Innëtö Chitri Timôtī
3 Akahalōn pöri tö nup tökiröng kanihngen min nö yih in nup manā-aṅ sakāmö öi ötkô min öi la-al u. 2 Pò tarik min nöng töng hangenlōn töre, hangenlōn tö rupīö, ameū-eure, mahakeūṙöre, töchökhu ṙô, töt hamang chööngö yöngre, töt maha-öiny kinë-ekūöre, töt köp, 3 töt aṅhavin tö nehngenre hanangenlōn, töt hanlāmten nö in nup ṙô, samūöichkö holre, töt ṙamapöre, tö-angëṅ, töt hangenlōn tö tölöök, 4 mahachīl, töt vanë-enkūö, tö tööḵlö tö ngam tanāilölōn, tö hangenlōn tö minnyāmö mötlö tö hanangenlōnre tö ngam Tēv, 5 Höng hameuktöre min cha-a nö ha-öiny ngam Tēv, hö-ö pöri nö asā nup inlahen e. Ṙūöhöngre tö vē tö ngatī. 6 Lamöknyö in cha yin vē tarik töng mahachīlhötre nö kuhēthötre nö chuh el nup patī ngaich höng haköv yip kikānö yip töng ilööṙen nö hōḵ nö lōmngö nö i ṙô yip tahëng, yip töng havīlöng tö ngam tökööl hēk aṅhavin tö nup töṙōlkangen töchōich elkuilōnre, 7 yip töng örheūheu nö haköp, hö-ö pöri nö kēḵ ngam tölöng mikah elmat inlahen ngam kanô-en.
8 Sā inlahen nā Yanes nā Yamres nö la-al Môsös, ngatī inlahen më tarik nö la-al ngam kanô-en ngaich takô cha-a nö ötlöngö elkui, sō-ov inrē nö im ṙinatö-ellōn. 9 Öthō yin vē tö ngatī inlahen tarik nö kū-ö urěh, pön sā inlahen nā tö nëttak nö lööknyi mineūkö nup kumlō-ov cha nö ikūö taṙòkhöre, ngatī inlahen min në kumlō-ov vē tarik nö lööknyi mineūkö nö ikūö taṙòkhöre. 10 Köptī pöri më-eṅ tö minë inköptöre tö chu, minë tinrīken chu, kuilōn chu, ṙinatö-ellōn chu, manööyö chu in nup taṙòkhöre, hanangenlōn chu, manööyö chu, 11 hēk kôtamat më-eṅ öm meuk nup miṙivlōn chu hēk inkihten chu, akahakūö inrē më-eṅ tö nup inkihten chu hēk ötlinëḵken chu öich i Anti-òk, Ikônīöm hēk Listra inrē, sön pöri ngam Mā nö laklen chu tö u nö ṙòkhöre. 12 Lökten yip tö hòṅ lōnu nö keuheūttö inlahenre nö ha-öiny ngam Tēv nö in Kristū Yēsū ngaich ṙòkhöre cha-a inrē min nö hakihtuṙen. 13 Ṙūöhngenre pöri min ngam ötlanöökö yip tötlöök hēk mahachīl, rö-ö nöng cha-a tölō-ongkūö, pön halō-ongkūö yip tahëng inrē.
14 Nup haköp meh pöri ṙô hēk nup minkahtö elnang meh öm hōtu ṙatö-ellōnre, iṙūöhen öm hāngö u, pöm akahakūö tö yip chūökre öm hakööpö u 15 ngih inrē, hē meh öm ṙömöng nyīö ngaich löktökūö in e më-eṅ öm akahakūö tö ṙô ngam töhet līpöre, ngih ṙô an tö tī-iv min tö meh öm akahaṙa nö im inyööken nö löktö im ṙinatö-ellōn in Kristū Yēsū. 16 Ṙòkhöre nun në tökūichö töhet līpöre nö tö uhômhötvö tö ngam Tēv, tö yöölen tī nö im inköphöti, minkahtö elnang, mahalööktit* nup tövaich ṙô hēk ma-asāḵtö mufē hī nö in minë tölöök inchöngten, 17 hòṅ yip tarik ngam Tēv nö heuveū-en nö in nup taṙòkhöre tölöök la-en ngaich hööngöre nö i taṙòkhöre.