng pöri.
25 Nyā-aṅvkūö yin tö nup alaha tö inyihka nö el pachār ngaich ui hatönkuvö öi chö-öinytö ngam lamātuhēt elkuilōnre, 26 pò nup “ing panam hēk nup taṙòkhöre chehen nöng aṅ in Yāvē.”* 27 Yěn ōt töt ṙamatö-ellōnre mahavëtökūö yīö öi nyā ngaich yěi lōnu hòṅ kiröönngöre ngaich nup töng silônyu nö ikūö yīö ngaich nyā-aṅvkūö yī-ö tö u, ui hatönkuvö öi chö-öinytö ngam lamātuhēt elkuilōnre. 28 Yěn ōt pöri tö ngö ṙô nö in yīö: “Ṙamā-ang in nup tökētu ön ngih,” ngaich um nyā-aṅvkūö tökūö ṙô öp vamë-eny nang meh hēk tökūö ngam lamātuhēt elkuilōnre inrē. 29 Ngam manah ṙô Chu öich ṙô tö ngam lamātuhēt elkuilōn, hö-ö Chin öich ṙô tö ngam lamātuhēt elkuilōn yīö, pöich ṙô tö ngam lamātuhēt elkuilōn yip tahëng, hö-ö Chin hòṅ yūs ngam kanahanglōnre hòṅ ngam lamātuhēt elkuilōn yip tahëng nö öt keuheūkö Chu öich fāluṙen. 30 Pòrô Chū-ö öich vë-ekūötēv öich vë-elkui ngam nyā-aṅre, sön pöri min yip mameūkö Chu nö keuheūkö Chu öich vaich, tölöng hòng min ngam inlahen Chu öich nyā-aṅvkūö tö e?
31 Lökten yēḵ yīö pòrô nyā-aṅvkūö hēk òk hēk la-evṙen inrē tö nup tahëng, ṙòkhöre anū-ö nöng chö-öinytö nööinyö ngam Tēv. 32 Uh yin lökngen fanukngö ṙinatö-ellōn yip Yahūti, Krīk hēk yip aṅ el ngam māṅ ngam Tēv, 33 sā Chu chū-ö inrē öich pītnyöre öich haṙamlōn yip taṙòkhöre tarik inup tökeuheūttöre ngaich öt fēkö yanöölenre Chū-ö, iṙūöhen pöri öich chöh inlahenre öich fēkö yanöölen yip töpōyen, hòṅ cha nö teūngen tö inyöökenre.