Inlahen La-en Yik Tanīnöṙô

16 Teung ngaich inrē ang Pôl nö im panam Törpī hēk Listra. Ngaich yěh meuk, hěngtak ök umuh mahaköp tö Timôtī minënyi, kūön ök tö hěngtak yöngnyīö Yahūti ṙamatö-ellōnre, Krīk pöri ök yöng ò kikōnyö, 2 eūka inlahen ang Timôtī tö yik prötör aṅ Listra hēk Ikônīöm. 3 Lökten ang Pôl nö vënyö ngam kuilōnre, tö ò nö hòṅ hōluröön tö Timôtī nö kiröönngöre, kē-ě Timôtī ngaich anga-aṅ nö holre ngaich tunyinyngen ò, pò yik taṙòkhöre Yahūti mi-in ngam kamngö nö akahakūö tö ök yöng Timôtī kikōnyö nö Krīk. 4 In nup töng chahūhu cha panam, in u cha-a nö vënyö inlahen nuk inlēnö kahëtö yik tanīnöṙô hēk minṙöinylen aṅ Yērūsalem hòṅ cha nö hāngö u. 5 Ngih ngaich ṙòng e, tö minë māṅ nö ngönlöre ngam ṙinatö-ellōn cha hēk kaheuk sakāmö cha-a nöng iṙūöhöröön sanīöplöre ṙôken.

6 Unôichrit e ngaich cha-a nö kiröönngöre nö lökngö Frūkiā hēk Kalatī tistrik, pön sōtu cha-a tö ngam töhet kumlēḵ nö ahangkö ngam ṙô nö i Ēsiā. 7 Ngaich hē cha nö teung nö i Musiā ngaich hòṅ kalahtenre lang cha-a nö chuh Pitāniā, löktö in ngam töhet kumlēḵ pöri ang Yēsū nö öt halöngten cha nö chuh in e. 8 Lökten ngaich cha-a nö lökngö Musiā* ngaich teung nö im panam Trô-as. 9 Meuk ök tö hěng heūvö ngaich ang Pôl tö hatööm, tö inlahen ök tö hěngtak tarik aṅ Maketònī nöng söktöhëichṙen nö hòṅ aṙēḵtu ṙô nö ngö ṙô nö in ò: “Ihih man öm hayööken ih öm chuh Maketònī.” 10 Ik sā ò ngaich nö meuk ngam heūvö, ilöö kiröönngöre ngaich īhö öi chuh Maketònī, pöi ngölōn tö ngam Tēv nö havëten ih öi ahangkö ngam tölöök inhānga öi in yip tarik aṅ in e.

11 Lökten ngaich īhö öi löklö Trô-as öi yôklö el ngam chōng ngaich hachip talöököre öi el ngam mai ngaich teung öi im kun panam Samòtrakī, ngaich im tahëng sakāmö öi kiröönngöre öi chuh im panam Niāpulis, 12 Ṙā-ang umuh ngaich īhö öi chuh Filipī, ngam tö akahka nö tökiröng nö tistrik ngam panam i Maketònī. Tö hěng nö kòlònī nö tö iyööngö tö më aṅ Rōm. 13 Chuh in ök töhëm mak īhö lā-uk inkūp ngam panam, pöi ngölōn tö ih min öi chūöku öi vë-ekūötēv hē ṙētak ngam Haneūheu Töhet Sakāmö, in e īhö öi höng ūichtöhëichṙen öi ahangkö ngam tölöök inhānga öi in yip yöngnyīö töng mūlhakṙen nö umuh. 14 In e inrē ök tö hěngtak yöngnyīö tö Litiā minënyi, ök mi-iyöng in ngam panam Tuatirā hēk mi-inyīhkö minë inyut tö Pörpölömat* inrē, vamë-ekūö ngam Tēv anga-aṅ, ngaich hē ò nö hangihtöre tö minë ṙô Pôl ngaich löpnyökūö ellōn ò ang Yāvē* hòṅ ò nö ṙatö-ellōnre nö in minë ṙô Pôl. 15 Kēḵ ngam vinôkö ngaich ang Litiā tö yik aṅ patī ò inrē ngaich hòṅ aṙēḵtu ṙô anga-aṅ tö ih nö ngö ṙô: “Yēḵ yīö öi kô-en öi ṙatö-ellōnre tö chu öich chiplö öich in Yāvē,* ngaich iyöng patī chu yī-ö öi höngngöhtöre.” Ngatī inlahen anga-aṅ nö tölṙô ih öi chuh patī ò.

16 Ngaich hē ih öi kiröönngöre öi chuh in öp chūök vamë-ekūötēv, ngaich hěngtak ök kikānö mahalanṙen maheuk ih, tö aṅhav el alaha tök tötlöök ma-ahānga, ök vamënyö mu-unôich. Töng örheūheu misī anga-aṅ nö vë-eny inlahen nup mu-unôich, töp lökten yik mā ò nö teūngen tö töpōyen rupīö nö löktö in ò. 17 Öp töng kū-ö ih ngaich höng chūkörit ih ngòh kikānö nöng ayôṙa nö ngö ṙô: “Mahalanṙen ngam Tēv Lamātulöng tö në taṙòkhöre ön ngòh tarik, ma-ahangtö nang yīö tö ngam talöökö inyööken.” 18 Ṙōl sumkam anga-aṅ nö ngatī inlahen. Im manā-aṅ ngaich ang Pôl nö chëingöre tö ò, havöölökūöre ngaich anga-aṅ nö ngö ṙô nö in ngam kikānö mahalanṙen, ngam tö ahaṅv el alaha tö ngam tötlöök ma-ahānga: “Kētö chööngö meh chin öich i minë-eny Yēsū Kristū öm kunyī-inyre öm ṙā-ang el alaha ò.” Im hē e ngaich anga-aṅ nö kunyī-inyre nö ṙā-ang el alaha ò.

19 Hē yik yöngṙen ngam kikānö mahalanṙen nö meūköre ngaich nö öt taneūnguṙen nö löktö in ò, ngaich kē-ě nā Pôl nā Sailes ngaich cha-a, ngaich tūöknyen cha nö el talöktu nö lākūö yip mahayöng. 20 Kētu ngaich cha-a nö in yip kamhôka ngaich ngö ṙô: “Vīlö tinṙōlen yin kòl vē tarik nö el panam hī. Yahūti yin kòl, 21 ngaich haköpten më tarik tö minë töt nehngenre inlahen ih ngaich hōten ih öi kēḵken u hēk hāngö u, minë tötkô nö kēḵkaṙen tö ih pò ih öi aṅ Rōm.” 22 Hamūlöre ngaich yik tömaṙôngö tarik nö la-al cha ngaich tikachngö inyut nā Pôl nā Sailes më kamhôka hēk tölṙô finòhò cha nö aṅhtī tö chōn. 23 Chaphötvö ngaich cha-a nö el chēl hē kinheūtö finòhò cha ngaich kētu chööngö ök yōmkūö chēl nö aṅhten cha. 24 Kūö ngam tinöölôre ök yōmkūö chēl nö chaphöt cha nö el ngam chēl lamātuhēt ngaich halökngö nuk kalröön cha nö in ök chōn.

25 Im chūöl hatööm pöri nā Pôl nā Sailes nö vë-ekūötēv ngaich tikökṙôre nö tikök nööinyö ngam Tēv, ngaich höng hangihtö ṙô cha yik tahëng aṅ el ngam chēl. 26 Chalô ngaich ök tökiröng kumyeūnö, kayinlöng ngaich ngam chēl tökūö e. Ṙòkhöre ngaich minë inkūp minë chēl nö löpnyörekūö ngaich ṙòkhöre nuk inlök cha nö aluhköiny ngaich suknyöre. 27 Aṅhen ngaich ngam yōmkūö chēl ngaich hē ò nö meuk minë inkūpkūö minë chēl nöng luvë-akkūö, ngaich ngölōn ngaich anga-aṅ tö yik tö hachēlhötvö nö falngöre, kēḵnyö ök sanëtre ngaich anga-aṅ ngaich nöng hòṅ fëlngöre lang. 28 Pōitô ngaich ang Pôl nö hū-a, nö ngö ṙô: “Uh man kēḵngö nômöre, tön höng ṙòkhöre in öi ihih!” 29 Havëkö ëaṅvöre ngaich ngam yōmkūö chēl ngaich haveutṙenre nö kuhēthötre nö chuh lātuhēt, ngaich holtö pinhë-eṅkūöre anga-aṅ nö afukngöre nö iröön nā Pôl nā Sailes. 30 Kēḵnyen cha ngaich anga-aṅ nö chuh lātunyī ngaich ngö ṙô: “Vë-eny nang chu, asūp tö hòṅ inlahen Chu yēḵ Chu öich hòṅ teūngen tö ngam inyööken?” 31 Ngö ṙô ngaich cha-a: “Ṙatö-ellōnre man im Mā Yēsū, ngaich teūngen min më-eṅ hēk tö yip aṅ patī meh inrē nö ṙòkhöre tö ngam inyööken.” 32 Vë-eny nang ò hēk vë-eny nang më aṅ patī ò nö ṙòkhöre nā Pôl nā Sailes tö ngam ṙô Yāvē.* 33 Höng im hatööm ngaich ngam yōmkūö chēl nö keunngen cha ngaich söichlökūö nuk vah cha ngaich öt ha-aṅkenre anga-aṅ hēk tö yik aṅ patī ò inrē nö ṙòkhöre nö kēḵ ngam vinôkö. 34 Chuh patīre tī anga-aṅ tö cha ngaich hanëlen cha, hameuktö ṙanamlōnre ngaich anga-aṅ tö yik aṅ patī ò nö ṙòkhöre, kūö cha ngaich nö ṙatö-ellōnre nö im Tēv.

35 Teung ngaich ngam sakāmö, söömngö ṙô ngaich yik kamhôka nö lökngö eltī yik amahati, nö ngö ṙô: “Ṙānyen yip tarik yin ngaich.” 36 Vë-eny nang Pôl ngaich ngam yōmkūö chēl tö ngam ṙô, nö ngö ṙô: “Tīntö tarik yip kamhôka nö söömngen ngih ṙô tö nā an hōtu ṙinānyi. Lökten nan ngaich an kunyī-inyre ngaich holtö lanöökenre an kiröönngöre.” 37 Ngö ṙô pöri ang Pôl nö in ò: “Tarik aṅ Rōm an āyö, ngaich pöri cha-a nöng öt chöhnyen öp tökô-en inlahen ai yēḵ ai, ai fāluṙen* ngaich höng fōho ai, ai ikūö yip tömaṙôngö hēk chaphöt ai inrē ai el chēl. Ngaich möl nö ngö ṙô tö ai, ai höng öt ṙënuṙô öi kiröönngöre öi lökngö hih? Hö-ö, ötkô ön nö ngatī! Hökngen cha nö hakôtenre nö chuh hih ngaich kēḵnyen ai, ai chuh lātunyī.” 38 Kiröönngöre ngaich më amahati nö vë-eny nang yik kamhôka. Hē më mākūö kamhôka ngaich nö hāngö cha nö tarik aṅ Rōm, pa-ekūö takô ngaich cha-a. 39 Lökten ngaich cha-a nö yih ngaich vë-ekūö cha ngaich kēnyen cha nö lātunyī nö hòṅ aṙēḵtu ṙô tö cha nö kiröönngöre nö ṙāngen ngam panam. 40 Chuh patī Litiā pöri cha-a hē cha nö yôknyi nö ṙā-ang el chēl, hareuskö alaha yik prötör cha-a hē cha nö meukkūö cha ngaich kiröönngöre nö ṙā-ang umuh.