I minë-eny Kòlòsi
3 Yēḵ yīö ngaich öi tö hachohlöng öi hol Kristū, ngaich iṙūöhen yī-ö öi chöh minë ṙô aṅ el halīöngö ngam chūök Kristū nö ūichhak nö lāhāmö ngam Tēv. 2 Iṙūöhen yin chumkūöṙen tö nup ṙô aṅ el halīöngö, un in minë ṙô aṅ ing panam. 3 Töng kapah yin sin ngaich hayunngöre ngam nômö yīö nö im hinëngö nö in ngam Tēv. 4 Hē Kristū min nö hameuknyu, ngam nômö hī ngaich hol ò inrē min yī-ö öi hameuknyu öi holtö nööinyö.
5 Lökten fëlngen minë pak ngam alahare* minë vamīlen minë tötlöng tö sā në, chinô-òṅkānö,* töt hanëtö, töt ṙāmapöre nö i inteungngö minë tötlöng kuilōn, tötlöökö lōn hēk ngam yinikhānga ngam töng ṙongta nö in ngam vinë-ekūö insātēv. 6 Anū-ö në ṙô löktö yanīhi tanāinyö ngam Tēv. 7 Urěh yin sin yī-ö inrē öi kamëken u anū-ö la-en ngaich töng ngatī inlahen tinrīken misī yī-ö. 8 Ṙāngen në ṙô pöri ngaich yī-ö nö ṙòkhöre ngaich ṙūöhöngre tö u, tö sā ngam lanīnö, tanāinyö, ötlanöökö, töt lamëkôre hēk nup lamöknyö elvāng tötlöng ṙô. 9 Ui minyôiny-aṅ in höö, ṙāngen minë tötlöng tinrīkenre* ngaich kavalngen e nö anòngngen nup la-en e, 10 ngaich hayutlöre tö ngam tö tufömngöre tinrīken ngam tö vī-i tö ngam Tēv ngaich löktö in ngam tölöng mikah elmat öi vī-i e nö tufömngöre hòṅ e nö asā nyat ngam Tēv, 11 yip tötrēhěn nö Krīk hēk Yahūti hēk ötrēhěn nö tö tunyīnyi hēk töt tunyīnyi hēk ötrēhěn nö aṅ tahëng panam hēk ötrēhěn nö tarik aṅ elinchōn,* ötrēhěn nö töhaköövö, ötrēhěn nö töthaköövö, keuheūttöre pöri ang Kristū ngaich in ò minë taṙòkhöre.
12 Lökten yin öi sā tökatöllöng tö ngam Tēv öi töhet öi töhanguṙen öi hayutlöre tö ngam neūkölōn ngam tö tööḵlö tö ngam hanangenlōn, miṙēḵlōn, inyāichngö, ṙanëmën hēk manööyö. 13 Yěn tarīku tö kunyahalōn nö i holre ngaich kö ṙāpö höö yī-ö, holtö ellōnre pöri öi aṙēḵlen höö, sā Yāvē* nö holtö ellōnre nö aṙēḵlen yīö ngatī inlahen yin yī-ö inrē. 14 In në ṙô pöri nö ṙòkhöre, hayutlöre tö ngam hanangenlōn pò e min nö angū-ö mahamūlten yīö öi im hinëngö.
15 Hökngen ngam lanāmö Kristū pöri nö hayöng nö ellōn yīö,* pön angū-ö ngih lanāmö chö-öiny invëtö yīö hòṅ yīö öi vītöre öi töhěng öi alaha ngaich hameuktöre öi kētö nööinyö u nö ṙòkhöre. 16 Tööḵlö an yēḵ ngam ṙô Kristū nö in yīö nö holtö ngam mikah, tikök ngam salmai hēk holtö ellōnre öi tikökṙôre tö ngam nööinyö ngam Tēv öi kö haköpten höö hēk kö hangönken* höö ngaich holtö ellōnre öi tikökṙôre öi tikökngen Yāvē.* 17 Ngaich yēḵ nup töng vahīṙen yīö i ṙô, i la-en inrē, viten u nö ṙòkhöre nö i minë-eny ngam Mā Yēsū ngaich löktö in ò öi kētö nööinyö ngam Tēv ngam Yöng.
18 Yī-ö inpīhö kikānö, tumṙeūtöre yin tö më pīhöre kikōnyö, sā lōn ngam Mā nö in më mahaköp. 19 Yī-ö inpīhö kikōnyö, kö hangenlōn yin tö pīhöre kikānö ngaich ui hūlökūö tanāinyö* öi in cha. 20 Yī-ö nyīö, hang ṙô më yöngre yin i tökeuheūttöre pön ṙamlōn ngam Mā nö löktö in u. 21 Yī-ö inyöngö kikōnyö, uh yin öi harunnyö lanīnö* më kūönre hòṅ cha nö öt kūöṅngöre ellōn. 22 Yī-ö mahalanṙen, yip yöngṙen yīö öi ing panam hang chööngö cha i tökeuheūttöre öt höng hē e tökūö cha nö meūkö yīö öi sā tö hòṅ haṙamlōn tarik, holtö chaniplö ellōnre pöri hēk pinhë-eṅkūöre tö Yāvē* öi ngatī inlahen. 23 Nup töng kahëken yīö pöri la-en, holtö ellōnre yī-ö öi sā chamö-öinyten Yāvē* öi ngatī inlahen, rö-ö öi chö-öinytö tarik, 24 pò yīö akahalōn tö Yāvē* min nö kē-ěkūö yīö tö ngam raneushö aṅ im amin, vītöre yin öi mahalanṙen ngam yöngṙenre Kristū. 25 Pön kô-en ngòh tötlöökö la-en nö teūngen min anga-aṅ tö ṙòng nup tötlöök la-enre ngaich öt atöltuṙen min ip hē e.