Raneh Chitri Timôtī
6 Yip töng mahalanṙen, ṙòkhöre cha-a nö hòṅ milēḵṙen tö ngam yöngṙenre, hòn öt löknyu ṙô yip töt lamëḵkôre tö ngam minë-eny ngam Tēv hēk tö ngam inköphöti aṅ in më kristīön. 2 Ngaich yip yöngṙen më mahalanṙen mi-im ṙinātö-ellōn, milēḵṙen cha-a tö më yöngṙenre pò cha nö prötör, holtö ṙanamlōnre pöri cha-a nö meukṙen cha, pön yip tö yöölen nö löktö in minë tövai la-en cha, ngaich mi-im ṙinatö-ellōn cha-a hēk hanangenlōn hī nö prötör.
Iṙūöhen haköpten në ṙô hēk ṙūöhöl alaha cha nö hāngö u. 3 Un tarīku tö tahëngö ṙô nö haköphöti hēk töt hamô-en minë tö yöölen* tī inköphöti aṅ in ngam Mā hī Yēsū Kristū, un rēhěn nö hō-en nup tahëng inköphöti nup töt nôlhöt nö im inlahen hī öi ha-öiny ngam Tēv, 4 ngaich tö tāilö anga-aṅ hēk töt aṅhavin tö mikah elmat hēk töng yal nö kilṙô holre hēk la-al ṙô holre.* Ngam ṙòng e, tööḵlö tarik töm ranāinyngö hēk lina-alkūö, ṙônyö nup ṙô cha-a tötlinëkô, katööngaṙen ellōn tö kūö nup tötlöng mufēre. 5 La-alkūöre in nup ṙô töng rahëichnyen, yip töng ötlöngö elkui hēk yip tö marôvat inrē tö ngam kanô-en, ngö mufē cha-a tö ngam inhööinyö ngam Tēv nöng löktö yanīhi nup taneūngen cha. 6 Ngih pöri tökô-en, tö ngam tökiröng kanihngen hī öi ṙamlōn öi in nup töng aṅ inre öi ha-öiny ngam Tēv. 7 Pò hī öi töng öt kumuṙen öi yih ing panam, ötrēhěn öi kô kumuṙen öi ṙāngen e. 8 Lökten yēḵ hī öi aṅhavin tö nyā-aṅkūöre hēk chinhënenre* ngaich höng ṙamölōn ayī-ö öi in u.
9 Yip tarik pöri töng hòṅ kòlô, fukta cha-a nö el minë kinlaha hēk el ngam tinngöp hēk tööḵlö inrē tö ngam kumlō-ovö hēk tötlöök kuilōn nup töng famuk im yanëḵngen hēk chuh im öt inkòlô tī tö ngòh tarik. 10 Pò ngam hanangenlōn tö rupīö nö ṙěh nup taṙòkhöre ötlanöökö ngaich rīkre yip tölō-ongkūö ṙinatö-ellōn tökūö lōnre tö e ngaich höng tīre cha-a nö fukta nö in minë kanihngen.
11 Ō më-eṅ tarik ngam Tēv ṙūöhöngre man tö në, iṙūöhen pöri öm asīöp në tinrīken öm hameuktö ngam lanöökö, vinë-ekūö ngam Tēv, ṙinatö-ellōn, hanangenlōn, manööyö hēk ṙanëmen. 12 Kiyung im ṙinatö-ellōn, haköpngö tīre im tö örheūheu-aṅ nômö ngam chö-öiny invëtö meh hēk ngam vahënyö inlahen meh öm ikūö yip tömaṙôngö mameuk.
13 Ikūö ngam Tēv ngam mahaköpkö nômö taṙòkhöre hēk Kristū Yēsū ngam mi-ikūö Pòntiös Pailět nö vë-enyre nö ikūö yip tömaṙôngö, kētö ngih chööngö chin öich in meh 14 tö ngih chööngö tökētu nö in meh ngaich hāngö e më-eṅ öm um pitōtuvö hēk um fāluṙen söl ip inmeuktö ngam Mā hī Yēsū Kristū. 15 Hameuktöre an min ngam Mā Yēsū Kristū nö ip tö halēniṙen ṙētakre, tökôlò anga-aṅ hēk töng hěngtak nö tökalēḵ nö mahayöng, Rāchakūö Rācha hēk Mākūö Mā inrē, 16 höng anga-aṅ töt kinpahavö, iyöng el ngam yanāngö anga-aṅ ngam töt rēhěn nö kô nö chahuh in hī ngam tö öl nö meūkö tö tarik, ötrēhěn nö kô tarik nö meūkö e, köp an yēḵ ngam minlēḵken ò hēk köp inrē ngam kumlēḵ ò. Āmen.
17 Yip tökòlô i ngih ṙētak* kētö inlēnö* cha, hòṅ cha nö öt tāilölōn hēk un höng in minë kanòlôre maheūṅkka nup töng ōt ing töngamuh ngaich hö-övö huṙöich, in ngam Tēv pöri ngam kamë-ekūö hī tö në taṙòkhöre chehen ngam lökten hī öi ṙamölōn. 18 Ngö ṙô in inrē öi in cha, tö cha nö la-evṙen tö tölöök hēk kòlô nö i tölöök la-en, ṙamòngnyö ellōnre nö kē-ěti hēk nup töng aṅ in ò ngaich hīnöre anga-aṅ nö kē-ěkūö yip tahëng, 19 ngatī inlahen cha-a nö sā mahamūl kanòlôre nö ikūö ngam Tēv ngam tö ngö, vī ngam tövai machööḵlö öp yamih ṙētak hòṅ cha nö haköpngö tīre nö im tökô-en nômö.
20 Ō Timôtī, ngam amin kinë-ekūö meh haṙēmken e man, um hangihtöre tö nup töng öt yöölen tī ṙô nup töng lama-al ngam Tēv hēk um chumkūöṙen inrē öm hang ṙô yip töngölōn töre nö aṅhavin tö ngam mikah elmat, hö-ö pöri nup mikah elmat cha pön höng lama-al ngam Tēv. 21 Rīkre yip tarik tölō-ongkūö ṙinatö-ellōn tökūöre nö hameuktö në tö ngatī mikah elmat.
Köp an yēḵ nöng örheūheu ngam tökiröng miṙēḵlōn ngam Tēv nö in yīö.