I minë-eny Rōma
6 Sitih ṙô öi pökeh? Höng iṙūöhen hòng öi kēken ngam tökööl hòṅ hī öi pōyen taneungen tö ngam tökiröng miṙēḵlōn? 2 Öt ngatī! Hē hī öi kapah tökūö ngam tökööl, ngaich sitih inlahen min öi höngngöhören öi in e? 3 Hēk öt akahalōn öi yī-ö tö hī ṙòkhöre öi tö vōkö in Kristū Yēsū, vōkö inrē im kinpaha ò? 4 Lökten hē hī öi vōkö im kinpaha ò ngaich anòngngövah ò inrē öi ultu, hòn sā inlahen inchohlö Kristū nö ṙā-ang in yik tökapah ngaich löktö in e ngam inpōilö ngam Yöng tökūö ngam tökiröng kumlēḵ, ngatī ayī-ö min inrē öi lök in ngam tö tufömngöre nômö. 5 Pò hī öi sā inlahen ò öi kapah ngaich hěng öi in ò, ngaich ngatī min öi sā inlahen ò öi hachohlöng öi hěng öi in ò. 6 Pò hī öi akahakūö tö ngam töhötṙeh tinrīken hī nö hol ò nö kilöllöng nö irōi ök chōn, hòn keūheut ngam inyööngö töm tökööl alaha nö in hī ngaich öt köpsören ngam tökööl nö hayöng nö in hī. 7 Lökten ngòh tö ngaich nö kapah ngaich ṙānyu* anga-aṅ nö ṙā-ang im tökööl.
8 Rö-ö nöng angū-ö, yēḵ hī ngaich öi kapah öi hol Kristū ngaich ṙatö-ellōnre ayī-ö tö hī min öi hol ò öi aṅ. 9 Lökten in öi akahakūö tö Kristū ngam tö hachohlöng nö ṙā-ang in yik tökapah nö öt hēk min nö kapah, pön öt hēk min ngam kinpaha nö hayöng nö in ò. 10 Lökten ngam kinpaha Kristū nö kamëḵngö ngam tökööl angū-ö ngaich höng hěngheuh ngam kinpaha ò, hòn öt hēk min nö kapah, ngam inlahen ò pöri nö aṅ nö chö-öinyten ngam Tēv anga-aṅ nö aṅ. 11 Ngatī inlahen lōn inrē yī-ö töre öi töng kapah tökūö ngam tökööl, löktö in Kristū Yēsū pöri öi aṅ öi chö-öinyten ngam Tēv.
12 Lökten yī-ö ui halöngten ngam tökööl nö hayöng nö im töng kapah alaha yīö hēk ui hang chööngö minë kuilōn ngam alaha. 13 Ui rēhěn kētö nup alahare* nö im tökööl nö aṅhtī nup ötlanöökö, kētöre pöri öi in ngam Tēv öi sā inlahen yip tö hachohlöng tarik nö ṙā-ang im kinpaha, hěnghöre kētö ngam alahare* inrē nö aṅhtī ngam lanöökö nö in ngam Tēv. 14 Öt hayööngö yīö min ngaich ngam tökööl, pò yīö öt elkatòh ngam chööngö, elkatòh ngam tökiröng miṙēḵlōn pöri.
15 Sitih ṙô öi pökeh? Höng iṙūöhen hòng öi kēken ngam tökööl pò hī öt elkatòh ngam chööngö, elkatòh ngam tökiröng miṙēḵlōn pöri? Öt ngatī! 16 Öt akahakūö öi yēḵ yīö öi hang chööngö yip tahëng ngaich sā töng kamëtöre yī-ö öi sā inlahen yip tö haköövö ngaich höng elkatòh ngam inköövö min tö ò? Hēk haköövö tö ngam tökööl ngam lökten hī mihôiṅ teūngen tö ngam kinpaha hēk haköövö tö ngam hinang chööngö ngam lökten hī mihôiṅ kaheūkö öi tölöök? 17 Kētö nööinyö ngam Tēv pöri, pò yīö sin misī öi töng haköövö tö ngam tökööl ngaich pöri öi holtö ellōnre öi hang ngam inköphöti öi asā ngam inlahen yīö öi kētu. 18 Heūṅ, ṙānyu ngaich yī-ö öi ṙā-ang im tökööl, lökten yī-ö öi elkatòh ngam lanöökö. 19 Höng lööṙen ṙô chin öich vë-ekūö yīö, pò ngam tarik lamātuhēt el alaha yīö nö ötkalē-en, sā yīö sin misī öi hachōichngen minë tūmö pak alahare ngaich haköövö tö minë tötlöök la-en, hòṅ yīö öi ötlöngö la-en, ngatī ṙēngen minë tūmö pak ngam alaha yīö nö elkatòh ngam lanöökö, hòṅ yīö öi la-evṙen tö nup töhet la-en. 20 Pò yīö hē yīö misī haköövö tö ngam tökööl ngaich ṙānyu yī-ö tö ngam lanöökö.
21 Sitih inlahen nup rih ṙòng yīö kahëtö yīö misī? Aṙē-ěv yī-ö töngamuh yěi fēken nup tö urěhangen la-enre misī. Höng ngam kinpaha ön manāngen minë tö ngatī la-en. 22 Ngaich pöri yī-ö töngamuh öi ṙānyu öi ṙā-ang im tökööl ngaich vītöre öi mahalanṙen ngam Tēv, lökten yin öi kētö ṙòng ngam hanëtö ngaich im manāngen e min öi teūngen tö ngam nômö tö örheūheu-aṅ. 23 Pò ngam raneushö ngam tökööl nö kinpaha, ngam inlōnti pöri kahëtö ngam Tēv nö ngam nômö tö örheūheu-aṅ nö löktö in ngam Mā hī Kristū Yēsū.