Raneh Chitri Yik Aṅ Kòrin
2 Lökten kahōlö, hē Chu öich yihtöre in yīö, rö-ö Chū-ö öich höng mahameuktö vanāyö ṙô re hēk mikahre öich ahang tö nang yīö tö ngam töhet töt mikahkūö aṅ im Tēv. 2 Pò Chu hē chu öich in yīö ngaich höng ngamuh fësla chu öt tahëngu, tö yīö öi chumkūöṙen tö Yēsū Kristū hēk tö ngam inlahen kinlöllö ò inrē nö i ṙōi chōn. 3 Ngaich yih chū-ö öich holtö öt kumlē-enre hēk holtö kinchëyöre tökūö pinhë-eṅkūöre öich chuh in yīö, 4 hē Chu öich ahānga öich chuh in yīö ngaich rö-ö chū-ö öich höng mahaköpten yīö tö minë tökiröng ṙô mikah elmat öich līpten yīö, hameuknyö minhôiṅyö ngam töhet kumlēḵ pöri minë ṙô chu 5 hòṅ ngam ṙinatö-ellōn yīö nö öt i mikah yip tarik, i minhôiyö ngam Tēv pöri.
6 Vë-eny nang më tösööḵngö* in tarik tö minë ṙô mikah, rö-ö pöri nö ṙô tö inlahen mikah ngih ṙētak,* ötrēhěn öi ṙôtö inlahen mikah yip mahayöng töngamuh i ngih ṙētak, yip töng chuhngöre min. 7 Vënyö inlahen mikah ngam Tēv pöri ngam tö hameuknyu tö ngam töhet töt mikahkūö sin, vënyö inlahen ngam mikah in tö hayunngöre ngam töhalēniṙen tö ngam Tēv urēhěkūö në chehen ing panam, hòṅ hī öi hapōilöng. 8 Öt hěngtak tö akahakūö in më mahayöng töngamuh i ngih ṙētak,* tö inlahen ngih mikah. Yēḵ cha öre nö akahakūö, ngaich öthō öre cha-a nö fëlngen ngam Mā,* ngam mākūö kanôlò. 9 Sā kinūichngö e pöri nö ngö: “Nup ṙô tötmeūkö tö në mat chu hēk nup ṙô töt hāngö tö në nang chu, ötrēhěn nö yih nö elkuilōn ngòh tarik, anū-ö në ṙô tö halēnlöng tö ngam Tēv nö chö-öinyten yip tö hangenlōn tö ò.” 10 Lökten në ṙô nö hameuktu tö ngam Tēv nö in hī, löktö in ngam töhet kumlēḵre tī anga-aṅ nö vë-eny nang hī ngam chamöh minë taṙòkhöre ṙô, söl in minë ṙô ngam Tēv tö aṙū-uti.
11 Achīö öp in yip tarik tö akahakūö tö ellōn ngòh tahëng tarik, höng ngam lamātuhēt ngòh tarik tö akahakūö? Ngatī inlahen nö öt hěngtak tö akahakūö tö ellōn ngam Tēv höng ngam töhet kumlēḵ ò. 12 Hö-ö in teūngen tö tinrīken ngih panam, teūngen pöri tö ngam töhet kumlēḵ ngam lamöktö in ngam Tēv, hòṅ hī öi akahakūö tö nup ṙô, nup kahëtö ngam Tēv nö in hī nö hameuktö neūkölōnre. 13 Vë-eny nang yip tahëng in inrē tö në ṙô, hö-ö pöri öi löktö i ṙô tarik öi haköphöti, pöi löktö i ṙô ngam töhet kumlēḵ öi haköphöti, pò hī öi mikahtö elnang cha* öi löktö in minë ṙô ngam töhet kumlēḵ ngam Tēv.
14 Ngòh tö sā mufē tarik pöri, öt hō-en minë ṙô ngam töhet kumlēḵ ngam Tēv anga-aṅ, pò në ṙô nöng kumlō-ov nö imat ò. Öthō anga-aṅ nö akahakūö tö në ṙô, pò ngam töhet kumlēḵ nöng angū-ö tö mihôiṅ nö hayööken ò nö akaha. 15 Ngòh tarik tö sā mufē ngam Tēv,* mihôiṅ anga-aṅ nö akaha u nö ṙòkhöre, öt hěngtak pöri tarik tö mihôiṅ nö akaha ò. 16 Achīö öp ṙöng tökô nö akahakūö tö mufē Yāvē* nö mihôiṅ nö haköpten ò? Sā mufē Kristū pöri ayī-ö.