Raneh Chitri Yik Aṅ Kòrin
16 Minë tö hamūlö kòntripiūsön nö chö-öinyten yip töhet tarik, mihôiṅ yī-ö öi hang ngam tökētu tö Chu tinölöṙô minë māṅ i Kalātiya ngaich asīnken u. 2 Im ranehtökūö sakāmö minë afta, kò-òren ngòh tö hěngtak in yīö nö harēvngö chūök nup töng aṅ in re öi asā ṙôken nup töng hamūl re, hòṅ Chu min yēḵ Chu öich yih ngaich öt hamūl kòntripiūsön min ip hē e angū-ö ṙētak. 3 Yēḵ Chu pöri min öich yih öich umuh ngaich tīnngen yip tarik min Chū-ö yip tö kūichtu minë-eny tö yīö nö imat nup chitri, hòṅ nup kahëtö yīö inlōnti öi holtö ṙanamölōnre ngaich hateungten u min cha-a nö i Yērūsalem. 4 Yěn tölöök min ngam inlahen chu öich chuh in e, ngaich in cha min chū-ö öich kiröönngöre.
5 Hē kinheūten Chu pöri min öich chöhken yip aṅ Maketònī ngaich chuh in yīö min Chū-ö, pò Chu öich lökngö Maketònī min öich yih, 6 ngaich lohten min Chū-ö höngngöhtöre öich in yīö öich ihih ip laneūchö ngaich vai rôvat min yī-ö öi söömngen chu unôichrit inlahen Chu öich chuh in öp töng kū-öre. 7 Öt lōnu Chin töngamuh öich höng el talöökö öich meukkūö yīö ngaich kiröönngöre, ngih pöri lōn Chu yēḵ Yāvē* nö halöngten Chu ngaich kēnyen ngam tö rahëichnyen Chū-ö ṙētakre öich in yīö. 8 Iyöng Efisös pöri min Chū-ö söl ip ṙētak sakāmö ngam Pentěkòs, 9 pò ngam töhěng inkūp nö löpnyukūö nö chö-önyten tö chu hòṅ chu hēk öich ṙūöhlö inlahenre öich la-evṙen, pōyen pöri inrē yip tö kunyaha elmat.
10 Yēḵ Timôtī nö yih nö umuh ngaich chumkūöṙen yī-ö tö ò nö un hēngö pinhë-eṅkūö nö in yīö, pò ò inrē anga-aṅ nö tö sā Chu nö tö la-evṙen tö la-en Yāvē.* 11 Lökten nö un hěngtak tö miyëḵ elmat tö ò. Vai rôvat min yī-ö öi söömngen ò nö holtö lanöökenre, hòṅ ò nö chuh in Chu nö ihih, pò Chu öich hökken ò öich holten më prötör.
12 Ṙô tö inlahen ngam hol hī Chin Apòlös, kalē-ě ṙô Chū-ö öich hōten ò nö hol më prötör nö chuh in yīö. Öt kuyulōn pöri sin anga-aṅ töre nö chuh in yīö, yěn ṙētakvö pöri min anga-aṅ ngaich chuh in yīö min anga-aṅ.
13 Hīnöre yin, haköpöre im ṙinatö-ellōn, ui pa-ekūö,* iṙūöhen im kumlēḵ. 14 Hökngen nup taṙòkhöre la-en yīö nöng im hanangenlōn.
15 Kahōlö, hěng ön ngih ṙô Chu hēk öich ṙūöhlö alaha yīö, akahakūö yin tö ngam mikūönö Istěfenās nö raneh ṙòng Akāya ngaich iṙūöhen nö la-evṙen tö mineukṙen yip töhet tarik. 16 Ngatī inrē yī-ö öi elkatòh yip tarik tö ngatī inlahen hēk elkatòh yip taṙòkhöre hamôlṙen cha hēk yip tökalēḵ alaha nö la-evṙen. 17 Kirööngen ṙanamölōn Chin tö hē Istěfenās, Fòtunatös hēk Kaikös nö ihih, pò cha nö hateungngen nup hanāṅten yīö nö ihih. 18 Hareuskö alaha yīö hēk hareuskö alaha Chu cha-a, lökten öi milēḵken yip tö ngatī inlahen tarik.
19 Sinlāmu ṙô yip aṅ el minë māṅ i Ēsiā nö in yīö, ngatī nā Akula nā Priska, holre inrē tö ngam māṅ tö mūlhakṙen nö i patī ò nö holtö ellōnre nö kētö sinlāmö nö in yīö. 20 Sinlāmö in yīö ṙòkhöre prötör. Kö salāmö höö yin holtö töhet hināmökūö.
21 Chū-ö Pôl hakôtenre chin öich aṅhtī tö këlre öich kūichtö sinlāmö in yīö.
22 Yěn ōt töt hangenlōn tö ngam māṅ ngaich öt hakôlöngṙô anga-aṅ, Ō Mā hī, yih man! 23 Köp an yēḵ ngam tökiröng miṙēḵlōn ngam Mā Yēsū nö in yīö. 24 In yīö an yēḵ ngam hanangenlōn chu, yī-ö taṙòkhöre mi-in Kristū Yēsū.