Raneh Chitri Yik Aṅ Kòrin
14 Kö kalē-ě hanangenlōn yin tö höö, hěnghöre iṙūöhen yī-ö pītnyöre* öi kēḵ minë inlōnti aṅ im Tēv, mötlö ngam inlōnti ameūkö nup yamih. 2 Yip tö heuveū-eu ṙô tö tahëng ëlô, rö-ö cha-a nöng vamë-ekūö tarik, pön vamë-ekūö ngam Tēv, pò cha nö löktö im töhet kumlēḵ nö vënyö ngam töhet töt mikahkūö sin, öt hěngtak pöri tö akaha elnang tö u. 3 Yip ameūkö nup yamih, löktö in nup ṙô re cha-a nö hangönken yip tarik, hangëḵken cha hēk hareuskö alaha cha inrē. 4 Ngòh ṙamôtö tahëng ëlô, kôngen anga-aṅ nöng mahangönköre, ngòh ameūkö nup yamih pöri, mahangönken ngam māṅ anga-aṅ. 5 Rö-ö Chin pöich lōnu tö yīö öi ṙôtö minë tahëng ëlô, mööḵlö pöri nö elmat chu ngam inlahen yīö öi eūkö nup yamih. Pön ngam ameūkö nup yamih, mötlö anga-aṅ tö yip ṙamôtö minë tahëng ëlô. Pön yēḵ ngòh ṙamôtö tahëng ëlô nö öt translēt ṙôre nö mikahtö elnang ngaich öt ngönlöre tī minë ṙô ò tö ngam māṅ. 6 Kahōlö, yēḵ Chu pöri i ngih ṙētak öich yih in yīö öich ṙôtö tahëng ëlô, öt vë-eny nang yīö pöri tö ngam inhānga aṅ im Tēv hēk öt mikahtö elmat yīö hēk öt eūkö nup yamih hēk öt haköphöti, ngaich yöölen hòng min yī-ö öi löktö in e?
7 Höng sā ṙēngen öp fanöö hēk ranöng min angū-ö tö röngnyu, öt harīkngöre hināngö pöri nup ṙô u. Ngaich sitih inlahen mikahkūö min ayī-ö töp tö röngnyu, yěn fanöö hēk yěn ranöng? 8 Yēḵ ngam fanöö nö öt vāyö hināngö ṙô, ngaich achīö min hamīnöre nö im kinyūngö? 9 Ngatī ṙēngen, yēḵ yīö öt ṙôtö nup tö lööṙen öi löknyö elvāng re, ngaich achīö min tö akaha elnang tö ṙô yīö? Höng sā ṙēngen vamë-ekūö kuföt min yī-ö. 10 Pòrô nö ṙōlkangen minë ëlô nö ikūö ngih panam, öt hěng pöri ṙô töt manahavö. 11 Yēḵ Chu öt akaha elnang tö ṙô öp tö hěngtak tarik nö ṙò-òvö, ngaich höng sā ṙēngen aṅ tahëng panam min Chū-ö öich in ò, ngatī anga-aṅ nö sā ṙēngen aṅ tahëng panam nö in Chu. 12 Ngatī inlahen yin yī-ö öi tö hòṅ kalē-ě lōn öi teūngen tö ngam inlōnti lamöktö im töhet kumlēḵ, ngaich ma-ainyre yī-ö öi kū-ö urěh, hòṅ ngam māṅ nö ngönlöre.
13 Lökten ngòh ṙamôtö tahëng ëlô, vë-ekūötēv anga-aṅ, hòṅ ò nö translētö e ngaich mikahtö elnang cha. 14 Yēḵ Chu tahëngö ëlô öich vë-ekūötēv, ngaich höng löktö im taneūngenre inlōnti aṅ in ngam töhet kumlēḵ chū-ö öich vë-ekūötēv, höng öt akaha elmat pöri chū-ö tö manah e. 15 Sitih inlahen öi pökeh ngaich? Vë-ekūötēv Chin min tökūö chu öich teūngen töm inlōnti aṅ in ngam töhet kumlēḵ, hěnghöre holtö mikah elmatre pöri min Chū-ö öich vë-ekūötēv, tikökṙôre min Chū-ö tö nööinyö tökūö ngam inlōnti aṅ in ngam töhet kumlēḵ, holtö mikah elmatre pöri min Chū-ö öich tiköknyen u. 16 Lökten yēḵ meh öm kētö nööinyö öm vë-ekūötēv öm löktö in ngam inlōnti aṅ in ngam töhet kumlēḵ, ngaich sitih inlahen min yip töng tarīka ihôi yīö nö “Āmen” ngö ṙô yěm kētö nööinyö öm vë-ekūötēv? Höng öt akaha elnang min cha-a tö ṙô meh öm ṙò-òvö. 17 Kô-en man öm vāyöṙô öm kētö nööinyö öm vë-ekūötēv, höng öt yanööluṙen pöri yip tahëng tarik nö löktö in e. 18 Ha-öiny ngam Tēv Chin, pò Chu öich mötlö heuneū-eu ṙô tö yīö öi ṙòkhöre tö tahëng ëlô. 19 Sön pöri Chū-ö öich öt ṙônyö nup tö söm köiṅny milòhò öich el ngam māṅ, ěhten pöri öich höng ṙôten minë tö taneui milòhò, nup mikah elnang cha, hòṅ chu öich haköptö tahëng.*
20 Kahōlö, uh yin öi sā öt mikah nyīö öi in ngam mufēre, in nup tötlöök pöri öi sā nyīö ngaich sööḵngö öi im mikah elmat. 21 Ngö kinūichngö an nö in ngam Chööngö: “Ngö ṙô ang Yāvē,* ‘Löktö in yip tarik Chin min öich ṙôtö tahëng ëlô hēk löktö in yip töt mikahkūö min öich ṙò-òvö, sön pöri min cha-a nö öt chumkūöṙen tö ngam ṙô chu.’” 22 Lökten ön ngih tahëng ëlô nö öt chö-öinyten tö yip ṙamatö-ellōnre, tö hěng pöri angū-ö nö minkahngö nö in yip töt ṙamatö-ellōnre, yēḵ nup tö eūka yamih nö öt chö-öinyten yip töt ṙamatö-ellōnre, chö-öinyten yip ṙamatö-ellōnre pöri. 23 Lökten yěn ṙòkhöre minë māṅ nö hěngkang chūök nö hamūlöre hēk ṙòkhöre nö ṙôtö minë tahëng ëlô hēk yēḵ yip töng tarīka hēk töt ṙamatö-ellōnre nö kuhēthötre nö chuh lātuhēt, ngaich hö-ö hòng cha-a min nö ngö ṙô tö yīö öi töng katūöi? 24 Yēḵ yīö pöri öi ṙòkhöre öi eūkö minë yamih ngaich yěn ōt töt ṙamatö-ellōnre hēk töng tarīka kumhēthötre nö chuh lātuhēt, ngaich halöktitre min anga-aṅ nö löktö in nup ṙô yīö hēk chumkūöṙen min nö ngëichken u. 25 Nup tö hayunngöre nö ellōn ò ngaich hameuknyu min anū-ö ngaich fātngökūöre min anga-aṅ nö afukngöre nö ngö ṙô nö ha-öiny ngam Tēv: “Kô-en an ngam Tēv nö ihôi yīö.”
26 Kahōlö, asūp ngaich tö hòṅ inlahen hī? Yēḵ yīö öi hamūlöre ngaich ōt yip tö aṅhavin tö nup tinköökö nööinyö ngam Tēv, ōt yip tö aṅhavin tö ngam inlōnti re nö haköphöti, ōt yip tö aṅhavin tö ngam inhānga aṅ im Tēv, ōt yip tö aṅhavin tö ngam inlōnti heuneū-eu ṙôre nö ṙôtö tahëng ëlô hēk ōt yip tö aṅhavin tö ngam inlōnti nö heuveū-eu ṙô nö translēt nö mikahtö elnang. Hökngen u nö ṙòkhöre nö kinëtö inreuskö alaha höö. 27 Yěn ōt ṙamôtö tahëng ëlô ngaich un yahlö ṙôken cha-a, höng nët hēk lūöi tak, ngaich kö eūlö höö cha-a nö ṙò-òvö hēk ōt kò-òren öp vamë-eny manah nö translēt nö mikahtö elnang cha tö minë ṙô.* 28 Yěn öt ōt pöri mö translēt nö mikahtö elnang,* ngaich ui ṙënuṙô el ngam māṅ, kahngenre pöri vë-ekūö ellōnre hēk vë-ekūö ngam Tēv. 29 Hökngen yip tö ṙò-òvö nöng nëttak hēk lūöi tak nö in yip pròfět ngaich vë-eny manah ṙô cha yip tahëng. 30 Ngaich yěn ōt in yip amūichhak tö teūngen tö ngam inhānga aṅ in ngam Tēv ngaich öp tö ṙò-òvö sin, un ṙò-òvö ngaich anga-aṅ. 31 Lökten yī-ö mihôiṅ kö hěngtak öi eūkö nup yamih, hòṅ yip taṙòkhöre nö haköplu ngaich teūngen tö nganönöre. 32 Ngam inlōnti taneūngen yip pròfět nö löktö in ngam töhet kumlēḵ nö eūkö nup yamih, hòṅ ṙāpöre cha-a nö in e. 33 Pò ngam Tēv nö rö-ö nö Tēv tötlēnen, Tēv lanāmö pöri.
Sā inlahen nup taṙòkhöre māṅ yip töhet tarik, 34 ngatī inlahen më kikānö nö un ṙò-òvö nö el ngam māṅ, pò cha nö öt hōnyuṙô nö ṙò-òvö. Tumṙeūtöre pöri cha-a, sā ṙô ngam Chööngö. 35 Yěn ōt pöri nup tö hòṅ mikahlōn cha ngaich i patī cha-a nö hatön më pīhöre, pön sinrōngkūö angū-ö nö in ngòh kikānö, yēḵ ò nö ṙò-òvö nö ikūö ngam māṅ.
36 Rěhlöngrit öng ṙöng ngam ṙô ngam Tēv nö in yīö hēk höng yī-ö ṙöng tö teūngen misī tö e?
37 Yěn ōt tö ngö lōn töre nö tö hěngtak nö pròfět hēk teūngen anga-aṅ tö ngam inlōnti aṅ im töhet kumlēḵ ngaich hòṅ hō-en ngih ṙô anga-aṅ, kahūichtö Chu in yīö, tö e nö chööngö ngam Mā. 38 Yěn ōt pöri töt hamô-en në ṙô ngaich sō-ovö min inrē anga-aṅ.* 39 Lökten kahōlö, mā-ainyre yin, öi eūkö nup yamih, hěnghöre ui asökngö inlahen yip tahëng nö ṙò-òvö tö tahëng ëlô. 40 Hökngen nup taṙòkhöre pöri nö löökö kinëken hēk asā nup tövai inlēnlö u.*